Read Rongmei Naga 2 GUANGH NUNC 20 Bible Online

2 GUANGH NUNC 20 - Rongmei Naga bible

2 GUANGH NUNC 20

¹Mi ganv khou tei guangh Hezekia nnau keyna theic ni kumc khwan the. Muhzwng Isaia kata zauh khang guangna kakhou sa the, “Nang gay dat ni tuang hamh the kumhpui zaeng rui kady kanavlou nimei guay kadylou la tho. Theih khang chamdaanv tho twna RINGHPOUC rui nang khou sa the.”

²Hezekia tei ngaengsaengc biak thangc kazaw karih patna kumna huayney the:

³“RINGHPOUC, ai rui lwmnuhmei swna lunghsuhmei lev kazauhna nang taanv taanhmei khatni nang rui kahawmei taanh khang karamcna lungc kanmei hei guay tei ningtowlou o.” Kumna kamei kap ranv sihna kap the.

⁴Isaia rui guangh kai kaimav chung tat twan mak khou guangh Hezekia daeng khou hanc datna kumna sa o twna RINGHPOUC rui sa the,

⁵“RINGHPOUC nang pu nang pouc David Racguangc rui nang huayneymei tei chulou the khatni nangmik dui ta how the. Ai rui nang ta tigaylou dat puni the heikumna zaeng neihthumh lungc khou nang Ravkai thangc tat dat puni the.

⁶Ai rui nang panty tingkwm 15 haaplou dat puni the. Ai rui nang ta khatni mi kaidai ta Asiriamei guangc baanc khou rui kanlou puni. Azanc hym khang khatni abangc David khou swlou kanmei latdyng zaeng rui ai rui mi kaidai ti hei gaeklou puni.”

⁷Guangh tuang asuhdai khou tei tadutthai huai kasiamhna duam tio, kum ti thei kamei gay dat puni twna Isaia rui guangh tuang siamruaimei nunc khou sa the.

⁸Guangh Hezekia rui thanv the, “RINGHPOUC rui ata tigaylou dat puni kumna zaeng neih thumh lungc khou ai Ravkai tat dat ngam puni twmei madanhmei tuang tabui nai bu cho?”

⁹Isaia rui daw the, “RINGHPOUC rui katuang latdyng taanclou puni twmei madanhmei tuang tiilou puni. Ntaw, kailaak swng tei kaamv ruh thei biak thangc patmei ta kahaw ny hu biak thangc patmei ta kahaw cho?”

¹⁰Hezekia rui daw the, “Mi swng tei kaamv ruh hu biak thangc patmei thu chiw de; kaamv ruh thei biak thangc tipat ro.”

¹¹Isaia rui Ravguangc khou huayney pwkhou guangh Ahaz rui swloumei kailaak tuang swng tei RINGHPOUC rui kaamv ruh thei biak thangc titangsyn pat the.

¹²Mi ganv khou tei Babilonmei guangc, Baladan nac mpouh Merodak Baladan rui guangh Hezekia nnauna bam e twmei chamv chu lana latdyn lev kaipat tii guang khwan e.

¹³Hezekia rui latdiumei nunc ta tei laalouna katuang lanv: daandi, kachaekc thauh maruai, khatni suc-rih na guay lyanlou khwan e. Katuang ramh rypuikai khou khatni kaguangh kandic khou katuang naimei katana lyanlou ngam khwan the.

¹⁴Khoutei muhzwng Isaia rui guangh Hezekia daeng khou guangna “Mi nunc tei tabui thangc rui guang cho khatni kaniw rui tabui lat salou bu cho?” twna thanv the. Hezekia rui daw the, “Kaniw duc nganvmei Babilon kandic thangc rui guangmei tuang de.”

¹⁵“Guangh kai khou kaniw tabui how kan tu cho?” twna Isaia rui thanv the. “Kaniw ramh guayna how kan the, ramh rymeikai khou naimei katana lyanlou ngam kan the.”

¹⁶Khoutei Isaia rui guangh khou sa the, “Ngamparymei RINGHPOUC rui sa the twmei thu

¹⁷nang tuang guanghkai khou naimei katana, nang pu nang pouc nunc rui aseic nganvmei lungc khou khuam kaduailoumei kaguayna Babilon kandic thangc phungc tat nimei ganv guang pw the. Ramh khat na sini nsaekclou dat ni tuang hamh the.

¹⁸Nangzei riang nang kikta gaanvsaekc ta Babilon kandic thangc phungc tatna kaniw pumc siam lana Babilonmei guangc bangc tisw puni the.”

¹⁹Guangh Hezekia tei kapanty lungc khou thu nchu-nzaenghna giuga makna lungc bam puni de twmei laana “RINGHPOUC rui tii guangmei lat hei gaymei tuang de,” twna daw the.

²⁰Guangh Hezekia rui taancloumei taanv guay, katuang tancbauhmei taanv guay, kamei rui zeihdai chauloumei khatni kaidai lungc khou dui zay gut khang duichaeng chau guangmei hei guay hei Judamei Guangh nunc tuang Chakh buk khou hylou the.

²¹Hezekia theihmei tangv kanac mpouh Manase rui guanghtu dat the.