Read Rongmei Naga 2 GUANGH NUNC 21 Bible Online

2 GUANGH NUNC 21 - Rongmei Naga bible

2 GUANGH NUNC 21

¹Manase katingkwm 12 khou kamei Judamei guangc sw the, kumna kamei Jerusalem khou tingkwm 55 guanghtulou khwan e. Kapui zanc rui Hephziba twna kaw khwan e.

²Kamei nunc guang pwkhou RINGHPOUC rui alay ganclou kanmei zaat nunc tuang chanymei taanv thak guay ta layluaihna Manase rui RINGHPOUC ruc khou paapc taanc khwan e.

³Kapu Hezekia rui swmaan kanmei rav baih baihmei ta kalummei bamv guay tei kamei rui kasiamh thau dat khwan e. Isaraelmei guangc Ahab rui sw kanmei kumcna Baal ta kalummei bamv khang ravchabamv nunc kasiamh thau dat khwan e khatni Ashera ravpui maengc kasiamh thau dat khwan e. Manase rui gaanchuangcna ta ni kalum khwan e.

⁴RINGHPOUC rui kata kalummei bamv khang e twna saloumei Ravkai lungc khou rav baihmei ta kalummei ravchabamv kamei rui kasiamhlou khwan e.

⁵Ravkai tuang kaimav kanei khou gaanchuangcna ta kalummei tuang ravchabamv kasiamhlou khwan e.

⁶Kamei rui kanac mpouh ta rawna khaeng khwan e. Kamei rui mangmuh zaucna, duaih swna ravtow amuc kachuc bam khwan e. Kamei RINGHPOUC ruc khou paapc daicna taancna kalungpuam ntanv thau khwan e.

⁷Kamei rui Ravkai lungc khou Ashera ravpui maengc lou khwan e. Mi Ravkai lam khou tei RINGHPOUC rui David khou khatni kanac mpouh Solomon khou kumna sa khwan e: “Isaraelmei tuang kaikhwang 12 tuang ramv pang khou mi Jerusalem kaidai lungc khou mi Ravkai khou hei ata kalummei bamv khang ai rui kadah patloumei tuang the.

⁸Abangc Mousi rui kaniw khou tiiloumei Riakdanv guay khatni latdyn kapwm tei Isaraelmei nunc rui piu e thei ai rui kaniw pupouc nunc khou tiilou kanmei kandic khou rui kaniw ta alay ganclou ni tuang hamh e.”

⁹Tiki Judamei nunc rui RINGHPOUC lat piu mak khwan e, khatni kaniw guang pwkhou RINGHPOUC rui mi kandic khou tei rui alay ganclou kanmei zaat nunc rui taanc bam khwanmei paap khang suangc sini simei paap khou Manase rui kaniw ta zaylou khwan e.

¹⁰Kabangc muhzwng nunc khou rui RINGHPOUC rui kumna sa guang khwan e,

¹¹“Guangh Manase rui chanymei taanv guay hei taanc the, Kanaanmei nunc rui taanc bammei taanv suangc sini simei taanv taanc the; kamei rui katuang ravmaengc rui Judamei nunc ta paapc khou zaylou the.

¹²Hei kumhpui zaeng rui kachamv chuloumei kathuicna rui ping kadunh pw nimei kamut kamaimei RINGHPOUC, Isarael Racguangc ai rui Jerusalem khatni Juda ruc khou tiguang puni the.

¹³Ai rui Samaria ta kumc, Isaraelmei guangc Ahab khatni kakikta nunc ta kumc Jerusalem ta riap puni the. Napkuak phiak gancna nkhumloumei kumc ai rui Jerusalem khou maansei guay ta phiak ganc puni the.

¹⁴Theic nsaekcloumei nunc ta ai rui ganclou puni the, khatni kaniw kandic khou rih keyna kaniw kandic laa kanmei zauczihmei nunc baanc khou ai rui kaniw ta tiipatlou puni the.

¹⁵Ai rui mi hei amei nunc ruc khou taanclou puni the, kalam thu kaniw rui Izip khou rui pat rap khou rui thauna ntaw nganv aruc khou paapc taancna alungpuam tithau guang the.”

¹⁶Manase rui khuay maekmei meic mpeyna ta swluaina Jerusalem chaengdai guay khou zei luangc khwan e; kamei rui mi hei Judamei nunc ta ravmaengc kalummei khou zaylouna RINGHPOUC ruc khou paapc titaancloumei ruc khou taanc haapmei tuang e.

¹⁷Manase rui taancloumei baih baihmei taanv guay, kamei rui taanc kanmei paap guay lev kazauhna Judamei Guangc nunc tuang Chakh buk khou hylou the.

¹⁸Manase tei theicna guanghkai pikwan Uzza tuang pikwan khou mbeihlou the. Kanac mpouh Amon rui kaphaan guangh sw dat khwan e.

¹⁹Amon katingkwm 22 khou Judamei guangc swna kamei Jerusalem khou tingkwm kanei guanghtulou khwan e. Kapui hei Jotba kaidaimei Haruz nac aluhpui Meshullemet khwan e.

²⁰Kapu Manase kumcna kamei ni RINGHPOUC ruc khou paapc taanc khwan e;

²¹kapu taanv ta layluaihna kapu rui kalummei ravmaengc guay ta kamei ni kalum khwan e.

²²Kamei rui RINGHPOUC kapu kapouc nunc Racguangc ta ganc khwan e kumna RINGHPOUC tuang latdanv guay piu mak khwan e.

²³Amon ta katuang meicdaihmei nunc rui guanghkai khou rui swluai khwan e.

²⁴Amon ta swluaimei nunc ta Judamei nunc rui swluai datna kanac mpouh Josia ta guangh tisw dat khwan e.

²⁵Amon rui taancloumei baih baihmei guay Judamei Guangc nunc tuang Chakh buk khou hylou the.

²⁶Amon ta Uzza tuang pikwan khou katuang tarou khou mbeihlou khwan e, kumna kanac mpouh Josia rui kaphaan guangh sw dat khwan e.