Read Rongmei Naga 2 GUANGH NUNC 22 Bible Online

2 GUANGH NUNC 22 - Rongmei Naga bible

2 GUANGH NUNC 22

¹Josia katingkwm tachat khou kamei Judamei guangc sw the, kumna kamei Jerusalem khou tingkwm 31 guanghtulou khwan e. Kapui hei Bozkat kaidaimei Adaia rui puanhmei Jedida e.

²RINGHPOUC rui kahawmei tei Josia rui taanc khwan e. Kamei kapu kapouc guangh David thei layna, Ravguangc tuang latdyn guay piu chuyna piu khwan e.

³Josia rui guanghtumei 18mei kwm latzan kai tuang hymeipu Azalia nac mpouh, Meshullam tou Shaphan ta kumna sana Ravkai thangc thouclou the:

⁴“Tingkuh Hilkia daeng thangc tatna Ravkai chaengmun khou bammei amuh nunc rui meic nunc khou rui syandui azuh dou khuamlou the cho thanv o.

⁵Kumna hei tei Ravkai katamvmei khou kathouc swmei nunc khou tei tii tio twna sa tio. Hei tei rui

⁶thing taanhmei nunc, kai swmei nunc, khatni ntauh taanhmei nunc tuang phy khang tii tio, khatni hei tei rui kathing katauc liu tho.

⁷Taanv sinmei nunc tei lungning nthan thiakhmei nunc de kumhpui zaeng rui mi syandui tuang chakh tei hylou mak sini nuh de.”

⁸Shaphan rui guangh tuang lat tei Hilkia khou salou the. Khoutei latdanv buk tei Ravkai lungc khou rui laatow the twna Hilkia rui kakhou dinclou the. Hilkia rui mi buk tei tiilou tina, Shaphan rui hei tei pac the.

⁹Khoutei kamei guangh daeng khou guangna sa the: “Ravkai khou naimei syan guay tei nang bangc nunc rui laana Ravkai katamvmei nunc khou tei tiilou kan the.

¹⁰Mi buk hei Hilkia rui akhang tiimei tuang e.” Hei tei kamei rui guangh khou pac ranvna pac patlou the.

¹¹Mi buk khou tei rui pac patmei tei guangh tei rui chu pwkhou, kamei kalung kabiuna kaphey siat the,

¹²kumna amuh Hilkia, Shaphan nac mpouh Ahikam, Mikaia nac mpouh Akbor, latzankai tuang hymeipu Shaphan, khatni guangh siamruaimei Asaia kaniw khou guangh rui latdanv swna sa the:

¹³“Nangniw tatna mi buk tuang latdyn lam khou hei RINGHPOUC khou aphaan khatni Judamei meic guayna phaan swna thanv o. Aniu ta taanc o twna mi buk khou dincloumei guay tei aniu taanc timakmei zaeng rui RINGHPOUC rui aniu ta lunghpuamc the.”

¹⁴Hilkia, Ahikam, Akbor, Shaphan khatni Asaia kaniw Jerusalem tuang kalangv kathanc khou bammei muhzwngpui Hulda khou mi lam tei thanv khang tat the. (Mipui gaanv Shallum twmeipu, Tikva nac khatni Harhas tou kamei hei Ravkai tuang pwan rai guay sinmeipu e.) Pat kanmei kaguay tei kaniw rui mipui khou tei raclou the.

¹⁵Kum tina guangh daeng thangc tat dat lana

¹⁶RINGHPOUC rui sa e twna kumna sa ti tho twna sa the: “Guangh rui pac kanmei buk khou tei hyloumei theilayna ai rui Jerusalem ta khatni khou tei lungc bammei nunc ta riap puni the.

¹⁷Kaniw rui ata gancna rav baih baihmei khou khaengna kaniw taanv rui alungpuam tithau the. Jerusalem ruc khou alungpuam pat the, nchu key dat ngam mak khe.

¹⁸Guangh lam khou tei RINGHPOUC Isaraelmei Racguangc ai rui kumna sa e: Mi buk khou hyloumei lat tei nang nking the,

¹⁹kumna ai rui Jerusalem khatni mi khou lungc bammei nunc ta riap nimei lam tei nang pactow pwkhou, nang phey siatna khatni kapna lunghlaicna ahu khou niamh key the. Ai rui hei tei meic zauc bauh makmei lwn tiswlou puni the, kazanc saancna siangmei bamv tiswlou puni the. Tiki ai nang tuang huayneymei tei chu the,

²⁰kumhpui zaeng rui nang theih mak saanv thu ai rui Jerusalem khou tiguang nimei tei tiguang lak khe. Nang ta nchu-nzaenghna titheiclou puni the.” Mi nunc tei mi chamv hei phungcna guangh khou guang dat the.