Read Rongmei Naga 2 GUANGH NUNC 23 Bible Online

2 GUANGH NUNC 23 - Rongmei Naga bible

2 GUANGH NUNC 23

¹Guangh Josia rui Juda khatni Jerusalem tuang kapy nunc ta kaw kaduaina

²amuh nunc, muhzwng nunc khatni lungcgay lungcsi khaih makna meic guayna ta nduanghna Ravkai thangc tat the. Isaraelmei khou rui ariw datmei latdyng buk khou tei rui guangh tei rui meic nunc khou pac ranvna pac patlou the.

³Kamei rui guangh tuang tiangdaic daeng khou tei dingna RINGHPOUC kalat piu khang, kalung kadu kapwm rui katuang latdyn khatni latdanv guay piu khang, khatni latdyng khou tei kazauhmei taanv mi buk khou tei hyloumei guay taanc ni the twna RINGHPOUC khou latdyng sw the. Mi latdyng tei piu ni twna meic guayna tei rui ni latdyng sw the.

⁴Khoutei Baal ta, Ashera ravpui ta, khatni gaanchuangcna ta kalummei khou sin swmei puat guay tei Ravkai khou rui laa pat khang Josaia rui Tingkuh Hilkia, kabangc khou bammei amuh nunc khatni Ravkai kaimun rigaanvmei nunc khou tei latdanv swna sa the. Guangh rui mi puatc guay tei kaidai paengc thangc phungc patna Kidron nzaengc daeng khou mai ntei the, kumna mi tuang mbut tei Bethel thangc phungc tat the.

⁵Rav baihmei ravchabamv khou khaeng khang Juda tuang kaidai guay khou khatni Jerusalem daeng khou naimei bamv guay khou Judamei guangc nunc rui lwmmei amuh nunc twmei thu Baal, neihmik, bw, gaanphiu, gaanchuangcna guay khou khaengmei amuh nunc ta tei kaniw bamv laa ganc kan the.

⁶Kamei rui Ravkai khou rui Ashera ravpui maengc tei laa patna kaidai paengc thangc Kidron nzaengc khou laa keyna mai ntei the, mi tuang mbut guay tei kabuay diangc patlouna meic guayna tuang tarouluangc khou zinlou kan the.

⁷Ravkai tuang kapumc zuanhmei nunc lungc bammei kai guay tei sw kasic kan the. (Ashera ta kalummei khou sin swmei tuang thiula saenghmei guay tei mi bamv khou tei kasiamh bam khwan e.)

⁸Juda kaidai guay khou bammei amuh nunc ta tei Jerusalem khou phungc guang the kumna Juda kandic kapwm khou kaniw rui khaeng bammei ravchabamv guay tei kamei rui swmaan the. Kaidai gutmei tuang raenghmun daihmei khou baanzat biak thangc mi kaidai tuang guanghkhyn, Joshua rui ravbamv khang kasiamhloumei ravchabamv guay tei ni kamei rui sw kasic the.

⁹Mi amuh nunc ta tei Ravkai khou taanvtaanh khang nuhlou dat mak khe, tiki amuh nunc khang tiiloumei khay lou makmei ntyan tei thu kaniw ta ni titu khwan e.

¹⁰Meic gaanv khat na sini Molek rav khou kaniw nac mpouh aluh nunc ta rawna khaeng dat nuh mak khang Hinnom nzaengc khou naimei rav kalumbamv Tophet tei guangh Josia rui swtanac the.

¹¹Neih ta kalum khang Judamei guangc nunc rui katgutloumei takuanh nunc tei ni kamei rui laa ganc the, kumna mi ta tei kalummei khou sin swmei takuanh gari guay tei ni mai ntei the. (Mi guay tei Ravkai kaimav khou, meicdaihmeipu Nathan Melek rui lungc bammei kai khou rui duh makmei bamv khou raenghmun daeng khou lou bam khwan e.)

¹²Guangh Ahaz tuang kainam khou Judamei guangc nunc rui swloumei ravchabamv guay khatni Ravkai kaimav kanei khou swloumei ravchabamv guay tei Guangh Josia rui sw kasic the. Kamei rui mi ravchabamv guay tei kakiak kiak khang sw puatna Kidron nzaengc khou phaic keylou kan the.

¹³Sidonmei ravpui Astarte, Moabmei rav Kemos khatni Ammonmei rav heikumhmei chanymei ravmaengc guay ta kalum khang guangh Solomon rui Jerusalem tuang neihpat, Olive chyng tuang dihba khou swloumei ravchabamv guay tei Josia rui sw kasic the.

¹⁴Guangh Josia rui ravmaengc tuang swangtauc tiangc guay swbau the, Ashera ravpui khou katloumei maengc tei dowbau key the, kumna mi guay ding bammei bamv khou tei kamei rui meic rou ganc padiklou the.

¹⁵Isaraelmei ta paapc khou zayloumeipu guangh Jeroboam, Nebat nac mpouh rui Bethel khou kasiamhloumei kalummei bamv tei ni Josia rui sw kasic the. Josia rui ravchabamv tei swra keyna mi tuang ntauc guay tei kamut diangc patlou the. Kamei rui Ashera tuang maengc tei ni mai ntei the.

¹⁶Khoutei Josia rui zauc nkuayna zauc pwki mi chingcbut khou tei tarou asaekc howna, kamei rui mi khou tei rui maansei rouruc laa patna mi ravchabamv khou tei ntei the. Heikumna kamei rui mi ravchabamv tei sw tanac the. Mi hei kaganv tingsaenghmei hu thangc ngay akhat khou guangh Jeroboam rui mi tuang ravchabamv daeng khou ding bam khou muhzwng rui dinc kasuakcloumei tei pat tanghmei tuang the. Mi tuang lat hei dinc kasuakcloumei muhzwng tuang tarou tei how lana,

¹⁷“Hei tei thow tuang tarou cho?” twna kamei rui thanv the. Bethelmei nunc rui daw the, “Mi hei Juda thangc rui guangmei, nang rui mi tuang ravchabamv khou swlou nimei lam khou dinc kasuakcloumei muhzwng tuang tarou e.”

¹⁸“Heikumna bam kan di tho. Katuang rou tei laa pat ri tho,” twna Josia rui latdanv pat the. Kumna karou tei sw kalung mak khe, Samaria thangc rui guangmei muhzwng nunc tuang rou ni sw kalung mak khe.

¹⁹RINGHPOUC tuang lungpuam tithaumei Isaraelmei guangc nunc rui rav baihmei ta kalum khang kasiamhloumei bamv guay tei kaidai kathuicna khou guangh Josia rui sw kasic the. Kamei rui Bethel tuang ravchabamv khou sw kanmei kumcna mi tuang ravchabamv guay khou tei ni swlou kan the.

²⁰Ravmaengc kalummei tuang amuc guay ta tei kaniw rui khaeng bammei ravchabamv khou tei swluai the. Khoutei ravchabamv kathuicna khou maansei rou ntei the. Mi tangv tei kamei Jerusalem khou guang dat the.

²¹Latdyng buk khou hyloumei theilayna RINGHPOUC kaniw Racguangc ta chamvpouhmei swna Kaanpatmei Ngai ngay khang Guangh Josia rui meic nunc khou latdanv tii the.

²²Latzanpouc nunc rui Isaraelmei nunc ta sin rap khou rui thauna hei kumhmei tuang Kaanpatmei Ngai hei Isaraelmei guangc nunc rui ni, Judamei guangc nunc rui ni ngay zat kan mak ge.

²³Kumna mi ngai tei Josia rui guanghtumei tuang 18mei kwm Jerusalem khou ngay khwan the.

²⁴Tingkuh Hilkia rui Ravkai khou rui ariwmei buk khou tei hyloumei latdyn guay tei titaanh khang rui Jerusalem khatni Juda tuang kabamv baih baihmei khou naimei ravtow amuc guay, tampyrav guay, ravmaengc guay, khatni baih baihmei rav nunc ta kalummei tuang puat guay laa ganc the.

²⁵Kakumcna kalungning, kadu khatni kapumtan guay gutlouna RINGHPOUC siamruai sw kanmei, Mousi tuang Riakdyn guay piuna lungc kanmei guangc nai kan mak ge, ntaw nganv lungc guang ni lungc guang dat mak ge.

²⁶Tiki guangh Manase tuang taanv zaeng rui Juda kandic ruc khou RINGHPOUC tuang lungpuam tithau khwan e, kumna ntaw nganvna mi lungpuam tei nchu key mak ge.

²⁷RINGHPOUC rui sa khwan e, “Ai rui Isarael ruc khou taanclou kanmei kumcna Juda ruc khou ni taanclou puni: Ai rui Judamei nunc ta amikzaw khou rui gancpat puni the, khatni ai kadahloumei Jerusalem, khatni ata kalummei bamv khang e twna ai rui saloumei bamv Ravkai tei ai rui gancpat puni the.”

²⁸Guangh Josia rui taancloumei baih baihmei guay Judamei guangc nunc tuang Chakh buk khou hylou the.

²⁹Josia rui guanghtu bammei douc, Izipmei guangc Neko rui Asiriamei guanghdaihmei ta nkhav khang katuang ricmei nunc ta nduanghna Euphratis duithuak khou ngangh khwan e. Guangh Josia rui kata Megiddo twna kawmei bamv khou dingthing khang sw khou rui mi ricbamv khou tei rui kata swluai the.

³⁰Katuang meicdaihmei nunc rui kapumc tei takuanh gari khou louna Jerusalem khou phungc guang datna guangh nunc tuang tarou bamv khou mbeihlou the. Judamei nunc rui Josia nac mpouh Joahaz ta guangh khang kadahlouna thauh teylou the.

³¹Joahaz katingkwm 23 khou Judamei guangc sw the, kumna kamei Jerusalem khou bw kathumh guanghtulou khwan e. Kapui rui Libna kaidaimei Jeremia rui puanhmei Hamutal khwan e.

³²Kapu kapouc nunc kumna kamei RINGHPOUC ruc khou paapc taanc khwan e.

³³Izipmei guangc Neko rui Hamat kandic khou Ribla twna kawmei bamv khou rui kata nym lana, guangh khav swna daandi kilogram 3400 khatni kachaekc kilogram 34 Judamei ruc khou keyloumei tangv rui kamei guanghtumei nganvlou khwan the.

³⁴Guangh Neko rui Josia nac mpouh Eliakim ta Judamei guangc tiswlou dat the, kumna kazanc Jehoiakim twna kalaiclou the. Joahaz ta Neko rui Izip kandic thangc phungc keyna kamei khou tei theiclou duc kan the.

³⁵Izipmei guangc khang dihkhav tii khang rui guangh Jehoiakim rui meic nunc khou rui kaniw tuang lanv geihmei raumei theilayna dihkhav khuam the.

³⁶Jehoiakim katingkwm 25 khou kamei Judamei guangc sw the, kumna kamei Jerusalem khou tingkwm 11 guanghtulou khwan e. Kapui hei Ruma kaidaimei Pedaia nac pui Zebida khwan e.

³⁷Kapu kapouc nunc rui taanhmei kumcna, Jehoiakim ni RINGHPOUC ruc khou paapc taanc khwan e.