Read Rongmei Naga 2 GUANGH NUNC 24 Bible Online

2 GUANGH NUNC 24 - Rongmei Naga bible

2 GUANGH NUNC 24

¹Jehoiakim rui guangh sw bammei douc, Babilonmei guangc Nebukadnezar rui Juda kandic khou rih key khwan e, kumna tingkwm kathumh kabangc khou lou khwan e, mi tangv tei kamei kabangc khou bam dat lak khe twna rih thau the.

²Juda ta sw kamut kamai puni twna kabangc muhzwng nunc khou RINGHPOUC rui salou kanmei theilayna Babilonmei, Siriamei, Moabmei, khatni Ammonmei ricmei nunc ta Jehoiakim ruc khou thouc guang the.

³Mi guangmei hei RINGHPOUC kamikzaw khou rui Judamei nunc ta alay pat khang kamei rui mi latdanv hei patmei tuang the. Mi hei guangh Manase rui taanc kanmei paap guay zaeng rui,

⁴nthukna kamei rui khuay maekmei nunc ta swluai kanmei guay zaeng khou tei rui e. RINGHPOUC rui mi khuay guay tei Manase ruc khou kuaklou dat ngam makna tipat khwan e.

⁵Jehoiakim rui taancloumei baih baihmei taanv guay Judamei guangc nunc tuang Chakh buk khou hylou the.

⁶Jehoiakim theic kan pwkhou, kanac mpouh Jehoiakin rui guanghtu dat the.

⁷Izipmei guangc khatni katuang ricmei nunc Izip khou rui tat twan pat dat zat mak khe, kalam thu Izip tuang ramv, Euphratis duithuak khou rui Izip dihpy ramv guay tei Babilonmei guangc rui sin khwan the.

⁸Jehoiakim katingkwm 18 khou Judamei guangc sw the, kumna kamei bw thumh guanghtulou khwan e. Kapui hei Jerusalemmei Elnathan nacpui Nehusta khwan e.

⁹Kapu kumcna Jehoiakin ni RINGHPOUC ruc khou paapc taanc khwan e.

¹⁰Kamei guangh swna bammei ganv khou tei, Babilonmei guangc Nebukadnezar tuang ricpy nunc rui rihmei nunc ta nduanghna Jerusalem ruc khou rih keyna mi kaidai tei dingbin khwan e.

¹¹Dingbinlou bammei ganv khou tei Nebukadnezar kamei kahak Jerusalem khou guang khwan e,

¹²kumna guangh Jehoiakin tei kapui, kanac mpouh nunc khatni guangh kai tuang taanvpy phunghmei nunc lev Babilonmei khou gutlou the. Nebukadnezar rui guanghtumei tuang tachatmei kwm Jehoiakin ta kangmei swna nym the

¹³kumna Ravkai khou khatni guangh kai khou naimei lanv guay Babilon thangc phungc tat kan the. Ravkai khou sin sw khang guangh Solomon rui kasiamhloumei kachaekc tuang tanvra guay tei RINGHPOUC rui dinc kasuakcloumei kumcna Nebukadnezar rui sw bak ngam kan the.

¹⁴Nebukadnezar rui Jerusalemmei nunc, guangh nac nunc, meicpy meicgav swmei guay, kapwmna meic 10,000 ta kangmei swna phungc tat khwan e. Kamei rui baanhthaymei nunc ta, maanv nunc ta ni kazauhna phungc tat khwan e, lungcsi-lungcroucmei nunc na ta ganclou khwan e.

¹⁵Nebukadnezar rui Jehoiakin ta, kapui, kanow nunc, katuang taanvpy phunghmei nunc, khatni Juda kandic khou kapy kaga swmei nunc kazauhna Babilon kandic thangc kangmei swna zay tat khwan the.

¹⁶Juda kandic tuang meicpy meicgav guay, kaguayna meic 7000, khatni baanhthaymei meic 1000 mi pang khou tei mhaanh nunc kazauhna, mi guayna tei kaniw pumpa gaymei rihphyan sw biuhmei nunc ta Babilon kandic thangc phungc tat khwan e.

¹⁷Nebukadnezar rui Jehoiakin pulauc Mattania ta Judamei guangc tiswlou khwan e kumna kazanc tei Zedekia twna kalaiclou khwan e.

¹⁸Zedekia katingkwm 21 khou Judamei guangc swna, Jerusalem khou tingkwm 11 guangh swlou khwan e. Kapui hei Libna kaidaimei Jeremia nac pui Hamutal khwan e.

¹⁹Guangh Jehoiakin rui taanc kanmei kahak tei kumcna guangh Zedekia ni RINGHPOUC ruc khou paapc taanc khwan e.

²⁰RINGHPOUC rui Jerusalem khatni Juda kandicmei nunc ta heidikamv kalungpuamcna kamei rui kaniw ta kamikzaw khou rui ganc pat khwan e.