Read Rongmei Naga 2 GUANGH NUNC 25 Bible Online

2 GUANGH NUNC 25 - Rongmei Naga bible

2 GUANGH NUNC 25

¹Zedekia rui Babilonmei guangc Nebukadnezar bangc khou bam lak khe twna athwng timei zaeng rui Nebukadnezar katuang ricmei nunc ta nduanghna Jerusalem ta adow khang Zedekia guanghtumei chakiumei kwm ruhmei bw khou zaeng ruhpui neic guang the. Kaniw rui kaidai paengc khou zypui kai kasiamhlouna kaidai tei dingbin the.

²Zedekia guanghtumei 11mei kwm nganv dingbin khwan e.

³Padeihmei bw tuang chakiumei tingmik nungc nap nkowmei rui mi kaidai lungc khou bammei guay khang tu zangv khang khat sini maek khe.

⁴Kaidai raengv tei sw bak pat the Babilonmei rui dingbinna bammei khou tei zingbangc thangc rihmei guay tei pakduak pat the. Kaniw guangh tuang pikwan chaeng biak pat lana raengh kanei sow alamvloumei bamv chaengmun khou tei rui pat datna Araba biak thangc tat the.

⁵Babilonmei ricmei nunc rui guangh Zedekia ta nthau keyna Jeriko daeng khou naimei nzaengc khou kata nym the, kumna katuang ricmei nunc rui kata ganclou kan the.

⁶Zedekia ta Ribla kaidai khou guangh Nebukadnezar daeng khou phungc guang the, khoutei Nebukadnezar rui karuc khou kalatdanv keylou the.

⁷Zedekia kamei zauc bam kahak khou kanac mpouh nunc ta tei swluai kan the; kumna Nebukadnezar rui Zedekia mik lat ganc lana kangriang ntana kata Babilon thangc phungc tat the.

⁸Nebukadnezar rui Babilonmei guangc swmei 19mei kwm tuang panguhmei bw zaeng chaneimei nungc guanghkai kumei khatni rihpy Nebuzaradan Jerusalem khou gut khwan the.

⁹Kamei rui Ravkai, guanghkai, khatni Jerusalem khou meicdaihmei nunc kai guay tei mailou khwan the,

¹⁰kumna katuang ricmei nunc rui kaidai raengv guay tei rakey khwan the.

¹¹Mi tangv tei mi kaidai khou tei nsaekcloumei nunc, nsaekcloumei baanhthaymei nunc khatni Babilonmei guangc khou paklou kanmei nunc ta tei Nebuzaradan rui Babilon thangc phungc tat the.

¹²Tiki lungcsi lungcroumei kakai kalau maekmei nunc ta tei drakhalau khatni lau taanhmei nunc khang ganclou duc the.

¹³Tanzinc tuang tiangdaic nei, Ravkai khou naimei gari guay, tanzinc duiduangc daihmei hei guay tei Babilonmei nunc rui sw bak paruat key lana tanzinc guay Babilon thangc phungc tat kan the.

¹⁴Ravchapaeng sw nthanmei tuang mbut suakkuak khatni mbut puanhkuak, thauhmai kasiamhmei tuang na guay, khaengmei zei nzuhmei kuak guay, khatni Ravkai lungc khou sin sw bammei tanzinc tuang puat guay tei kaniw rui phungc tat kan the.

¹⁵Daandi khatni kachaekc rui kasiamhmei puat guay, maithyn haenghmei puanc kalwmei tuang kuak lau launa guay, khatni ramh kuak guay ni phungc tat kan the.

¹⁶Guangh Solomon rui Ravkai khang kasiamhloumei tanzinc tuang puat guay tiangdaic kanei, gari khatni duiduangc daihmei tei nrit langvna karith nthau dat ngam mak khwan e.

¹⁷Tiangdaic kanei tei nchamh khwan e. Kanei tei chowbuk 18 kauh khwan e khatni katwan khou chowbuk kathumh kauhmei tanzinc pykhim lou khwan e. Mi pykhim khou tei tanzinc rui puc-heithai maengc kasiamhna kasiatc ngguic padiklou khwan e.

¹⁸Hei guay ruc khou tei rui, Nebuzaradan rui Tingkuh Seraia, kabangc khou bammei amuh Zephania, khatni baihmei Ravkai khou taanvpy phunghmei gaanv thumh ta lev twna kangmei swna phungc tat kan the.

¹⁹Jerusalem kaidai khou rui rihmei nunc kapy gaanv khat kaidai khou tei bam khwanmei guangh tuang peikai kumei gaanv panguh, rihmei nunc tuang chakh sinmeipu rihpy bangc khoumeipu, khatni baihmei meicpy meicgav gaanv 60 ta kamei rui Jerusalem kaidai khou rui phungc tat kan the.

²⁰Nebuzaradan rui kaniw ta Hamat ramv khou naimei Ribla khou Babilonmei guangc daeng khou phungc guang the.

²¹Khoutei guangh rui kaniw ta baina swluai the. Heikumna Judamei nunc ta kaniw kandic khou rui ginramc thangc phungc tat the.

²²Babilonmei guangh Nebukadnezar rui Ahikam nac mpouh, Shaphan tou Gedalia ta Judamei tuang dihsinpouc tiswlouna Babilon thangc phungc tat makmei nunc ta tei kabaanc khou nsinlou khwan e.

²³Gutlou makmei Judamei tuang meicdaihmei nunc khatni rihmei nunc rui mi chamv hei chu lana Mizpa kaidai khou guangna Gedalia khou guang the. Mi nunc kiu Nathania nac mpouh Ismael, Karea nac mpouh Johanan, Netopha kaidaimei Tanhumet nac mpouh Seraia, khatni Maakamei Jezania hei nunc hei e.

²⁴Gedalia rui kaniw khou sa the, “Babilonmei kapy nunc ta tei nangniw ping bam khang maek ge twmei hei nangniw khou alat swna samei tuang e. Babilon guangc bangc khou mi kandic khou hei lungc bam o, kum e thei ramhsw ramhdaeng lak ge.”

²⁵Tiki mi kwm tuang chaneimei bw khou, Nethania nac mpouh Elashama tou, guanghkai kaikhuncmei Ismael rui meic gaanv ruh ta nduanghna Mizpa khou guangna Gedalia ta swluai the. Gedalia daeng khou bammei Isaraelmei khatni Babilonmei guay ta ni kamei rui swluai the.

²⁶Khoutei Babilonmei nunc ta pingna lungcsi lungcgay Isaraelmei kapwmna rihpy nunc lev kazauhna Izip kandic thangc pak tat kan the.

²⁷Evilmerodak rui Babilonmei guangc swmei kwm kamei rui Judamei guangc Jehoiakin ta zauc nzianloumei lyanna kangkai khou rui mpat patlou dat khwan e. Hei tei Jehoiakin ta kangkai khou loumei tuang tingkwm 37mei tuang bw 12mei tuang zaeng 27mei nungc khwan e.

²⁸Evilmerodak rui kata heidikamv nzianna swlouna Babilon khou nym guanglou nchamcmei guangc nunc khang suangc kauh liangna kata chakhwang swlou khwan e.

²⁹Kumna Jehoiakin tei kang bammei pheybaan kalaicna kapanty saanvsaengh guangh lev tu nchamc zangv nchamcna lungc khwan e.

³⁰Kamei ringh saanv kakhang kage naimei khou piu khang tingmik pum syandui ni tii khwan e.