Read Rongmei Naga 2 GUANGH NUNC 3 Bible Online

2 GUANGH NUNC 3 - Rongmei Naga bible

2 GUANGH NUNC 3

¹Judamei guangc Jehoshaphat rui guangh swmei tuang 18mei kwm Ahab rui puanhmei Joram rui Isaraelmei guangc sw the, kumna kamei Isarael khou tingkwm 12 guangh swlou khwan e.

²Kamei ni RINGHPOUC hu khou paapc taanc khwan e, tiki kapu khatni kapui Jezebel kumcna changh thu si mak khwan e. Kalam thu kalum khang kapu rui sw thauloumei Baal ravmaengc ta kamei rui sw kasic khwan e.

³Kum khwan sini, kahu khou guangh swlou khwanmei Nebat rui puanhmei guangh Jeroboam kumcna, kamei rui ni Isaraelmei ta paapc khou taek makna zaylou bam khwan e.

⁴Moabmei guangc Mesa rui lauziu nruaihna Isaraelmei guangc khang tingkwm pum lauziunac khatni lauziu 1,00,000 tuang hiw kat bam khwan e.

⁵Isaraelmei guangc Ahab theihmei tangv, Moabmei guangc Mesa rui Isaraelmei ruc khou rih thau the.

⁶Kadyng na khou guangh Joram rui Samaria khou rui tat patna katuang ricphyan nunc ta khuam kaduai khwan the.

⁷Kamei rui Judamei guangc Jehoshaphat khou heikumna sa guang the: “Moabmei guangc rui abangc khou bam zihna rih thau the, kumna mipu ta tei adow khang nang ni kazauhlou o.” Guangh Jehoshaphat rui daw the, “Ai kazauh puni the. Ai lev amei nunc khatni takuanh guay hei nang khang chamvdaanvna bam the.

⁸Tabui chaeng rui aniw guang o twna cho?” “Edom tazikramv tat ruanmei nkuaymei chaeng tei guang o,” twna Joram rui daw the.

⁹Heikumna guangh Joram khatni Judamei lev Edommei guangc kaniw tei kaamc thau the. Kaniw tei zaeng chanei tatmei tangv, kaniw dui piu ngam the, kumna kaniw mei nunc khang ni, khouringh nunc khang ni dui khat na sini maek khe.

¹⁰“Mi hei tabui tuang cho! Aniu guangh gaanv thumh ti hei Moabmei baanc khou tiilou khang RINGHPOUC rui kaw kaduailoumei tuang dina cho?” twna Joram rui sa the.

¹¹Guangh Jehoshaphat rui “Aniu RINGHPOUC khou thanv khang muhzwng nai puni cho?” twna thanv the. Guangh Joram tuang ricmei nunc kapy akhat rui “Shaphat nac mpouh Elisha nai e. Kamei Elija ziap be,” twna daw the.

¹²“Kamei tei muhzwng ling e,” twna guangh Jehoshaphat rui sa the. Kumna mi guangh gaanv thumh tei Elisha daeng thangc tat the.

¹³“Tabui khang ai nangniw ta nkhavlou bam nina cho? Nangniw puipu nunc rui thanv bammei muhzwng nunc khou tei thanv tat tho,” twna Elisha rui Isaraelmei guangc khou tei sa the. Joram rui daw the, “Kiuc hamh e. RINGHPOUC rui aniw guangh gaanv thumh ti hei Moabmei baanc khou tiilou the.”

¹⁴Elisha rui daw the, “Ai rui kasiamruai swna bammei ringhmei Racguangc zanc saancna samei tuang e, ai rui Judamei guangc Jehoshaphat zaw zauh mak khwan e thei nang khou thu ramhkhat sini swlou khang maek ge.

¹⁵Nrah zay thaymei gaanv khat phungc guang o.” Nrah zaymei tei rui katuang nrah zay pwkhou, Elisha ruc khou RINGHPOUC tuang ngamv keylou the,

¹⁶kumna kamei rui sa the, “RINGHPOUC rui kumna sa e: ‘Mi dui maekmei duithuak khou hei khunh chaulou geic tho.

¹⁷Ting ni mpwan ni how mak sini, mi duithuak hei dui rui padik puni the, kumna nangniw, nangniw tuang guaic nunc, khatni puatc phunghmei khouringh nunc zangv khang geicna nai puni the,’ ”

¹⁸Elisha rui kumna sa key dat re, “Mi hei RINGHPOUC khang thu chalahmei taanv de; kamei rui nangniw ta Moabmei ruc khou ni rih tingamlou puni.

¹⁹Kaniw tuang gay kanmei raengh raengloumei kaidai guay tei nangniw laa puni; kaniw tuang tingthai bang guay tei nangniw rui dowbau key puni, kaniw tuang duikhunc guay tei thingclou puni, khatni kaniw tuang kandic gaymei laupuk guay tei ntauh rui khuan binlouna swmaanlou puni.”

²⁰Nthuanh thauna lauthwan khang Ravkhaeng taanv taanc bammei ganv khou Edom biak thangc rui dui luangc guang the, kumna kandih luangc lyam the.

²¹Guangc gaanv thumh rui kaniw ta adow khang guang the twmei Moabmei rui chu lana, buy-baeng sin thaymei nggaanvmei guay alauc khou rui gaanvthaih nganv kaw patna ramvrei khou nchwan the.

²²Nthuanh lauthwan kaniw zip thau pwki, dui ruc khoutei neih souclou pwkhou, dui tei zei kumcna haengc the.

²³“Hei tei zei di the! zauczihmei guangc gaanv thumh tei kaniw rana adowna theic ngam lana khwang di the! Aniu kaniw tuang zypui thangc tatna kaniw tuang puat laa di kho,” twna kaniw rui sa the.

²⁴Kaniw zypui tei guang tangc pwkhou, Isaraelmei rui kaniw ta alay pat the. Isaraelmei rui nthau patna Moabmei nunc ta tei dow luai the.

²⁵Khatni kaniw tuang kaidai guay tei sw kamut kamailou the. Kaniw rui kandih gaymei laupuk khou tat ruan pat pwkhou, Isaraelmei kathuicna rui mi khou tei ntauh khuanbinlouna hei tei ntauh rui padik the; kaniw rui duipuakkai guay sw thingc the khatni tingthai bang guay dowbau the. Nkhamh khou Kir Hares kaidai na kha ganclou duc the, kumna mi kaidai ta ni tauziuru sinmei nunc rui ding nkuayna nkwam the.

²⁶Moabmei guangc tei kaniw rih ngam mak khe twmei how pwkhou, kamei rui baengsaeng sinmei rihmei 700 ta nduanghna zauczihmei nunc bammei bamv khou tei rui kaanpatna Edommei guangc daeng thangc pak duak pat khang karamc the, tiki kamei hei tei ngam mak khwan the.

²⁷Heikumna kanac mpouh gaanvthaihmei, kaphaan lyn nimeipu ta kaidai raengc daeng khou Moabmei rav khang khaeng the. Kumtina Isaraelmei nunc tei mpeyna ping the kumna kaniw tei kabamv kabamv thangc hanc dat kan the.