Read Rongmei Naga 2 GUANGH NUNC 4 Bible Online

2 GUANGH NUNC 4 - Rongmei Naga bible

2 GUANGH NUNC 4

¹Muhzwng pang khou kazauhmei gaanv khat pu now rui Elisha daeng khou guangna sa the, “Akaipoucle, agaanv theic the! Nang rui thay bammei tei the, kamei hei Ravguangc ta pingmeipu e, tiki kamei rui syan pouloumeipu gaanv khat rui mi pow khang tei anac mpouh gaanv nei ta bangh khang laa ni the twna guang the.”

²“Ai rui tabui swlou o twna cho? Nang kai khou tabui tabui nai cho?” twna Elisha rui kakhou thanv the. Mipui tei rui daw the, “Olive thauc haan akhat na hamhna baihmei maek khe.”

³Elisha rui kakhou sa the, “Nang tuang kaining laugeimei khou rui laibung raeng nsuc pat diwmei kamv nsuc guanglou tho.

⁴Kumlana nang nac mpouh nei lev kainung khou kaikhamv mbanghlouna lai guay khou tei thauh tei bun pat thau tho. Padikh dikmei lai guay tei laa pat langclou tho.”

⁵Kumna mipui tei kanac nei tei lev kainung khou kaikhamv mbangh binlouna, kanac gaanv nei tei rui lai guay tei laaguang pwkhou kamei rui Olive thauc haan launa tei laana bunlou thau the.

⁶Kaniw rui laibung guay tei laic padiklou tang pwkhou, baihmei ni nai he cho twna kapui rui thanv the. “Hei tei rui nkhamhmei di the,” twna kanac gaanv khat rui daw the. Khoutei Olive thauc tei luangc nthaekc kan the.

⁷Kamei rui Elisha daeng khou guang dat pwkhou kakhou Elisha rui sa the, “Mi thauc tei zuanc lana pow tei khangc tho, kumna nang lev nang nac nei ni lungc biuh khang syandui nsaekclou puni.”

⁸Zaeng neih khat Elisha tei lungcgaymeipui gaanv khat lungc bammei Shunem kaidai khou guang khwan e. Mipui tei rui kata nap kaw khwan e, mi tangv tei rui thauna kamei Shunem khou guangmei kathuic mipui kai khou tei nap tu raph rap khwan e.

⁹Mipui tei rui kagaanv khou kumna sa the, “Khou hei katupcna guang bammeipu hei Ravguangcmei nthanmeipu e twmei nthanna thay e.

¹⁰Kumna kamei guangmei kathuic bangvlou bammei bamv khang kainam khou kailangv launa akhat kasiamh lana laeng akhat, thingpaeng akhat, bamvdung akhat, khatni maibungc akhat khou tei lou ti kho.”

¹¹Zaeng neih khat Elisha Shunem khou guangna nthaekc khang kakai thangc tei ku the.

¹²Mi kaibangvpeic ta tei kaw o twna Elisha rui kabangc Gehazi ta thouclou the. Mipui tei guang pwkhou,

¹³kamei rui Gehazi khou sa the, “Aney khang kage naimei guay kamei rui heikumna swloumei khang rui kakhang tabui tuang swlou pwtu laa nii bu cho twna kakhou thanv o. Ai rui guangh daeng thangc hamh e thei rihpy daeng thangc tatna kakhang kachucloumei ta kamei kahaw kho ni nuh e.” “Ai amei pang khou lungcna akhang kage naimei guay ntanghna nai de,” twna mipui tei rui daw the.

¹⁴“Kakhang ai tabui swlou ti kho twna cho?” twna Elisha rui Gehazi khou thanv the. Kamei rui daw the, “Ngguay, kamei kanac mpouh maek ge, kagaanv ni gaanvthaih di the.”

¹⁵“Kata khou hei guang o twna sa tio,” twna Elisha rui sa the. Mipui tei guangna kaimun khou ding bam the.

¹⁶Elisha rui kakhou sa the, “Nang nkun kiu hei kumhmei ganv khou nang nac mpouh gaanv khat nang pamv khou puanctow puni the.” “Aei! Kaipoucle, saraamhmei lat sa rio. Nang Ravguangcmei de!” twna mundaw the.

¹⁷Tiki Elisha rui saloumei kumcna tingkwm akhat guanh guangna mi kumhmei ganv khou tei kamei kanac mpouh gaanv khat puanc the.

¹⁸Tingkwm asaekc tangv, mi nac tei kapu rui meic nunc ta nduanghna lautay bammei bamv khou kazauh khang lauthwan akhat lau thangc tat the.

¹⁹Kadyng khou mi nac tei “Apy suc e! Apy suc e!” twna kapu khou kauc thau the. “Mi nac ta tei kapui daeng thangc puanc guang ti tho,” twna kapu rui kabangc gaanv khat khou sa the.

²⁰Banghpui tei rui mi nac ta tei kapui khou puanc guang tina, kapui rui kalaanv nganvna kapamv khou puancna zauc the, kumna mi khou tei rui mi nac tei theic kan the.

²¹Kamei rui mi nac ta tei Elisha bammei kainung khou puanc kulouna laeng khou nzilouna kaikhamv mbangh binlouna ganclou the.

²²Mi tangv tei kamei rui kagaanv ta kawna kakhou sa the, “Bangh gaanv khat ta kuanniam lev twna thouc guang o. Ai muhzwng Elisha daeng thangc tat khang nai e. Ngammei kamv ai katumcna guang dat puni e.”

²³Aseic hei bwthanh ni Sabbath ni hamh “Tabui zaeng rui kadaeng thangc tat nina cho” twna kamei rui sa the “Tabui bui bam kan diu” twna kanow rui daw the.

²⁴Khoutei kamei kuanniam ruc khou tei dungcna kabangc khou tei sa the, “Kuanniam ti hei katumc nuhmei kamv katumcna titat ro, ai rui sadat mak saanv nzaeng dat nuh mak ge.”

²⁵Kumna kamei kaamc thauna Karmel Chyng khou Elisha daeng khou guang the. Mipui tei guangmei tei Elisha rui duc sih thangc rui how the, kumna kamei rui kabangc pu Gehazi khou sa the, “Zauc lo, Sunemmeipui tei guang e!

²⁶Katumcna kadaeng thangc tei tatna kamei ny, kagaanv ny, kanac ny ramh suaimei tuang nai lana ny thanv zauc o.” Ramh suaimei tuang maek ge twna mi pui tei rui Gehazi khou thu daw the,

²⁷tiki kamei Elisha daeng khou guang pwkhou, kamei Elisha hu khou nkhum keyna kaphaypav sin the. Gehazi rui kata thui pat khang sw pwkhou, Elisha rui sa the, “Kata ganclou tio. Kamei kalung ryanra sih bammei hei how makna cho? Mi lam khou hei RINGHPOUC rui thu akhou ramhkhat na sini salou mak ge.”

²⁸Mipui tei rui kakhou sa the, “Kaipoucle, akhang nah mpouh tiilou o twna ai ney bu cho? Ata guat nangh e twna ai sa kan makna cho?”

²⁹Elisha rui Gehazi khou karih patna sa the, “Katumc tho! Atuang builwang sinna tat tho. chaeng khou meic ariw sini kachuc riu, thow kumhmei rui kachuc puni kachuc daw riu. Mi kai thangc kiu nzutphutna tatna mi nac zaw ruc khou tei mbaenglou ti tho.”

³⁰Mipui tei rui sa the, “RINGHPOUC zanc khatni nang zanc saancna samei tuang e— ai nang ta mpatlou lak ge!” Kumna kaney tei tat the.

³¹Gehazi rui tat hu guangna Elisha tuang builwang mi nac ruc khou tei zay thaulou the, tiki kakhwan ni chu mak ge, khatni ringhmei tuang lwn ni ramhkhat na sini maek ge. Kum tina kamei Elisha ta pat ariw datna “Mi nac tei thau dat mak ge,” twna poulou the.

³²Elisha tei guang tangcna, karana kainung khou tei gut pwki mi nac tei theicna laeng khou zip bam khwan the.

³³Kamei rui kaikhamv mbanghlouna RINGHPOUC khou huayney the.

³⁴Khoutei kamei kamwang, kamik khatni kabaanc tei mi nac mwang, kamik khatni kabaanc kaanv khou charap twna mi nac ruc khou tei zip key the. Kamei rui mi nac ruc khou tei heikumna zip key pwkhou mi nac pumc tei lumc thau dat the.

³⁵Elisha tei thau dat lana, kainung lungc khou tei nkuay kanak lana, guang datna mi nac ruc khou tei zip key dat the. Mi nac tei nthei liang chaneilou lana kamik rak pat the.

³⁶Elisha rui Gehazi ta kaw guangna kapui ta kaw o twna thouclou the. Kapui tei gut pwkhou Elisha rui sa the, “Nang nac mpouh ringc dat the.”

³⁷Mipui tei kazaw kandih khou sow nkhum khuakh khuakna Elisha phaypav khou kalum the; kumna kamei rui kanac ta tei laa dat lana tat pat kan the.

³⁸Kaganv akhat khou, mi kandic kapwm khou nap nkow khwan the, mi ganv khou tei Elisha Gilgal khou guang dat khwan e. Kamei rui muhzwng kang akhat ta nchamlouna bam khou, kamei rui kabangc gaanv khat ta lai daihmei akhat mai ruc khou zay thaulouna kaniw khang gan suangc o twna sa the.

³⁹Kaniw pang khou gaanv khat rui gannwang asaekc dunh khang laupuk thangc pat the. Kamei khou tei nwmbangc tuang tumei muluai ariw the, kumna kamei rui phungc diw saanv kathai tei rei the. Kamei rui hei tei laaguangna, tabui cho twmei thay makna louh khang lim pat the.

⁴⁰Hei tei tu khang bun patlou pwkhou, kaniw tei mbapclouna Elisha khou “Mi khou hei ramh khay nai the!” twna sa the. Hei tei tu mak khe.

⁴¹Elisha rui ntyan buay asaekc laaguang o twna sa tina laaguang pwkhou hei tei lai khou tei phaiclou lana sa the, “Kaniw khang tei hei tei asaekc laa pat dat ti tho.” Mi tangv tei mi khou tei ramh simei tuang nai dat mak khe.

⁴²Kaganv baihmei akhat khou, Baal Shalisa khou rui meic gaanv khat mi kwm tuang tay rey liangmei ntyan dwm 20 khatni napguy chunc pat rapmei asaekc phungcna Elisha daeng khou guang the. Hei tei rui mi muhzwng guayna khang tei ti tu tho twna Elisha rui kabangc khou sa the.

⁴³Khoutei mi pu tei rui “Mi hei meic 100 tu biuc puni dina cho?” twna mundaw the. Elisha rui daw the, “Hei tei titu rap bo, kaniw tu ngam makna nsaekclou puni de twna RINGHPOUC rui sa e.”

⁴⁴Kumna banghpu tei rui kaniw ta titu the, kumna RINGHPOUC rui saloumei kumcna kaniw tu tangmei tangv asaekc nsaekclou the.