Read Rongmei Naga 2 GUANGH NUNC 5 Bible Online

2 GUANGH NUNC 5 - Rongmei Naga bible

2 GUANGH NUNC 5

¹Siriamei tuang rihpy Naaman ta Siriamei guangc rui ning nthuk sihna chakhwang swna bam khwan e, kalam thu Naaman paan rui RINGHPOUC rui Siriamei tuang ricmei nunc khou rih ngammei tiilou khwan e. Kamei hei rihpy daihmei akhat khwan e tiki mphaanhmei ravpuat nai khwan e.

²Siriamei rui Isarael ruc khou rih keymei luan akhat khou Isaraelmei tunacpui launa gaanv khat ta nym guangna mipui tei Naaman now bangc sw bam khwan e.

³Zaeng neih khat thu mipui tei rui kakaipeic khou sa the, “Akaipouc hei Samaria khou bammei muhzwng akhat ta ariw tat la thei gay ni e twna ning e! Katuang ravpuat hei tigaylou puni de.”

⁴Naaman tei hei tei chu lana, kamei guangh daeng khou tatna mi tunacpui rui samei tei guangh khou salou the.

⁵Guangh tei rui sa the, “Isaraelmei guangc daeng thangc tatna mi tatdyn hei tiilou ti tho.” Naaman tei daandi paek 30,000, kachaekc paek 6000 khatni phey gaymei kalai ruh phungc lana tat thau the.

⁶Guangh tuang tatdyn khou tei heikumna hylou khwan e: “Mi tatdyn hei hyna abangc Naaman ta tigaylou diu khang ai rui nang khou kata thouc guangmei tuang e.”

⁷Isaraelmei guangc rui tatdyn tei pac pwkhou kalung puamcna kaphey siatkaekna sa the, “Mipu ta tabui zaeng rui ai rui tigaylou diu khang akhou sa bam tu cho? Ai hei maansei ta titheic tiringc ngammei Ravguangc e twna kamei ningna cho? Kamei ata agay khaengc bam de twmei ai thay e!”

⁸Mi pat kanmei lam tei Elisha rui chu pwkhou, kamei rui guangh khou sa the: “Tabui swna nang lung heidi puamc bam tu cho? Kata kiuc adaeng khou thouc guang o, Isaraelmei khou muhzwng nai e twmei ai kakhou lyanlou puni!”

⁹Kumna Naaman tei katuang takuanc nunc khatni takuanh gari tei phungc lana Elisha kai kaimun khou guang nthaekclou the.

¹⁰Khoutei kamei Jordan thangc tatna lup liang chanei e thei katuang ravpuat kuak nthan thiak puni twna sa tio twna Elisha rui kabangc gaanv khat ta thouc the.

¹¹Khoutei “Kamei rui patna kazam kazei khou tei kathupcna huayneylouna tigaylou puni ny tiki

¹²Isaraelmei duithuak suangc sini gaymei Abana khatni Pharpar duithuak Damaskas khou nai tu hamhna cho? Khoutei sini khiuna gay dat diw ki!” twna kalungpuamcna salouna tat kan the.

¹³Kabangc nunc rui kakhou guangna sa the, “Kaipoucle, taanh khang kungc maih sini muhzwng rui taanc o tw e thei taanc nina de. Kamei rui samei kiu kumna lup rapna gay dat dam bu cho?”

¹⁴Khoutei Naaman tei Jordan duithuak khou keyna Elisha rui samei kumcna lup liang chanei the kumna kamei gay nthan thiak the. Kumna kagic tei gay nthan thiakh thiakna alaucna zanc kumc pat dat the.

¹⁵Naaman rui kamei nunc ta nduanghna Elisha khou guang datna sa the, “Isarael tuang Racguangc hamhna rav baihmei maek ge twmei ntaw ai thay the; kumhpui zaeng rui, kaipoucle, atuang kaipat hei laalou o.”

¹⁶Elisha rui daw the, “Ai kasiamruai swna bammei ringc bammei RINGHPOUC zanc khou rui samei tuang e, ai kaipat laa lak ge.” Laalou o twna Naaman rui sa ranvna sa the, tiki kamei laa mak khe.

¹⁷Kumna Naaman rui sa the, “Nang rui atuang kaipat laa lak ge thei, taniang kuanniam kanei puat akai thangc phungc tat ni the, kalam thu ntaw khou rui thauna RINGHPOUC khou hamhna rav baihmei khou khaeng dat lak khe.

¹⁸Ai rui guangh thei lay tatna Siriamei rav Rimmon kai khou tatna kalum pwsini RINGHPOUC rui ata kuaklou pw diu o. RINGHPOUC rui kuaklou rap puni de twmei ai lwm e.”

¹⁹“Gayna tat tho,” twna Elisha rui sa the. Kumna Naaman tei tat kan the. Mipu tei asaanh tat pat makmei dak khou,

²⁰Elisha bangc Gehazi rui kumna kakhanh the, “Akaipouc rui ramhkhat na sini laa makna Naaman ta mpatlou kan the! Siriameipu rui tiimei tei kamei laa nimei tuang de. Ravguangc zanc khou rui ai kata pakna nzwan lana kakhou rui ramh asaekc laa ni the.”

²¹Kumna kamei rui Naaman ta nthau tat the. Kata nthau keymei tei Naaman rui how lana kamei rui katuang takuanc gari khou rui kachak keyna “Ramh suaimei tuang naina cho?” twna thanv the.

²²Gehazi rui daw the, “Hei kumhmei tuang maek ge. Tiki, ntaw Ephraim tuang chyngramv thangc rui muhzwng gaanv nei guangna mi nei khang tei daandi paek 3000 khatni phey gaymei kalai kanei twna tiilou niina bam e twna nang khou sa o twna akaipouc rui thouclou pwna keymei tuang e.”

²³“Daandi paek 6000 hei laalou tho,” twna Naaman rui mundaw the. Kamei rui laa o twna sa ranvna sa the, kumna daandi tei khau kanei khou tinclouna phey gaymei kalai kanei lev twna kabangc gaanv nei khou tii the, kumna mi nei ta tei Gehazi hu khou titatlou the.

²⁴Elisha bammei chyngbut tei kamei guang tangc pwkhou Gehazi rui mi khau kanei tei laana kainung thangc zay gut kan the. Kumna kamei rui Naaman bangc nei ta tei thouc hanc dat kan the.

²⁵Kamei kainung khou gut bam khou Elisha rui kakhou “Nang tabui thangc tat lana cho?” twna thanv the. “Ai ramh thangc tat mak ge,” twna kamei rui daw the.

²⁶Khoutei Elisha rui sa the, “Meic gaanv khat pu katuang takuanc gari khou rui key lana nang ta ariwmei ganv khou tei abumaengc nang lev bam tu hamhna cho? Ntaw hei syan ni, pheybaan ni, Olive lau ni, drakhalau ni, lauziu ni, guaih ni, bangh ni laamei ganv dina cho?

²⁷Naaman tuang ravpuat tei nang khou guanglou puni the, kumna nang ni nang kikta guay ni hei tei tingsaengzaeng nai puni the!” Gehazi tei tat pat pwkhou, mi ravpuat tei kakhou guanglou the — kagic tei gunh kumcna mphwan the.