Read Rongmei Naga 2 GUANGH NUNC 6 Bible Online

2 GUANGH NUNC 6 - Rongmei Naga bible

2 GUANGH NUNC 6

¹Elisha bangc khou bammei muhzwng kang akhat zaeng neih khat kakhou guangna sa the, “Aniw bammei bamv tei nthyam langv khe!

²Aniw bamv kasiamh khang Jordan thangc thing dow tat khang nuhlou o.” “Gay the, tat tho,” twna Elisha rui daw the.

³Kaniw ta kamei rui nduangh tat khang kaniw pang khou gaanv khat rui sa the, kum tina kamei rui nuhlouna

⁴kaniw lev tat nchamc the. Jordan duithuak key tangcna kaniw taanvtaanc thau the.

⁵Gaanv khat pu thing gaibau key pwkhou katuang nrih saam duilungc khou key kan the. “Kaipoucle, tabui sw khona cho? Hei tei nsuhmei tuang nrih the!” twna Elisha khou sa the.

⁶“Tabui kaanv khou keylou kanna cho?” twna Elisha rui thanv the. Mipu tei rui kabamv tei dinclou pwkhou, Elisha rui thingchiang akhat katapc lana dui khou tei phaic keylou pwkhou nrih saam tei dui khou phuangc thau the.

⁷“Laa tho” twna Elisha rui kauc pat pwkhou mipu tei nkhum keyna hei tei khuaic thau the.

⁸Siriamei guangc tei Isaraelmei lev rih adow bam khwan e. Kamei rui katuang meicdaihmei nunc lev kaphianhna katuang ricmei zypui kasiamh the.

⁹Mi bamv daeng khou tei guang ana riu, Siriamei nunc khou tei nchwan bam the twna Ravguangcmei Elisha rui Isaraelmei guangc khou tithay the.

¹⁰Kum tina mi bamv daeng khou bammei Isaraelmei nunc khou tei ramh thay tho twna guangh rui tithay tina kaniw tei rigaanvna bam the. Mi kumhmei tei katupc sihna pat bam khwan e.

¹¹Siriamei guangc hei khou tei kalungpuamc the, kumna kamei rui katuang meicdaihmei nunc ta kaw guang kaduaina kaniw pang khou thow Isaraelmei guangc biak lianghmei nai lana cho twna kaniw khou thanv the.

¹²Gaanv khat rui daw the, “Akaipouc Guanghle, hei kumhmei gaanv khat na sini maek ge. Nang rui kainung khou nkamhna samei lat tei sini muhzwng Elisha rui Isaraelmei guangc khou poulou bammei tuang de.”

¹³“Kamei tabui khou bam cho phu pat ro, ai kata kiuc nym puni,” twna guangh rui latdanv pat the. Elisha tei Dothan khou bam the twmei kakhou salou tina,

¹⁴kamei rui rihmei kangdai takuanh gari mpeyna kazauhna hei thangc tei thouclou the. Kaniw zingbangc mi kaidai tei guang tangc the kumna hei tei ding bin the.

¹⁵Lauthwan Elisha bangcpu tei zip thauna kaizaengc pat pwki Siriamei tuang ricmei nunc takuanh khatni takuanh gari pang kazauhna kaidai tei ding bin bammei ta how the. Kamei rui Elisha daeng khou gut dat lana “Kaipoucle, aniu hei theic puni the! Tabui tuang sw khona cho?” twna kaluangna sa the.

¹⁶Elisha rui sa the, “Ping riu, kaniw biak thangc khang suangc anei biak thangc meic geic de.”

¹⁷Khoutei “He RINGHPOUC, kamik tiraklouna kakhou lyanlou tio!” twna Elisha rui huayney the. RINGHPOUC rui mi ravsuai tei dawlouna Elisha bangcpu tei zauc thau pwki luangh ngaengv guay tei mai tuang takuanh khatni takuanh gari rui Elisha daeng bam nkuayna bammei ta how the.

¹⁸Siriamei nunc rui adow thau pwkhou “He RINGHPOUC, mi nunc mik hei kathamv tiatlou o,” twna Elisha rui huayney the. RINGHPOUC rui karavsuai dawlouna kaniw mik kathamv tiatlou ngam the.

¹⁹Khoutei Elisha rui kaniw daeng khou guangna sa the, “Nangniw chaeng tat maanv the. Nangniw rui phu bammei kaidai tei mi hei hamh e. Athei lay o, nangniw rui phu bammeipu bamv khou kiu ai rui nduanghlou puni.” Kumna kamei rui kaniw ta Samaria khou nduanghlou the.

²⁰Mi kaidai khou tei gut rappui lev “RINGHPOUC, kaniw mik tiraklouna tihowlou dat ti tho,” twna Elisha rui huayney the. Katuang ravsuai RINGHPOUC rui dawlouna, kaniw mik tihowlou dat tina kaniw tei Samaria lungc khou bam the twmei how the.

²¹Isaraelmei guangc rui Siriamei nunc ta how pwkhou “Kaipoucle, kaniw ta swluai kho ny swluai nangh e cho?” twna Elisha khou sa the.

²²Elisha rui daw the, “Swluai nuh mak ge, nangniw rui adowna nym guangmei rihmei gaanv khat na ta sini swluai nuh mak ge. Kaniw ta titu tizangvlouna kaniw ta kaniw guangc daeng thangc thouc hanclou dat tio.”

²³Kumna Isaraelmei guangc ruina kaniw khang kic nii saanv kiclouna kaniw ta Siriamei guangc daeng thangc thouc hanclou dat the. Mi khou tei rui thauna Siriamei Isaraelmei ruc khou rih key dat taan the.

²⁴Kanakc datmei tangv Siriamei guangc Benhadad rui katuang ricmei kapwmna ta nduanghna Isaraelmei ruc khou rih keyna Samaria kaidai ta dingbin the.

²⁵Kaidai tei kumna dingbin bam saengc timei zaeng rui mi kaidai lungc khou tu zangv khang maekmei tei heidikamv sina kuanniam py akhat khou daandi paek 80 khatni akhouhna bav gram 200 khou daandi pak panguh tii the.

²⁶Isaraelmei guangc tei kaidai raengh ruc khou tatna bam khou ntumei gaanv khat rui “Guanghle, nkhavlou o!” twna kauc khwan e.

²⁷Guangh tei rui daw the, “RINGHPOUC rui nkhavlou mak ge thei tabui ai rui nkhavlou ngam nina cho? Akhou nap zouh naina cho?

²⁸Nang khang kiu tabui ryanramei tuang nai thena cho?” Mipui tei rui mundaw the, “Neih khat nungc tei mipui hei rui anac ta tu rey di kho kumna nthuanh rui kanac ta tu dat di kho twna sa the.

²⁹Kumna aney anac mpouh ta suangc tu the. Kumna nthuanh thau datna kanac ta ni tu dat di kho twna sa tiki kamei rui kanac ta nkamh kan the!”

³⁰Hei tei chuna guangh tei kalung kabiuna kapheybaan siatkaek the, kumna kaphey lungc khou zaengsiphey piu bam e twmei raengh daeng khou bammei nunc tei rui how kan the.

³¹“Aseic neih key mak khou ai rui Shaphat nac mpouh Elisha py dangv mak khwan e thei Ravguangc rui ata bailuai kan di tho,” twna kamei rui sa the.

³²Elisha ta phungc guang khang latdiumei thouclou kan the. Mi ganv khou tei gaanvthaih gaanvsaekc Elisha daeng khou tarai guang bam khwan e. Guangh latdiumeipu tei guang makmei hu khou Elisha rui gaanvthaih nunc khou tei sa the, “Ata swluai khang mi meicdowmeipu tei rui meic thouc guang the! Mipu tei mi khou hei guang tangc pw e thei, kaikhamv mbangh o, kata tigut riu. Guangh kamei kahak kathei khou guang puni.”

³³Kamei hei tei sa tang ny sa tang mak ny tu khou guangh tei guang tangcna sa the, “Aniu ruc khou hei kumhmei ryanramei tiguang bammei hei RINGHPOUC rui de! Tabui swna aniu RINGHPOUC maan phaengc bam ni hena cho?”