Read Rongmei Naga 2 GUANGH NUNC 7 Bible Online

2 GUANGH NUNC 7 - Rongmei Naga bible

2 GUANGH NUNC 7

¹Elisha rui daw the, “RINGHPOUC rui samei tei nking o! Nthuanh kiu hei kumhmei ganv khou hei daandi paek akhat khang Samaria khou ntyan buay kilogram kathumh hamh e thei sipian kilogram charuk liubow puni the.”

²Guangh daeng byanmeipu rui Ravguangcmei Elisha khou sa the, “RINGHPOUC kamei rui kadyng khou na tingriu kumc taektw tii key bam sini hei tei guang tangc ni tuang hamh e!” “Nangmik rui thu mi ta tei how puni, tiki nang hei tei tutow ni tuang hamh the,” twna Elisha rui sa the.

³Samaria raengh paengc khou bammei mphaanhmei gaanv padeih rui kaniw khat khat khou sa the, “Tabui swna aniu theih mak saanv khou hei nkhwan bam nina cho?

⁴Kaidai lungc khou tei gut bam datna ni nsa di the, hei khou tei ndaapcna theih khang di the; khou hei bam ni theic puni di the. Heikumna Siriamei zypui thangc tei tat rap di kho, kaniw rui aniu ta sw kasic ni twna sw kasic nganv khang kiu swluai khang na de cho, tiki kaniw rui aniu ta swluai mak nuh de.”

⁵Kumna zingc kamv ramh ram key pwkhou, kaniw tei Siriamei rihmei zypui thangc tat the. Kaniw khou tei guang tangc pwkhou, hei khou tei meic gaanv khat na sini bam mak khwan the.

⁶Rihmei kangdai, takuanh khatni takuanh gari pang kazauhna guangmei khwan kumcna RINGHPOUC rui Siriamei nunc ta tichulou the. Isaraelmei guangc rui Hittimei khatni Izipmei guangc zaeng laana kaney tuang ricmei nunc rui guangna adowmei tuang khwang di the twna kaniw ning the.

⁷Heikumna tingzyn Siriamei nunc tei kaniw tuang pheykai guay, takuanh nunc, kuanniam nunc, khatni kaniw tuang zypuikai tei kalwnlung ganclou duc lana pak kan the.

⁸Kaniw gaanv padeih tei zypui tin khou tei guang tangc pwkhou pheykai akhat lungc khou gutna hei khou tei naimei guay tei tu the khatni zangv the. Hei khou tei naimei daandi, kachaekc, khatni pheybaan guay tei laa patna nkamhlou the. Kumna guang datna pheykai akhat khou ni gut datna hei tei kumcna laa dat muay the.

⁹Tiki kaniw khat khat khou kumna sa the, “Aniu heikumna sw lak nina de. Aniu khang chamv gaymei naina aniu khou na rylou bam lak nina de. Aniu rui tinggaanhmei ta nkhwanna bam ti thei aniu ta dandi tii puni the. Aniu katumcna tatna guangh tuang meicdaihmei nunc khou salou di kho!”

¹⁰Kumna kaniw tei Siriamei tuang zypui tei ganclouna Samaria kaidai khou guangna raenghmun rigaanvmei nunc khou sa the: “Aniw Siriamei tuang zypui khou gut the. Hei khou tei meic gaanv khat na sini how mak khe, meic khwan ni chu mak khe. Takuanh nunc khatni kuanniam nunc tei riclou mak khe, khatni kaniw tuang pheykai guay tei kaniw rui gancloumei lwnlung tei heikumna nai bam the.”

¹¹Rigaanv nunc tei rui mi chamv tei sa pat the, kumna mi chamv tei guangh khou poulou the.

¹²Hei tei zingbangc di he tiki guangh tei kalaeng khou rui zip thauna katuang meicdaihmei nunc khou tei sa the, “Siriamei rui sw bammei rouc tei ai rui nangniw khou salou puni e! Mi khou hei aniu tu zangv khang maek khe twmei thay lana kaniw tuang zypui tei ganclouna kapaengc kazaengc thangc nkamh tat kanmei tuang di the. Aniu tu zangv khang kaidai tei ganclouna phu tat kan puni the kum pwkhou aniu ta kaniw rui nringh nym ni the kumna mi kaidai hei laa ni the twna kaniw ning lana di the.”

¹³Katuang meicdaihmei gaanv khat rui sa the, “Tabui bui pwni mi kaidai khou bammei guay hei theic ngam puni the, theic tangmei nunc kumhmei tuang di the. Pat bammei kiu tabui kumhmei tuang sih cho twmei thay khang nai bammei takuanh panguh lev twna meic gaanvsaekc hei thangc kiu thouclou zauc di kho.”

¹⁴Siriamei rihmei nunc kiu tabui sw lana cho zauc tat ro twna kaniw rui meic gaanvsaekc kadah lana guangh rui kaniw ta kiuc takuanh gari kanei lev twna thouclou the.

¹⁵Kaniw tei Jordan duithuak nganvna key tangc the, kumna kaniw pheybaan khatni rih nanu guay chaengdaeng chaengdaeng khou nzunh suak keymei tei how the. Kaniw rui guang datna hei tei guangh khou tei poulou the.

¹⁶Samariamei nunc tei kaidai khou tei rui pak patna Siriamei tuang zypui khou naimei puat guay tei laa the. RINGHPOUC rui saloumei kumcna daandi paek akhat khang gehu gaymei kilogram kathumh khatni sipian kilogram charuk laabow the.

¹⁷Isaraelmei guangc rui kadaeng byanmei rihpy akhat ta kaidai raengcmun rigaanvmei nunc tuang kapy tiswlou the. Mi ricpy ta tei meic nunc rui niibinna Ravguangcmei Elisha rui sa kasuakcloumei kumcna guangh rui kata guang zauc pwkhou theic bam khwan the.

¹⁸Ravguangcmei Elisha rui guangh khou nthuanh hei kumhmei ganv khou daandi paek akhat khang gehu gaymei Samaria raengc khou tei kilogram kathumh khatni sipian kilogram charuk laatow puni twna sa ti khou

¹⁹“RINGHPOUC rui kadyng na khou ting tiriu key bam sini heikum bam zat ni tuang hamh e” twna sa tina “Nang hei tei how puni tiki hei tei tutow ni tuang hamh e,” twna Elisha rui salou kanmeipu tei e.

²⁰Hei tei kahak karuc khou pat kan the kaidai raengckat khou tei meic nunc rui kata nii luai kan the.