Read Rongmei Naga 2 GUANGH NUNC 8 Bible Online

2 GUANGH NUNC 8 - Rongmei Naga bible

2 GUANGH NUNC 8

¹Sunemmeipui, kanac mpouh ta Elisha kamei rui theihmei khou rui tiringc thaulou datmeipui khou tei RINGHPOUC rui mi kandic khou tei tingkwm chanei nap nkowmei tiguang puni kumhpui zaeng rui mi bamv tei ganclouna kabamv baih thangc tat kanak go twna dinclou khwan e.

²Mipui tei Elisha lat laana kakai kaikhunc phungcna Philistin kandic thangc tingkwm chanei lungc tat the.

³Tingkwm chanei tangv tei, kamei Isarael khou guang datna kakai khatni kalaupuk tei tiilou dat khang guangh khou ney khang guang khwan e.

⁴Mi ganv khou tei guangh tei Elisha bangc Gehazi lev pary rac bam khwan e; guangh tei Elisha rui taanc kanmei charynmei taanv guay ta thay niina kathai bam khwan e.

⁵Gehazi rui guangh khou Elisha rui theihmei khou rui tiringc thaulou datmei lam tei rac bam khou, mipui tei rui guangh khou tei guangna kamei rui sa niimei lat tei sa the. Gehazi rui guangh khou sa the, “Guanghle, Elisha rui kanac ta tiringc thaulou datmei khatni ringc thau datmei nac pui kiu mi kai puinav nei hei the!”

⁶Guangh tuang latthanv tei dawna Gehazi rui rac bammei tei kalingmei pary the twna mipui tei rui mundawlou the. Kumna guangh rui katuang meicdaihmeipu ta kawna mipui khang tei katuang kaguayna khatni tat kanmei tingkwm chanei lungc khou kalaupuk khou rui taancpat kanmei zu tei hanclou dat ti tho twna sa the.

⁷Siriamei guangc Benhadad nnauna bammei ganv khou Elisha Damaskas khou guang the. Ravguangcmei Elisha mi khou tei bam e twmei guangh khou tei salou tina

⁸guangh rui katuang meicdaihmei Hazael khou sa the, “Muhzwng khang tei kaipat phungc guangna ai gay dat puni di ny gay dat lak cho twmei RINGHPOUC khou thanvlou o twna sa zauc o.”

⁹Kumna Damaskas khou rui taanc patmei tuang gay liang liangmei phunling zaat guay, guaikuan 40 puat sw lana Elisha daeng khou guang the. Hazael rui Elisha ta ariwna sa the, “Nang bangc guangh Benhadad tei kamei nnau bammei khou rui gay dat puni di ny gay dat lak cho twmei thanv o twna ata thouc guangmei tuang e.”

¹⁰Elisha rui daw the, “Kamei theic puni the twna RINGHPOUC rui akhou lyanlou the; tiki nang thu guangna gay dat puni de twna sa tio.”

¹¹Hazael tei zak mak saanv Elisha rui zauc mangh mangna zauc the. Elisha tei kamikdui key the.

¹²“Kaipoucle, tabui swna nang kap tu cho?” twna Hazael rui thanv the. Elisha rui daw the, “Nang rui Isaraelmei nunc ruc khou meic zaucbauh makmei taanv taanc pw nimei zaeng rui kap tuang e. Nang rui Isaraelmei tuang ricmei nunc bamv guay tei mailou puni the, kaniw tuang chabwan guay ta swluai puni the, kaniw nac nunc ta dap tiath tiat key puni the khatni nah phunghmeipui nunc bung raek puni the.”

¹³“Akumhna hei kumhmei ngamv tei akhou naina cho? Ai thu ramhkhat na sini hamh e!” twna Hazael rui mundaw the. “Nang hei Siriamei guangc sw puni the twna RINGHPOUC rui akhou lyanlou the,” twna Elisha rui sa the.

¹⁴Hazael rui Benhadad daeng khou guang dat pwkhou “Elisha rui tabui kumhna sa bu cho?” twna guangh tei rui thanv the. “Nang gay dat puni de twna sa the,” twna Hazael rui daw the.

¹⁵Tiki nthuanh thauna pheypuangh laana hei tei dui ntin lana guangh khou gwambinna swluai the. Kumna Hazael rui Benhadad phaan Siriamei guangc sw the.

¹⁶Ahab rui puanhmei Joram rui Isaraelmei guangc swmei tuang tingkwm panguhmei kwm, Jehoshaphat rui puanhmei Jehoram Judamei guangc sw the.

¹⁷Kamei katingkwm 32 khou guangh swna Jerusalem khou tingkwm tachat guangh swna lungclou khwan e.

¹⁸Kanow tei Ahab nac aluhpui e, heikumna Ahab kai kaikhunc kumcna Isaraelmei guangc nunc tuang simei chaeng khou kamei ni tat muay the. Kamei RINGHPOUC ruc khou paapc taanc the,

¹⁹tiki RINGHPOUC rui Juda ta swmaan nii mak ge, kalam thu kamei rui kabangc David khou kakikta rui Jerusalem khou guangh swna bam puni twna latdyng swlou khwan e.

²⁰Jehoram kin khou Edommei rui Judamei bangc khou bam lak ge twna rih thauna nyngswmei guanghdic sw kan the.

²¹Kumna Jehoram katuang takuanh gari guay phungcna Zair kaidai khou guang bam khou Edommei ricmei nunc rui kaniw ta dingbin the. Zingbangc thangc kamei khatni katuang takuan gari tuang ricpy nunc duakpat the, kumna katuang ricmei nunc kakai kakai thangc pak duak tat kan the.

²²Khoutei rui thauna Edommei hei Juda khou rih key kan the. Mi ganv kahak khou tei Libna kaidai rui ni nyngsw kan ni the twna rih thau khwan the.

²³Jehoram rui taancloumei baih baihmei guay tei Juda tuang guangc nunc Chakh buk khou hylou the.

²⁴Jehoram tei theic the kumna David kaidai khou guangh nunc tarou khou mbeihlou the. Kanac mpouh Ahazia rui kaphaan guanghtu lyn the.

²⁵Ahab rui puanhmei Joram rui Isaraelmei guangc swmei tuang 12mei kwm, Jehoram rui puanhmei Ahazia rui Judamei guangc sw the.

²⁶Katingkwm 22 khou kamei guangh swna Jerusalem khou tingkwm akhat lungclou khwan e. Kapui rui guangh Ahab nac khatni Isaraelmei guangc Omri tou Athalia e.

²⁷Nownah riang khou rui Ahazia tei guangh Ahab zeiriang nai lapui zaeng rui Ahab kai kaikhunc kumcna kamei ni RINGHPOUC ruc khou paapc taanc the.

²⁸Isaraelmei guangc Joram rui Siriamei guangc Hazael ta rih adow khou guangh Ahazia ni Joram thei lay kazauhlou the. Mi rihmei nunc tei Gilead tuang Ramot khou rih adow the, kumna Joram tei nzamh the.

²⁹Kazam tei gay dat khang kamei Jezreel kaidai khou hanc guang dat the. Khoutei Ahazia rui kata guang zauc khwan e.