Read Rongmei Naga 2 GUANGH NUNC 9 Bible Online

2 GUANGH NUNC 9 - Rongmei Naga bible

2 GUANGH NUNC 9

¹Hei kumc bammei ganv khou tei muhzwng nggaanvnac akhat ta Elisha rui kawna sa the, “Nang chamdaanv lana Gilead khou naimei Ramot khou tat tho. Mi Olive thauc haan hei phungcna tat tho.

²Hei khou tei guang tangc pwkhou Jehoshaphat nac mpouh, Nimshi tou Jehu ta phu tho. Kata tei kapammei pang khou rui kainung akhat khou kaw langc patna

³kapy khou mi Olive thauc hei teylouna kumna sa tho, ‘RINGHPOUC rui nang ta Isaraelmei guangc khang thauh teylou the.’ Kumlou kan e thei ngammei kamv katumcna tat dat tho.”

⁴Kumna mi muhzwng nggaanvpu tei Ramot khou guang pwki,

⁵rihmei kapy nunc khou tei lat dym bam geic khwan the. “Kaipoucle, nang khang lat akhat nai e,” twna kamei rui sa the. “Thow ta nang kachuc bam tu cho?” twna Jehu rui thanv the. “Kaipoucle, nang ta the,” twna kamei rui daw the.

⁶Khoutei kaney gaanv nei kainung khou gut the, kumna mi muhzwng nggaanvpu tei rui Jehu py khou Olive thauc bun keylouna sa the, “RINGHPOUC, Isarael Racguangc rui sa the: ‘Ai rui nang ta Isaraelmei amei nunc tuang guangc khang thauh teylou the.

⁷Nang rui nang kaipouc guangh, Ahab nac mpouh ta tei swluai nina e, kalam thu Jezebel kamei rui atuang muczwng nunc khatni abangc baih baihmei ta swluaimei zaeng rui kata riap puni.

⁸Ahab kai kaikhuncmei guay khatni kakai kikta guay theic mut puni; kakai kaikhunc khou nggaanvmei guay alauc ta ni gaanvthaih ta ni swluai puni.

⁹Ai rui Isaraelmei guangc Jeroboam kai kaikhunc khatni Baasha kai kaikhunc ta sw kanmei kumcna ai rui kakai kaikhunc khou taanv sw puni the.

¹⁰Jezebel ta mbeihlou lak ge kapumc tei Jezreel ramv khou si nunc rui tu puni.’ ” Hei tei salouna mi muczwng tei tatpat lana pak kan the.

¹¹Jehu tei kapammei meicdaihmei pang khou tei guang dat pwkhou kakhou thanv the, “Ramh sisuaimei tuang maek dai? Mi mbameipu tei rui nang khou tabui tuang swlou niina cho?” “Kamei tabui kahaw cho twmei nangniw thay e,” twna Jehu rui daw the.

¹²“Aniw thay mak ge! kamei tabui lat sa bu cho dinclou o!” twna kaniw rui sa the. “‘RINGHPOUC kamei rui ata Isaraelmei guangc khang thauh teylou the twna sa the’ twna mipu tei rui akhou dinclou e.”

¹³Kadyngna khou meicdaihmei nunc tei rui kaniw tuang thiula daihmei guay kailaak py khou bamclouna Jehu ta khou tei tidinglouna, bianggun amuanna “Jehu hei Guangh the!” twna kauc pat the.

¹⁴Jehoshaphat nac Nimshi tou Jehu rui Joram ta swluai khang raengc the. Joram khatni Isaraelmei guay rui Ramot Gilead khou Siriamei guangc Hazael ta akhangv bam khwan e.

¹⁵Tiki guangh Joram tei Siriamei guangc Hazael ta adow khou rui zamhmei tei gaydat nuh khang Jezreel khou ngalanc guang dat khwan e. Kumhpui zaeng rui Jehu rui kamei nunc khou tei sa the, “Nangniw rui ai lev tat nchamc bammei hei gay de tw e thei kaidai khou rui meic tiapduak patna Jezreelmei nunc khou poulou mak khang sw nina e.”

¹⁶Kamei katuang takuanc gari khou tuangcna Jezreel thangc tat kan the. Mi ganv khou tei Joram tei gay dat makna bam di he, khatni Judamei guangc Ahazia rui kata guang zauc bam khwan e.

¹⁷Jehu rui kamei nunc ta nduanghna guangmei ta rigaanv kai khou rigaanv bammeipu rui how lana “Meic gaanvsaekc takuanh tuangcna nganghmei ta ai how e!” twna kamei rui kaucpat the. “Mi kiu zauczihmei ny champanv ny zauh khang takuanh ricmei gaanv khat ta thouclou o,” twna Joram rui daw the.

¹⁸Latdiumeipu tei Jehu daeng khou tuangc guangna sa the, “Nang hei champanv chamgay swna guang tu ny akumh cho twmei guangh rui thay nii e.” “Hei tei thanv bam khang nang thouc maek ge. Athei khou tat ro,” twna Jehu rui daw the. Latdiumeipu tei mi nunc ta tei ariw kan the tiki kamei hanc guang dat mak ge twna rigaanv kai khou bammei rigaanvmeipu tei rui sa the.

¹⁹Latdiumei baihmei gaanv khat ni thouclou datna Jehu khou mi lat kahak tei thanv dat muay the. “Mi hei nang thouc akhat na sini maek ge. Athei khou tat ro,” twna Jehu rui sa the.

²⁰Latdiumeipu tei mi nunc ta tei ariw thu ariw kan the tiki hanc guang dat mak ge twna sa dat muay the. Mipu tei rui ni kumna sa e, “Kaniw kapy tei takuanh gari mbamei ramthou thoucna guang e, kamei Jehu kumc e!”

²¹“Atuang takuanh gari chamdaanv tho,” twna guangh Joram rui latdanv pat the. Hei tei chamdaanvlou tina kamei lev guangh Ahazia takuanh gari akhat khat khou tuangcna Jehu ta ariw khang pat the. Nabot tuang laupuk khou kaniw ariw the.

²²“Nang hei nchu-nzaenghna guang tu ny suc-rih sw khang guang tu cho?” twna Joram rui kakhou thanv the. Jehu rui daw the, “Nang pui Jezebel rui kahouhloumei ravtow amuc khatni ravmaengc kalummei tuang hei aniu khou naina naina akumhna nchu-nzaenghmei nai ngam nina cho?”

²³“Mi hei rih di the, Ahazia!” twna Joram rui kauc patlouna katuang takuanc zay kaning patna pak kan the.

²⁴Jehu rui katuang saucpai mbwng patna karamsang Joram ta kaap the, kumna hei tei kating khou rui kaap gutna kalungthw hui alamv phut lou the. Joram theicna katuang takuanh gari khou kahuy key the.

²⁵Khoutei Jehu rui katuang ricpy Bidkar khou kumna sa the, “Joram pumc tei laana Nabot tuang ramvpuk khou phaiclou tho. Nang lev anei Joram pu Ahab thei khou takuanh tuangcna nlwan tat bam khou RINGHPOUC rui Ahab khou heikumna sa kanmei tei ninglou o:

²⁶‘Douclanungc tei Nabot lev kanac mpouh nunc ta swluai kanmei tei ai how the. Mi laupuk kahak khou hei ai rui nang ta dandi tii puni the.’ Kumhpui zaeng rui Joram pumc hei laa tat tho, kumna RINGHPOUC tuang latdyng tiguang tangh khang kapumc tei Nabot tuang laupuk khou phaiclou tho,” twna Jehu rui rihpy khou tei latdanv pat the.

²⁷Sw bammei lwn tei how lana Guangh Ahazia tei katuang takuanh gari khou tuangcna Beth Haggan kaidai nzwanna Jehu rui nthau key the. “Swluai tho,” twna Jehu rui kamei nunc khou latdanv pat the, kumna Gur nganghmei chaeng khou Ibleam kaidai daeng khou kata kaaptow the. Tiki Megiddo kaidai tangh mak saanv thu akhaengv nganvna khou tei kamei theiclou the.

²⁸Katuang meicdaihmei nunc rui kapumc tei Jerusalem khou takuanh gari khou rui phungc guang datna David kaidai khou guangh nunc tuang tarou khou mbeihlou the.

²⁹Ahab nac mpouh Joram rui Isaraelmei guangc swmei tuang 11mei kwm Ahazia Judamei guangc sw the.

³⁰Jehu Jezreel khou guang tangc the. Sw bammei lam guay tei Jezebel rui chu lana, kamikkhyam ntey lana, kasam kasiamh lana, guanghkai tuang kailat khou rui chaengluang dai khou zauc key the.

³¹Jehu tei kairaengvmun khou tat gut pwkhou “Chuzaengmei chaeng tat dina cho? Zimri nangkaipouc ta swluaimeipu! Tabui swna khou hei bam tu cho?” twna mipui tei rui kauc the.

³²“Thow cho abiak liangc nimei,” twna Jehu rui zauc thauna kauc the. Guanghkai tuang meicdaihmei gaanv nei gaanv thumh kailat khou rui zauc key the,

³³khoutei Jehu rui “Kata phaic key tho!” twna kaniw khou sa the. Kaniw rui kata phaic key the, kumna mipui zei tei ngaengsaengc khou khatni takuanh khou tei nrou haengh haenglou the. Jehu rui katuang takuanc nunc khatni gari tei rui mipui ruc khou tei tat patna,

³⁴guanghkai lungc khou tei gut the, kumna khou tei tu zangv the. Mi tangv tei kamei rui sa the, “Mi syang keyloumeipui ti hei laana mphumh kan tho; tabui tabui bam sini kamei hei guangh nac aluh e cho.”

³⁵Tiki kata mphumh khang guangmei nunc tei rui kapyrou khatni kaphay kabaanc rou na di the ariwmei.

³⁶Hei tei Jehu khou poulou pwkhou kamei rui kumna sa the, “Mi hei pat puni twna RINGHPOUC rui kabangc Elija khou rui kumna sa the: ‘Jezebel pumc tei Jezreel ramv lungc khou si nunc rui tu puni.

³⁷Karou-karuc guay tei zwn bav kumcna ganczin ganczalou puni the, hei tei meic gaanv khat na rui sini kalwn thay dat ngam pu lak khe.’ ”