Read Rongmei Naga 1 KINCHAKH 11 Bible Online

1 KINCHAKH 11 - Rongmei Naga bible

1 KINCHAKH 11

¹Isaraelmei guayna Hebron khou David daeng khou guangna sa the, “Aniw hei nang lev zei akhat zanh akhat na di the.

²Tat kanmei ganv khou, Saul tei aniw tuang guangc swna bammei douc tei nganvna, nang rui Isaraelmei ta rihbamv khou kapy swna nduangh tat bam khwan e, kumna nang rui RINGHPOUC katuang mei nunc ta chaengzayna lungc puni kumna nang rui kaniw tuang guangc sw puni twna RINGHPOUC nang Racguangc rui Latdyng swlou khwan e.”

³Heikumna Isaraelmei tuang kapy swmei guay tei Hebron khou guangh David daeng khou guang khwan e. Kamei rui kaniw lev nthukmei Latdyng swlou khwan e, kumna kaniw rui kakhou thauh teylou the. RINGHPOUC rui Samuel khou rui Latdyng swloumei kumcna David tei guangh sw the.

⁴Guangh David lev Isaraelmei guayna tei tatna Jerusalem kaidai ta adow the. Mi ganv khou tei mi kaidai ta tei Jebus twna kaw bam khwan e. Kumna dilungmei Jebusimei nunc tei mi khou tei lungc bam khwan e.

⁵Jebusimei nunc rui David khou kamei mi kaidai khou tei gut ngam ni tuang hamh e twna sa khwan e, tiki David rui kaniw tuang Zaion tuang ricmei nunc bamv tei laa the, kumna mi ta tei David tuang Kaidai twna kaw kan the.

⁶“Jebusimei ta swluai reymeipu tei rihpy sw puni the!” twna David rui sa the. Zeruia twmeipui rui puanhmei Joab tei, mi ricbamv khou tei kapy swna kamei rui rihpy sw the.

⁷David tei rihmei nunc bammei bamv khou tei guang lungc the, kum tina mi bamv zanc tei “David Kaidai” twna kaw the.

⁸Kamei rui mi tuang kaidai tei mi chingcbut tuang neihpat biak thangc taniang thwanmei bamv khou tei rui thauna kasiamh the. Mi kaidai tuang baihmei langv guay tei Joab rui kasiamh dat the.

⁹Ngamparymei RINGHPOUC rui nduanghlouna David tei tanc khith khit thau the.

¹⁰Mi hei David tuang kazanc tatmei rihmei nunc e. Kaniw lev Isaraelmei nunc lev twna RINGHPOUC tuang Latdyng theilayna David ta guangh tiswloumei nunc khatni kaguanghdic titancloumei nunc e.

¹¹Reymei rui Hakmon puinacmei Jashobeam e. Kamei hei “Gaanv Thumh” kang khou kapy e. Kamei rui rihbamv akhat khou buy na sin lana meic 300 ta adowna kaniw kaguayna ta swluai ngamlou khwan e.

¹²Kazanc tatmei “Gaanv Thumh” pang khou kaneimei rui Aho puinacmei, Dodo nac mpouh Eleazar e.

¹³Pas Dammim tuang ricbamv khou kamei David thei layna Philistinmei ta adow khwan e. Mi bamv tei sipian laupuk khwan e, Isaraelmei guay tei pak thau khwan the,

¹⁴tiki kamei lev kathei laymei nunc tei laupuk laa khou tei dingna Philistinmei ta adow the. RINGHPOUC rui mi khou tei ridai ngammei tiilou khwan e.

¹⁵Zaeng neih khat Philistinmei nunc Rephaim nzaengc khou zypui swna bammei ganv khou tancbauhmei rihmei 30 pang khou kazauhmei gaanv thumh David tei Adullam tuang khowlang daeng khou nkamh bammei bamv khou guang khwan e.

¹⁶Mi ganv khou tei David tei raengh raenglouna chyngbut akhat khou bam khwan e, kumna Philistinmei kang akhat rui Bethlehem laina gut bam khwan e.

¹⁷Mi khou tei David tei kakailuangc ta ningna “Bethlehem raengcmun daeng khou naimei duikhunc dui tei ai zangv khang laaguangmei nai pw e thei mu ni!” twna sa the.

¹⁸Tancbauhmei rihmei gaanv thumh tei Philistinmei zypui khou tei ran gutna mi duikhunc dui tei David khang zu guang khwan e. Tiki David tei mi dui tei zangv mak khe, kumna hei tei RINGHPOUC khang bunlouna

¹⁹sa the, “Ai mi hei zangv ngam mak ge! Mi hei kaniw theih khang ping makna mi dui hei zu guangmei nunc tuang zei khiak di the!” Kumna kamei zangv mak khe. Mi kazanc tatmei rihmei gaanv thumh tuang taanv kiu mi hei the.

²⁰Joab kainac Abishai hei “Kazanc Tatmei 30” tuang kapy e. Kamei rui buy na sin lana meic 300 ta adowna kaniw guay ta swluai ngam khwan e, kumna kamei “30” pang khou tei kazanc dinhmei sw the.

²¹“30” pang khou tei kamei langh langmei khwan e, kum tina kata kapy tiswlou the, tiki kamei “gaanv Thumh” tei kumcna changh thu kazanc tat mak khwan e.

²²Kabzeelmei, Jehoiada nac mpouh Benaia tei kazanc tatmei rihmei gaanv khat khwan e. Kamei rui Moabmei ricmei daihmei gaanv nei ta swluaimei lev kazauhna tancbauhmei taanv mpeyna taanclou khwan e. Kamei gunh keymei tingmik akhat khou khunh khou keyna kamangliangpui akhat ta swluai khwan e.

²³Izipmei chowbuk panguh kauhmei saengcdaihmei, buy daihmei sinmeipu ta kamei rui swluai khwan e. Benaia rui thingdangv sinna mipu ta kiuc adowna Izipmeipu baanc khou tei rui buy tei asut lana hei tei rui mipu ta tei swluai khwan e.

²⁴“Gaanv 30” pang khou kazauhmei Benaia tuang taanv kiu mi guay hei the.

²⁵Kamei “Gaanv 30” pang khou tei langh langmeipu akhat khwan e, tiki “Gaanv Thumh” tei kumcna changh thu hamh khwan e. David rui mipu ta tei kapumh rigaanv tuang kapy tiswlou khwan e.

²⁶Kabangc khou zanh hyloumei rihmei nunc hei meic pang khou rui langh langmei ricmei nunc khwan e: Joab chana Asahel Bethlehemmei Dodo nac mpouh Elhanan

²⁷Harodmei Shammot Peletmei Helez

²⁸Tekoamei Ikkes nac mpouh Ira Anathotmei Abiezer

²⁹Hushamei Sibbekai Ahomei Ilai

³⁰Netophamei Maharai Netophamei Baana nac mpouh Heled

³¹Benjamin ramv tuang Gibeamei Ribai nac mpouh Ithai Pirathonmei Benaia

³²Gaas daeng khou naimei nzaengc khou rui guangmei Hurai Arbamei Abiel

³³Baharummei Azmavet Shaalbonmei Eliaba

³⁴Gizonmei Hashem Hararmei Shagee nac mpouh Jonathan

³⁵Hararmei Sakar nac mpouh Ahiam Ur nac mpouh Eliphal

³⁶Mekeramei Hepher Pelonmi Ahija

³⁷Karmelmei Hezro Ezbai nac mpouh Naarai

³⁸Nathan chana Joel Hagri nac mpouh Mibhar

³⁹Ammonmei Zelek Beerotmei, Joab tuang rihmei phunghmei Naharai

⁴⁰Jatirmei Ira lev Gareb

⁴¹Hittimei Uria Ahlai nac mpouh Zabad

⁴²Shiza nac mpouh Adina (Reuben kaikhwangmei khou kapy swmei gaanv khat re, katuang ricmei 30 kang akhat nai khwan e.)

⁴³Maaka nac mpouh Hanan Mithanmei Joshaphat

⁴⁴Ashteramei Uzzia Aroermei, Hotham nac mpouh Shamma lev Jeiel

⁴⁵Tizmei Shimri nac mpouh Jediael Joha

⁴⁶Mahavamei Eliel Elnaam nac mpouh Jeribai lev Joshavia Moabmei Ithma

⁴⁷Zobamei Eliel, Obed, khatni Jaasiel.