Read Rongmei Naga 1 KINCHAKH 12 Bible Online

1 KINCHAKH 12 - Rongmei Naga bible

1 KINCHAKH 12

¹Kabangc khou hyloumei guay hei David rui Ziklag khou Kis nac mpouh Saul khou rui pak tatna Ziklag khou bammei ganv khou guang kanmei nunc e, kalam thu kaniw tei baantanc rihliangcna rih khou nkhav kanmei nunc e;

²kaniw tei Saul kaikhwangmei Benjaminmei lwmnuhmei, rih khou thaymei baanzat baandau sauhpai kaap ngammei khatni tauziuriang ziucngammei nunc khwan e.

³Kaniw tuang kapy swmei hei Gibeamei Shemaa nac mpouh nei Ahiezer lev Joas khwan e. Mi ricmei nunc kiu mi nunc hei the:

⁴Gebeonmei Ishmaia; kamei gaanv 30 pang khou kazauhmei kaniw tuang kapy swmei nei rui Gibeamei, Shemaa nac mpouh Ahiezer lev Joas khwan e. Mi ricmei nunc kiu mi nunc hei the: Azmavet nac mpouh Jeziel lev Pelet Anathotmei Beraka khatni Jehu Gebeonmei Ishmaia (kamei “Gaanv 30” pang khou kazauhmei kazanc tatmei rihmei akhat re) Gederamei Jeremia, Jahaziel, Johannan, khatni Jozabad

⁵Haripmei Eluzai, Jerimot, Bealia, Shemaria, khatni Shephatia

⁶Kora puinacmei Elkana, Isshia, Azarel, Joezer khatni Jashobeam

⁷Gedormei Jeroham nac mpouh Joela khatni Zebadia.

⁸Mi hei Gad kaikhwangmei tancbauhmei, rih khou thaymei David rui tazikramv tuang ricmei nunc bamv khou bammei douc David tuang ricmei pang khou lay kazauhmei nunc e. Kaniw hei buy, nggih sinmei khou magapmei, kamangliangpui kumhmei meicpingmei lwn phunghmei, chalung kumc katumhmei rihmei nunc e.

⁹Ezer rui kapy swmei the, kaneimei khou Obadia kathumhmei khou Eliab,

¹⁰Padeihmei khou Mishmanna, panguhmei khou Jeremia,

¹¹Charukmei khou Attai, chaneimei khou Eliel,

¹²Tachatmei khou Johanan, chakiumei khou Elzabad,

¹³ruhmei khou Jeremia, ruhna khatmei khou Makbannai hei guay the.

¹⁴Gad kaikhwangmei mi nunc gaanvsaekc hei meic 1000 tuang kapy nunc e, kumna baihmei guay rui 100 tuang kapy nunc e.

¹⁵Tingkwm tuang rey liangmei bw khou, Jordan duithuak tei daic lyamna bammei ganv khou kaniw rui mi dui tei kaan patna mi duithuak tuang neihpat neihkey nzaengc khou lungc bammei nunc ta nthau phaklou khwan e.

¹⁶Zaeng neih khat Benjamin lev Juda kaikhwangmei meic kang khat David bammei rihmei nunc bamv khou guang khwan e.

¹⁷David rui kaniw ta ariw khang patna sa the, “Nangniw ata nkhavlou khang guangmei tuang e thei, aniw lev chwn khat na bam khang ai nuh de. Aniw khou lay kazauh tho! Tiki nangniw rouc sina zauczihmei khang tiilou khang guangmei tuang e thei, ai rui nangniw ta sw kasic khang sw bam mak sini, aniu pupouc Ravguangc rui hei tei thayna nangniw ta dandi tii puni.”

¹⁸Mi tangv tei “Gaanv 30” kang tuang kapy sw kanmeipu Amasai ta tei Ravguangc bumaengc rui sinswna kamei rui kumna kauc the, “Jessi nac mpouh David, aniw hei nang khang e! Nang khatni nang ta nkhavmei nunc tei rih ngammei sw diu! Ravguangc nang biak liangc bam e.” David rui kaniw ta laalouna rihpy nunc tiswlou the.

¹⁹David rui Philistinmei nunc ta nduanghna guangh Saul ta adow khang patmei ganv khou Manasemei ricmei gaanvsaekc David biak laylou kan the. Kalingna thu kamei rui Philistinmei ta nkhavlou kan mak ge, kalam thu David rui Saul biak liangc dat kan pwng de twmei Philistinmei guangc nunc tei rui kata lwmsi khwan e. Kumna kaniw David ta Ziklag thangc thouclou dat the.

²⁰David hanc guang dat pwkhou Manasemei ricmei kathei laylou kanmei nunc kiu mi nunc hei e: Adna, Jozabad, Jediael, Mikael, Jozabad, Elihu, khatni Zillethai. Kaniw hei Manase khou rihmei 1000 kang tuang kapy nunc the.

²¹Kaniw rui David tuang ricmei kang nunc tuang kapy sw khwan e, kalam thu kaniw guay tei tancbauhmei rihmei nunc khwan e. Katang thangc kaniw Isaraelmei tuang rihpy nunc sw khwan e.

²²Tingmik pum kumna David tuang ricmei pang khou meic laylou khwan e, kumna katumcna katuang ricmei tei geic thau khwan e.

²³Ravguangc rui nrianhloumei theilayna David ta Saul phaan guangh tiswlou khang rui David tei Hebron khou bammei ganv khou rihmei mpeyna katuang ricmei pang khou lay kazauh khwan e. Mi nunc sing kiu kabangc khou hyloumei hei e:

²⁴Judamei: buy khatni nggih sinmei rihmei 6,800

²⁵Simeonmei: rihmei 7,100

²⁶Levimei: meic 4,600

²⁷Aron kiktamei, Jehoiada thei laymei: meic 3,700

²⁸Tancbauhmei chabwan Zadok riangluaicmei: kapy swmei 22

²⁹Benjaminmei (Saul kaikhwangmei): meic 3,000 (Benjaminmei meic geihmei thu Saul thei lay kan de).

³⁰Ephraimmei: kakai puinac nunc khou kazanc tatmei meic 20,800

³¹Neihkey Manasemei: tatna David ta guangh tiswlou khang kadahloumei meic 18,000

³²Isakarmei: kapy swmei gaanv 200 lev kaniw bangc khou bammei rihmei nunc (mi nunc hei Isaraelmei rui tabui tuang tabui kumhmei ganv khou sw nina cho twmei thaymei nunc e)

³³Zebulunmei: kakandih ta nzianmei, lwm nuhmei khatni rih na guay sinthaymei meic 50,000

³⁴Naphtalimei: kapy swmei meic 1000 lev nggih lev buy sinmei meic 37,000

³⁵Danmei: rih khou thaymei meic 28,600

³⁶Asermei: rih khang chamdaanvloumei meic 40,000

³⁷Jordan neihpat thangc bammei Reubenmei, Gadmei, khatni neihpat biak thangc bammei Manasemei: rih na guay sinthaymei meic 1,20,000 e.

³⁸Mi rih khang chamdaanvna bammei rihmei nunc hei David ta Isaraelmei kapwmna tuang guangc tiswlou khang kaniw lung dingna Hebron khou guang the. Baihmei Isaraelmei guay tei ni mi khang tei rui chwn chamc the.

³⁹Kaniw Hebron khou zaeng neih thumh David lev twna kandihmei rui kaniw khang kasiamhloumei taektw taekzangv tei tuna zangvna bamlou the.

⁴⁰Dihpy karuc thangc bammei Isakarmei, Zebulunmei khatni Naphtalimei nunc rui nganvna— ntyan buay, tadutthai, drakhathai kang, drakhadui, khatni Olive thauc hei guay hei kuanniam, guaikuan, takuanh khatni guaituamchic pang puat swna phungc guang the. Hei tei rui lyanmei thu mi kandic kabamv kathuicna khou neihla the twmei lyanmei tuang e.