Read Rongmei Naga 1 KINCHAKH 13 Bible Online

1 KINCHAKH 13 - Rongmei Naga bible

1 KINCHAKH 13

¹Meic 1000 khatni 100 kang tuang rihpy nunc ta tei David rui kaw kaduaina kaphianh the.

²Kamei rui Isaraelmei guay khou kumna kauc pat the, “Nangniw rui kwmlou e thei khatni mi hei Ravguangc rui chwnmei e thei Isaraelmei namv guay thangc bam duc kanmei guay khatni kaniw tuang kaidai kaidai khou bammei amuh khatni Levimei guay ta mi bamv khou hei guang kaduai khang meic thouclouna kabai di kho.

³Kumlana Saul rui guangh sw bammei douc ntaamvna ganclou bammei Ravguangc tuang Latdyng Khuk tei phungc guang dat di kho.”

⁴Meic nunc tei hei tei kahaw the kumna hei tei taanc khang nuh the.

⁵David rui mi kandic kapwm khou bammei Isaraelmei guay ta kaw kaduai the. Kiriath Jearim khou rui Jerusalem khou Latdyng Khuk tei phungc guang dat khang dihba thangc Izip ramvrei khou rui dihpy thangc Hamat chaeng nganv khou bammei Isaraelmei guay guang kaduai the.

⁶Kerubim nunc ruc khou naimei guanghbamv khou bammei RINGHPOUC zanc phunghmei Ravguangc tuang Latdyng Khuk tei Juda ramv tuang Kiriath Jearim khou Baala kaidai khou rui laa dat khang David lev Isaraelmei nunc tei tat the.

⁷Abinadab kai khou rui kaniw rui Latdyng Khuk tei laa patna guaih gari kathanc khou lou the. Uzza lev Ahio rui guaih tei gaengc the,

⁸kumna David lev meic guayna tei kaniw RINGHPOUC ta chakhwang swna alaamhna tat the. Kaniw nrah, nkhuangh, syamtuaic khatni bianggun sinna lu suanna tat the.

⁹Kaniw Kidon tuang laudybamv khou guang pwkhou guaituam tei kaphay kalanv the, kum tina Uzza tei kabaanc haamv patna Latdyng Khuk tei houlou the.

¹⁰Latdyng Khuk tei kahi tipui zaeng rui RINGHPOUC kalungpuamcna kata kadyng khou rui swluai the. Kamei mi bamv khou tei RINGHPOUC hu khou theic the.

¹¹Kumna mi khou tei rui thauna mi bamv zanc tei Perez Uzza twna kaw bammei tuang the. RINGHPOUC rui kalungpuamcna Uzza ta swluai tina David tei kalungpuamc the.

¹²Khoutei David rui Ravguangc ta ping the kumna kamei rui sa the, “Ntaw thu akumhna ai Latdyng Khuk tei phungc dat bauc ni thena cho?”

¹³David rui hei tei Jerusalem khou phungc guang makna Gad kaidaimei Obed Edom twmeipu kai khou ganclou duc kan the.

¹⁴Hei tei mipu kai khou tei bw thumh lou the, kumna RINGHPOUC rui Obed Edom kai kaikhunc khatni katuang puat guay khou suaihiamlou the.