Read Rongmei Naga 1 KINCHAKH 14 Bible Online

1 KINCHAKH 14 - Rongmei Naga bible

1 KINCHAKH 14

¹Turmei guangc Hiram rui David khou baanhthaymei nunc thouc guang khwan e. Guanghkai kasiamh khang kamei rui sidar thing khatni thing tauh taanv taanhmei nunc thouc guang khwan e.

²Kumna David tei mi khou tei RINGHPOUC rui kata Isaraelmei guangc swna kasiamh thaulou the kumna meic nunc zaeng khang rui kakandih tei tidaicthaulou the twmei thay the.

³David tei Jerusalem khou bammei ganv khou now kaw geic mbu the kumna kanah mpouh aluh puanc geic mbu the.

⁴Kumna kabangc khou hyloumei nac nunc hei Jerusalem khou rui puanhmei nac nunc e: Shammua, Shobab, Nathan, Solomon,

⁵Ibhar, Elishua, Elpelet,

⁶Noga, Nepheg, Japhia,

⁷Elishama, Beeliada, khatni Eliphelet.

⁸David ta Isarael kandic kapwm tuang guangc tiswlou the twmei Philistinmei nunc rui chu pwkhou, David ta nym khang kaniw tuang ricmei kapwm guang the. Kumna kaniw ta ariw khang David tei pat the.

⁹Philistinmei nunc tei Rephaim nzaengc khou guangna kwamtu thau the.

¹⁰Khoutei David rui Ravguangc khou, “Ai Philistinmei ta adow kho ny adow nangh cho? Nang rui ata rih tingamlou puni dai cho?” twna thanv the. “Adow tho. Ai rui nang ta tingamlou puni the,” twna RINGHPOUC rui daw the.

¹¹Kumna David rui kaniw ta Baal Perazim khou adowna rihngam the. Kamei rui sa the, “Zauczihmei ta dui daih kumh swra gut khang RINGHPOUC rui ata piulou the.” Kumna mi bamv zanc tei Baal Perazim twna kaw the.

¹²Philistinmei tei kaniw tuang ravmaengc guay ganclouna pak kan the kumna mi guay tei mai ntei tho twna David rui latdanv pat the.

¹³Asaanh makna Philistinmei tei mi nzaengc khou tei guang datna asut thau dat khwan e.

¹⁴David rui Ravguangc khou thanv dat pwkhou kumna daw the, “Kaniw ti hei mi bamv khou rui adow riu, tat nkuay pat lana kabiak akhat thangc tei rui balsam bang ding daeng khou tei rui adow gut ro.

¹⁵Rihmei nunc guangmei khwan thingbang twan thangc tei chu pw e thei adow thau tho, kalam thu Philistinmei rihmei nunc ta ngam khang ai rui huna tat gut puni the.”

¹⁶Ravguangc rui latdanv tiimei theilayna David tei taanc the, kumna kamei rui Philistinmei ta Gibeon khou rui Gezer nganv alay tangclou the.

¹⁷David zanc tei kandih kabamv kathuicna khou zin lik kan the kumna RINGHPOUC rui kandih kaguayna ta kata tiping kan the.