Read Rongmei Naga 1 KINCHAKH 15 Bible Online

1 KINCHAKH 15 - Rongmei Naga bible

1 KINCHAKH 15

¹David rui kamei sinsw khang David Kaidai khou kai mpeyna kasiamhlou khwan e. Ravguangc tuang Latdyng Khuk loumei bamv khang ni kasiamhna pheykai katinghlou khwan e.

²Khoutei kamei rui sa the, “Levimei nunc na rui Latdyng Khuk tei puanc nina e, kalam thu kaniw hei hei tei puanh khang khatni kasiamruai sw khang kadahloumei nunc e.”

³Kumna David rui kasiamhloumei bamv khou tei Latdyng Khuk tei puanc guang khang Isaraelmei guay ta Jerusalem khou kaw guang the.

⁴Mi tangv tei Aron khatni Levimei tuang kikta guay ta kaw khang thouclou the.

⁵Khoutei Levimei Kohat puinacmei Uriel twmeipu kakai puinacmei meic 120 ta sinmeipu guang the;

⁶Merari puinacmei khou rui meic 220 ta sinmeipu Asaia guang the;

⁷Gershon puinacmei khou rui meic 130 ta sinmeipu Joel guang the;

⁸Elizaphan puinacmei khou rui meic 200 ta sinmeipu Shemaia guang the;

⁹Hebron puinacmei khou rui meic 80 ta sinmeipu Eliel guang the;

¹⁰Uzziel puinacmei khou rui meic 112 ta sinmeipu Amminadab guang the.

¹¹David rui amuh Zadok khatni Abiathar khatni Levimei gaanv charuk twmei thu Uriel, Asaia, Joel, Shemaia, Eliel khatni Amminadab ta kaw the.

¹²Kumna kamei rui Levimei nunc khou tei sa the, “Nangniw hei Levi puinacmei nunc tuang kapy nunc the. Kumna RINGHPOUC Isarael Racguangc tuang Latdyng Khuk tei ai rui kabamv khang kasiamhloumei bamv khou phungc guanglou khang nangniw khatni baihmei Levimei guay pumh nthan tho.

¹³Reymei luan khou tei hei tei puanc khang nangniw bam makmei zaeng rui aniw rui taanc nimei thak tei taanc nthuih mak ge twna RINGHPOUC aniu Ravguangc rui aniw ta dandi tii kan the.”

¹⁴Isarael Racguangc tuang Latdyng Khuk tei puanc guang khang amuh nunc khatni Levimei nunc tei pumh nthan the.

¹⁵RINGHPOUC rui Mousi khou saloumei kumcna Levimei nunc rui hei tei kaphuang louna puanc the.

¹⁶Levimei nunc tei nrah downa khatni syamtuaic hiwna lu suan khang salou o twna David rui Levimei kapy nunc khou tei latdanv tii the.

¹⁷Heizaeng rui Levimei nunc rui Joel nac mpouh Heman, kakai riangluaic Berekia nac mpouh khatni Merari nac nunc kakai riangluaicmei Kushaia nac mpouh Ethan,

¹⁸mei nunc tei lev twna kaneimei thaek khou Zekaria, Jaaziel Shemiramot, Jehiel, Unni, Eliab, Benaia, Maaseia, Mattithia, Eliphelehu khatni Mikneia kumlana raenghkat rigaanv khang Obed-Edom lev Jeiel ta kadahlou the.

¹⁹Lu suanmei Heman, Asap khatni Ethan mi nunc rui tanzinc tuang syamtuaic hiw khang e.

²⁰Zekaria, Aziel, Shemiramot, Jehiel, Unni, Eliab, Masseia khatni Benaia kaniw rui alim amuan khang the.

²¹Mattithia, Eliphelehu, Mikneia, Obed-Edom, Jeiel khatni Azazia kaniw hei Sheminit rui dinhmei theilayna nrah dow nina e.

²²Lu khou heih timei zaeng rui Kenania ta Levimei ludowmei nunc tuang kapy sw khang kadahlou the.

²³Berekia, Elkana, Obed-Edom khatni Jehia kaniw ta Latdyng Khuk ta rigaanv khang kadahlou the.

²⁴Shebania, Joshaphat, Nethanel, Amasai, Zekaia, Benaia khatni amuh Eliezar kaniw Ravguangc tuang Latdyng Khuk hu khou bianggun amuan khang kadahlou the

²⁵Latdyng Khuk tei laa khang guangh David, Isaraelmei tuang kapy nunc khatni rihpy nunc Obed Edom kai thangc tat the. Kaniw khumngai dai ngay the.

²⁶Latdyng Khuk puanhmei Levimei nunc ta nkhavlou diu khang kaniw rui guaituamchic chanei khatni lauziu chanei khaeng the.

²⁷David tei linen phey gaymei rui kasiamhmei thiula saenghmei nu khwan e. Hei tei kumcna ludowmei nunc, kaniw tuang kapy Kenania, khatni Latdyng Khuk puanhmei Levimei nunc tei ni mi pwan tei piu muay khwan e. David tei Ephod ni piu khwan e.

²⁸Kumna Isaraelmei guay tei neihlana kaucna, bianggun khatni chei amuanna, syamtuaic hiwna, khatni nrah downa Latdyng Khuk tei Jerusalem khou suanc guang khwan e.

²⁹Latdyng Khuk tei kaidai khou tei puanc gut pwkhou, Saul nac aluhpui Mikal rui kailat khou rui zauc pat pwki guangh David tei neihlana kachuamhna alaamh bammei ta how the, kumna kamei David ta chany the.