Read Rongmei Naga 1 KINCHAKH 16 Bible Online

1 KINCHAKH 16 - Rongmei Naga bible

1 KINCHAKH 16

¹Kaniw rui Latdyng Khuk tei David rui kasiamhloumei pheykai lungc khou tei lou the. Kaniw rui Ravguangc khang khaeng the khatni alamvpuatkat kat the.

²David rui khaeng nimei taanv guay tei taanc luai lana, kamei rui meic nunc ta RINGHPOUC zanc khou suaihiamlouna

³kaniw khang taektw nzanhlou the. Isaraelmei ntumei nggaanvmei meic kathuicna khang ntyan dwm akhat akhat, zanh rawloumei zanhbangv akhat khatni drakhathai kang asaekc lev nzanhlou the.

⁴RINGHPOUC Isaraelmei Racguangc ta Latdyng Khuk hukhou tei lu suanna khatni thuancna kalummei khou zaylou diu khang David rui Levimei gaanvsaekc ta kadahlou the.

⁵Asap ta kapy swmei khang khatni Zekaria ta kata nkhavloumei khang kadahlou the. Jeiel, Shemiramot, Jehiel, Mattithia, Eliab, Benaia, Obed Edom, khatni Jeiel ta nrah dowmei khang kadahlou the. Asap rui syamtuaic hiw khang

⁶khatni Latdyng Khuk hu khou bianggun amuan bam khang amuh Benaia lev Jahaziel ta kadahlou the.

⁷David rui mi khou tei rui Asap khatni kapammei Levimei nunc ta RINGHPOUC ta thuancna suan bam khang kaniw thouc tiswlou rey liang the.

⁸RINGHPOUC ta thuancku o, kahym kauc ndauh o; kataanv tei zaatc guay khou raclou tio.

⁹RINGHPOUC ta thuancna suan o; kamei rui taancloumei charynmei taanv guay tei rac o.

¹⁰Aniu hei katuang e twna neihla o; kata kalummei guay neihla o.

¹¹Nkhavlou khang RINGHPOUC khou guang o; kumna kata kalum tanh tan bam o.

¹²Ravguangc bangc Jakob kikta nuncle, Ravguangc rui kadahloumei Isaraelmei tuang kikta nuncle,

¹³Ravguangc rui taancloumei charynmei taanv guay, khatni katuang latzan tei ningtow o.

¹⁴RINGHPOUC hei aniu Racguangc e; katuang latdanv hei kandihmei guayna khang e.

¹⁵Ravguangc tuang Latdyng tei amuc riu, tingsaengzaeng khang swloumei Latdyng e.

¹⁶Abraham khou swloumei Latdyng tei, kamei rui Isak khou swloumei Latdyng tei.

¹⁷RINGHPOUC rui Jakob lev Latdyng swlou the, tingsaengzaeng nai bam nimei Latdyng.

¹⁸Kamei rui sa the, “Ai rui nang khang Kanaan kandic tii puni, mi hei nangniw tuang sw puni.”

¹⁹Ravguangc tuang mei nunc tei meic katit na khwan e, Kanaan kandic khou gin sw bam khwan e.

²⁰Kaniw tei kandih akhat khou rui akhat khou guanghdih akhat khou rui akhat khou ruanna tat bam khwan e.

²¹Tiki Ravguangc rui kaniw ta meic gaanv khat na rui sini rai khang nuhlou mak khwan e; kaniw ta gaeklou khang guangh nunc khou sa khwan e:

²²“Ai rui kadahloumei bangc nunc ta nangniw sw kasic nuh mak ge; atuang muhzwng nunc ta kahi nuh mak ge.”

²³Kandihmei guayle, RINGHPOUC khou suan o! kamei rui aniu ta kanloumei gaymei chamv hei tingmik thuic kauc ndauh o.

²⁴kahym hei zaatc kaguayna khou kauc ndauh o, katuang daihmei taanv tei meic guayna khou kauc ndauh o.

²⁵RINGHPOUC hei daic e kumna kata thuanc kauhna thuanc nina e; rav baihmei guay ta suangc kata chakhwang sw nina e.

²⁶Zaatc baihmei guay tuang rav guay tei thu ravmaengc de, tiki RINGHPOUC thu tingpuk damhmeipu e.

²⁷Katik kahym rui kadaeng khou padik ge, ngamv lev neihlamei rui katuang Ravkai padik ge.

²⁸Kandihmei maansei guayle, RINGHPOUC ta thuanc o, kahym khatni kangamv ta thuanc o.

²⁹RINGHPOUC tuang hymdaihmei zanc ta thuanc o; puatkat phungc guang o kumna katuang Ravkai khou guang o. RINGHPOUC hu khou nkhumkey o kamei nthanmei tei ndauhlou pwkhou;

³⁰kandihmei guayle, kahu khou pingna kadunh o! Kandih ti hei kabam khou ntipna lou the, kumna hei tei kalung dat mak khe.

³¹neihla o, tingpuk kandihle! RINGHPOUC hei, guangh e twna zaatc guay na khou dinclou o.

³²Duipui khatni mi khou naimei guayle, neihla thau tho; ramvpuk khatni mi khou naimei guay ni neihla tho!

³³RINGHPOUC kandih sin khang guang pwkhou nwmbangc thingbang guay rui neihlana kauc puni.

³⁴RINGHPOUC ta thuanc o, kalam thu kamei hei gay e; karamzian hei tingsaengzaeng e.

³⁵Kakhou kumna sa o, “He Ravguangc aniw ta kanloumeipu, aniw ta kanlou o; aniw ta khuam kaduailou o; zaatc guay khou rui aniw ta kanpatlou o, aniw thuanckuna nang zanc nthanmei ta thuanc bam khang.”

³⁶RINGHPOUC Isarael Racguangc ta thuanc o! Kata ntaw ni tingsaengzaeng ni thuanc o! Khoutei meic guayna rui “Amen” twna sa the, kumna RINGHPOUC ta thuanc the.

³⁷Latdyng Khuk loumei bamv khou kalummei taanv tei kathouc swna sin bam khang guangh David rui Asap khatni kapammei Levimei nunc ta lou the. Kaniw rui mi bamv khou tei tingmik kathuic kaniw tuang thouc tei taanc bam khang e.

³⁸Jeduthun nac mpouh Obed Edom khatni kakai puinacmei meic 68 ta ni mi nunc ta tei nkhav khang lou the. Hosa lev Obed Edom rui raenghmun guay tei gaekmei kaney thouc sw the.

³⁹Amuh Zadok khatni kapammei amuh guay tei Gibeon khou kalummei bamv khou tei kaniw thouc sw the.

⁴⁰Tingmik pum lauthwan tingzyn RINGHPOUC rui Isaraelmei khang tiiloumei Riakdanv khou hyloumei theilayna kaniw tei kapumc rawna ravchapaeng khou khaeng bam the.

⁴¹Kaniw pang khou tei Heman lev Jeduthun khatni Ravguangc ta karamzian khang tei thuancna suan bam khang kadahloumei nunc lev bam the.

⁴²Heman lev Jeduthun tei thuanhmei lu suanmei ganv khou sinsw nimei bianggun, syamtuaic khatni baihmei luna guay tei kaney thouc sw the. Jeduthun puinacmei nunc tei raenghmun guay gaekmei tei kaniw thouc sw the.

⁴³Mi tangv tei meic kathuicna kakai kakai tat dat the, kumna David ni kakai kaikhuncmei lev bam nchamclou khang kakai tat kan the.