Read Rongmei Naga 1 KINCHAKH 18 Bible Online

1 KINCHAKH 18 - Rongmei Naga bible

1 KINCHAKH 18

¹Kaganv kanakmei tangv guangh David rui Philistinmei ta adow datna kaniw ta ngam the. Gat kaidai lev mi daeng khou naimei namv guay tei kaniw baanc khou rui laa pat dat the.

²Kamei rui Moabmei ta ni ngam the kumna kaniw rui kakhou gutlouna dihkhav tiina lungc the.

³Mi tangv tei, Hamat ramv daeng khou naimei Siriamei kandic Zoba tuang guangc Hadadezer ta adow the, kalam thu Hadadezer tei Euphratis duithuak tuang neihpat ramv tei kamei rui sin khang karamc bam khwan e.

⁴David rui katuang takuanc gari 1000, takuanh ricmei 7000, khatni phay ricmei 20,000 ta nym khwan e. Kamei rui gari 100 zay biuhmei takuanh tei laalouna baihmei guay tei katan dukbaulou the.

⁵Damaskas khou bammei Siriamei nunc rui guangh Hadadezer ta nkhavlou khang rihmei thouc guangmei nunc ta David rui adowna meic 22,000 ta dowluai the.

⁶Mi kandic khou tei David rui katuang ricmei tibamlou the, kumna kaniw rui katuang mei swna dihkhav tiina lungc the. RINGHPOUC rui David ta kabamv kathuicna khou rih tingamlou the.

⁷Hadadezer tuang meicdaihmei nunc rui phungc bammei kachaekc tuang nggic guay David rui laana Jerusalem khou phungc guang the.

⁸Hadadezer rui sinmei kaidai Tibhat lev Kun khou rui ni kamei tanzinc mpeyna laa khwan e. (Solomon rui hei tei rui thei thangc Ravkai khou loumei duiduangc, tiangdaic, khatni tanzinc tuang mu-lai guay tei kasiamh khwan e.)

⁹Hadadezer tuang ricmei guay ta David rui ngam the twmei chamv Hamatmei guangh Toi rui chu khwan the.

¹⁰Hadadezer ta rihngammei khou tei neihlamei lat phungc guang khang kamei rui kanac mpouh Joram ta David khou thouc guang khwan e. Kalam thu kamei Hadadezer lev katupc sihna adow bam khwan e. Joram rui David khang kachaekc, daandi, khatni tanzinc rui kasiamhmei kaipat phungc guang geic khwan e.

¹¹Guangh David rui mi puat guay tei kamei rui Edom, Moab, Ammon, Philistian, khatni Amalek khou rui rih khou rui laaguangmei puatc guay tei lev twna kalummei khou piu khang katgutlou the.

¹²Zeruia twmeipui rui puanhmei Abishai rui Edommei ta Ntey nzaengc khou rihngamna meic 18,000 ta swluai the.

¹³David rui katuang ricmei Edom kandic kapwm khou lou the kumna meic nunc tei David mei sw the. RINGHPOUC rui David ta kabamv kathuicna rih tingamlou the.

¹⁴David rui Isaraelmei kapwmna ta sin the kumna kamei nunc ta nchumhna khatni nthuihna sin the.

¹⁵Abishai chana Joab tei rihmei guay tuang kapy the; Ahilud nac mpouh Jehoshaphat tei chakh guay hymei khou kathouc sw the;

¹⁶Ahitub nac mpouh Zadok lev Abiathar nac mpouh Ahimalek tei amuh nei the; Seraia tei latzankai khou hymeipu the;

¹⁷Jehoiada nac mpouh Benaia tei David pumcta siangaekmei rigaanv nunc ta sinmeipu the; kumna guangh David nac mpouh nunc tei bamv kauhmei sinmei rana khwan e.