Read Rongmei Naga 1 KINCHAKH 19 Bible Online

1 KINCHAKH 19 - Rongmei Naga bible

1 KINCHAKH 19

¹Kaganv kanakmei tangv Ammonmei guangc Nahas theic the kumna kanac mpouh Hanun rui guangh sw dat the.

²Guangh David rui sa the, “Ai Hanun khou atuang nzianmei lyanlou puni, kalam thu kapu Nahas rui ata nzianlou khwan e.” Kumna David rui katuang nzianmei lat tei dinclou khang latdiumei nunc thouclou the. Kaniw Ammon khou guang tangcna guangh Hanun daeng khou guang the.

³Khoutei Ammonmei kapy nunc rui guangh khou sa the, “Nang pu ta chakhwang swna David rui mi latdiumei nunc ti hei katuang nzianmei lat raclou khang thouc guang tuang e twna nang ningna cho? Kiuc hamh e! kamei rui mi kandic ti hei kuak nii lana gwanrummei thouc guangmei tuang de!”

⁴Hanun rui latdiutatmei nunc ta tei nym lana kaniw mwanghiw guat ganc lana kaniw tuang pheybaan sianphai bangc khou na dan ganclouna mpatlou the.

⁵Kaniw tei kai guang dat khang sini zak the. Mi chamv tei David rui chu lana, kaniw mwanghiw thau dat mak saanv Jeriko khou bam tho twna kaniw khou tithay guang the.

⁶Guangh Hanun khatni Ammonmei nunc tei kaniw rui guangh David ta agay khaengclou kan the twmei thay lana Mesopotamia khatni Siriamei tuang kandic Maaka khatni Zoba khou rui takuanh gari khatni takuanh gari thouhmei nunc nsuc khang daandi kilogram 34,000 tii kan the.

⁷Kaniw rui takuanh gari 32,000 nsuc guang the kumna Maakamei guangc tuang ricmei nunc ni guangna Medeba daeng khou zypui sw bam the. Ammonmei tei kaniw tuang kaidai guay khou rui guang kaduaina adow khang chamdaanvna bam the.

⁸Mi chamv tei David rui chu pwkhou, kamei rui Joab lev rihmei kapwm ta thouc pat the.

⁹Ammonmei guay tei patna kaniw tuang guanghdic kaidai Rabba tuang raengh bangc khou pat nchwan the. Kaniw ta nkhav khang guangmei guangc nei tei rui ramvpuk khou dupna bam the.

¹⁰Zauczihmei nunc tei rui thei-hu adow guang puni twmei Joab rui thay lana Isaraelmei ricmei gay liang liangmei pang kadahna kaniw ta tei Siriamei biak karihna lou the.

¹¹Baihmei guay ta tei kachana Abishai rui kapy swna Ammonmei biak karihna tibam the.

¹²Joab rui kakhou sa the, “Siriamei rui ata ngam guang e thei nang ata guang nkhav nina the, Ammonmei rui nang ta ngam guang e thei ai nang ta guang nkhav puni.

¹³Tanc o, bauc o! Aniu meic nunc khang khatni Ravguangc tuang kaidai guay khang adow ranvna adow kho. RINGHPOUC rui ningmei sw kan diu!”

¹⁴Joab lev kamei nunc rui adow gut pwkhou Siriamei tei pak kan the.

¹⁵Siriamei pak kanmei tei Ammonmei rui how lana, kaniw ni Abishai hu khou rui pakna kaidai thangc tei gut dat kan the. Mi tangv tei Joab tei Jerusalem thangc guang dat the.

¹⁶Siriamei tei kaniw Isaraelmei ta ngam mak khe twmei thay lana Euphratis duithuak tuang neihpat thangc naimei Siriamei kandic guay tuang ricmei nunc ta phungc guangna Zobamei guangc Hadadezer tuang rihpy Shobak bangc khou lou the.

¹⁷Mi chamv tei David rui chu pwkhou, Isaraelmei ricmei guay ta khuam kaduai dat lana Jordan kaan patna Siriamei biak karihna tiduplou the. Rih tei adow thau dat the,

¹⁸kumna Isaraelmei ricmei rui Siriamei ricmei nunc ta alay ganc the. David lev kamei nunc rui Siriamei tuang takuanh gari sinmei meic 7000 khatni phay ricmei 40,000 ta swluai the. Siriamei tuang rihpy Shobak ta ni swluai the.

¹⁹Hadadezer bangc khou bammei guangh nunc tei kaniw ta Isaraelmei rui ngam the twmei thay pwkhou kaniw David khou gutlou the kumna katuangmei sw the. Siriamei tei kumna Ammonmei ta nkhav niimei lungning nai dat kan mak khe.