Read Rongmei Naga 1 KINCHAKH 21 Bible Online

1 KINCHAKH 21 - Rongmei Naga bible

1 KINCHAKH 21

¹Seitaan rui Isaraelmei ruc khou ryanramei tiguanglou nii khwan e kumna Isaraelmei meic sing phuh khang David lung tidinglou khwan e.

²David rui Joab khatni baihmei meicdaihmei guay khou latdanv pat the, “Isarael kandic kapwm katin katou nganv tat tangcna meic sing phuc o. Meic sing azuh sih nai cho twmei ai thay nii e.”

³Joab rui daw the, “Isaraelmei meic sing hei ntaw nai bammei suangc kadam 100 RINGHPOUC rui ti-mbulou diu o! Guanghle, kaniw hei nang bangc nunc e. Tabui swna nang mi hei taancna Isaraelmei guayna ta ti-nkhuailou niina cho?”

⁴Tiki guangh rui Joab ta kalatdanv tei titaanclou the. Joab rui tat pat lana Isarael kandic kapwm khou tatna Jerusalem khou guang dat the.

⁵Kamei rui guangh David khou rihphyan khang meic sing hei Isarael khou 1,1,00,000 khatni Judamei khou 4,70,000 e twna poulou the.

⁶Joab rui guangh tuang latdanv tei laa makna, Levimei lev Benjaminmei meic sing thu phuh mak khwan e.

⁷Meic sing phuhmei ta tei Ravguangc kalungpuamc the, kumna Isaraelmei ta dandi tii the.

⁸David rui Ravguangc khou sa the, “Ai hei si hakmei paap taanc dyng the! Ata kuaklou o! Ai mbana taanhmei tuang dyng the.”

⁹Khoutei RINGHPOUC rui David tuang muhzwng Gad khou sa the,

¹⁰“David kamei kahaw hawmei kadah khang dandi kathumh tii puni the twna kakhou tatna sa tho. Kamei rui kahaw hawmei akhat ai rui taanclou puni the.”

¹¹Gad tei David daeng thangc tatna RINGHPOUC rui samei tei dinclou the, kumna kakhou thanv the, “Nang rui tabui dandi tei laa nii cho?

¹²Tingkwm kathumh nap nkowmei ny, hamh e thei nang ta zauczihmei rihmei nunc hu khou rui nang bw kathumh pak tatmei ny, hamh e thei zaeng neih thumh lungc khou RINGHPOUC rui katuang baengsaeng rui nang ta adowna, nang kandih khou ravpyan tiguangna, katuang baanchara rui Isaraelmei kandic kapwm khou theihmei phungc guangmei ta kahaw bu cho? Ai RINGHPOUC khou tabui lat dawlou o na cho?”

¹³David rui Gad khou daw the, “Ai alung ryanra langvna ramv lat sa khang thay mak khe! Tiki maansei rui ata dandi tiimei ta thu ai laa nii mak khe. RINGHPOUC rui dandi tii pudi tho, kamei thu zauzian thaymeipu e cho.”

¹⁴Kumna RINGHPOUC rui Isaraelmei ruc khou ravpyan tiguangna meic 70,000 theic the.

¹⁵Mi tangv tei Jerusalem ta swmaan khang kamei rui baanchara thouclou the, tiki kamei kalung kalaic datna baanchara khou tei sa the, “Nthaekc tho! Biu the!” Mi ganv khou tei baanchara tei Jebusimei Arauna tuang laudybamv khou ding bam khwan e.

¹⁶Baanchara tei Jerusalem ta swmaan khang kabaanh khou baengsaeng sinna kaphay kandih dingtow makna ding bammei ta David rui how the. Khoutei David khatni zaengsiphey piu bammei kapy swmei nunc tei kaniw zaw kandic nkhum key tangc the.

¹⁷Khoutei David rui kumna huayney the, “He Ravguangc, nkhuaimei taanv taanhmei kiu ai hei the. Meic sing phuh khang latdanv patmeipu kiu ai hei dyng the. Mi sansimei nunc hei rui tabui taanclouna cho? He RINGHPOUC aRacguangc, ai khatni akai kaikhuncmei ta dandi tiilou o, kumna amei nunc ta thu kanlou o?”

¹⁸Arauna tuang laudybamv thangc tei tatna RINGHPOUC khang ravchabamv kasiamh o twna David khou latdanv tii o twna RINGHPOUC tuang baanchara tei rui Gad khou sa the.

¹⁹David rui RINGHPOUC tuang lat piuna Gad rui samei kumcna tat the.

²⁰Mi laudybamv khou tei Arauna tei kanac mpouh gaanv padeih lev twna gehu dyna bam khou kaniw rui baanchara ta tei how the, kumna kanac nunc tei pakna nkamh tat kan the.

²¹Arauna[1] tei David guangmei ta tei how lana, kamei kaluak kalat laudybamv tei mpatlouna tat patna kazaw kandih nkhum key tangcna kalum the.

²²David rui kakhou sa the, “Ravpyan hei ti-nthaekclou khang RINGHPOUC khang ravchabamv akhat kasiamh khang nang tuang laudybamv hei akhang zuanclou tho. Kamanv kaguayna ntanghna ai tii puni de.”

²³Arauna rui daw the, “Guanghle, laa tho, kumna nang khang gay nimei kiu taanc tho. Khaeng khang ni mi guaichic nunc hei piu tho, puatkat khang mi gehu hei kat tho kumna khaengmei thing khang mi laudypaeng hei piu tho.”

²⁴Khoutei guangh rui daw the, “Kiuc hamh e. Ai kamanv kaguayna tii puni de. Nang tuang puat khatni kamanv key makmei tuang puat rui ai RINGHPOUC khang khaeng ni tuang hamh e.”

²⁵Kumna kamei rui Arauna khang mi laudybamv manv tei kachaekc syanpaek 600 tii the.

²⁶Kamei rui mi bamv khou tei ravchabamv akhat kasiamh thau lana rawna khaengmei khatni alamvpuatkat kat the. Kamei rui huayney pwkhou RINGHPOUC rui dawlouna tingkauh thangc rui mai tikeyna ravchabamv khou naimei ravcha tei raw kan the.

²⁷RINGHPOUC rui baanchara ta tei katuang baengsaeng tei lou dat kan khang sa the, kumna baanchara tei piu the.

²⁸David rui Arauna tuang laudybamv khou swloumei ravchabamv khou khaengmei tei laalouna kamei rui huayneymei dawlou the twmei David rui mi khou tei how the.

²⁹Mi douc tei tazikramv khou Mousi rui kasiamhloumei RINGHPOUC tuang pheykai khatni ravcha rawmei tuang ravchapaeng tei Gibeon khou nai bam khwan e;

³⁰tiki David tei Ravguangc ta kalum khang mi bamv thangc tei tat ngam mak khwan e kalam thu kamei RINGHPOUC tuang baanchara tuang baengsaeng ta ping khwan e.