Read Rongmei Naga 1 KINCHAKH 22 Bible Online

1 KINCHAKH 22 - Rongmei Naga bible

1 KINCHAKH 22

¹Kumna David rui sa the, “Mi hei RINGHPOUC Ravguangc tuang Ravkai nai nimei bamv the. Isaraelmei rui rawna khaeng nimei tuang ravchapaeng mi bamv khou hei nai e.”

²Isaraelmei kandic khou lungc bammei zaatc baihmei guay ta guang kaduai khang David rui latdanv pat the, kumna kamei rui kaniw ta taanv titaanc the. Gaanvsaekc rui Ravkai kasiamh khang ntauh dangv kasiamh the.

³Thing tuang raenghmun khou piu khang zuatpi khatni kakapc kariumei na guay kasiamh khang kamei rui ntanh mpeyna tii the, kumna tanzinc tei geic langv tina karith sini nthau dat ngam mak khe.

⁴Turmei lev Sidonmei rui Sidar thingdangv mpeyna phungc guang khang kamei rui swlou the.

⁵David rui kakhanh the, “Anac mpouh Solomon rui kasiamh nimei Ravkai hei gaymei, kandih khou kazanc dinhmei kai sw puni. Tiki kamei thu alauc di he kumna ramh thay geih mak he, kumhpui zaeng rui ai rui mi khang tei chamdaanvlou khang di the.” Kumna David rui kamei theih mak khou kana mpeyna chamdaanvlou duc khwan e.

⁶Kamei rui kanac mpouh Solomon ta kaw guangna Isarael Racguangc RINGHPOUC khang Ravkai kasiamh o twna latdanv tiilou khwan e.

⁷David rui kakhou sa the, “Anac mpouhle, RINGHPOUC aRacguangc ta chakhwang sw khang ai Ravkai akhat kasiamh nii e.

⁸Tiki ai meic swluai geic langv khe khatni suc-rih sw geih langv khe twna sa the. Kumna ai rui zei tikey geic langvmei zaeng rui RINGHPOUC Ravkai kasiamh khang tei kamei rui nuhlou mak khe.

⁹Tiki kamei rui akhou latdyng akhat swlou the. Kamei rui sa the, ‘Nchu-nzaenghna dihsinmei nang nac mpouh gaanv khat lungc guang puni, kalam thu ai rui kata zauczihmei guay khou rui nchu-nzaenghna lungh khang tiswlou puni. Kazanc tei Solomon twna kaw puni, kalam thu kazuk khou ai rui Isaraelmei ta nchu-nzaenghna giuga makna tilungclou puni.

¹⁰Kamei rui akhang Ravkai kasiamh puni. Kamei rui anac mpouh sw puni khatni ai rui kapu sw puni. Kakikta rui Isaraelmei khou tingsaengzaeng guangh swna lungc puni.’ ”

¹¹David rui sa dat re, “Anac mpouhle, RINGHPOUC nang Racguangc rui nang ta nduanghlou diu, kumna katuang latdyng theilayna nang rui kakhang Ravkai sw nimei tei sw ngam kan di tho.

¹²Katuang Riakdanv theilayna nang rui Isaraelmei ta sin ngam khang RINGHPOUC nang Racguangc rui nang khou ningting-takh tiilou pudi tho.

¹³RINGHPOUC rui Isaraelmei khang Mousi khou tiiloumei latdyn kaguayna tei nang piu e thei nang ngam tu rana puni. Nang lwm ntip bo, nang ramhkhat na ta sini ping riu.

¹⁴Ravkai kasiamh khang tei thu ai rui kachaekc matrik ton 3,400 daandi matrik ton 34,000 mbu khuamlou kan the. Mi ruc khou tei rui tanzinc lev ntanh kasing thay makna nai the. Thing lev ntauh ni khuamlou kan the, tiki thing lev ntauh thu laa haap dat geic nina di he.

¹⁵Taanvtaanhmei meic mpeyna nai the. Thing, ntauh khatni baanhthaymei taanv taanc nimei meic mpeyna nai the.

¹⁶Kachaekc, daandi, tanzinc khatni ntanh taanv taanc nimei meic nai the. Ntaw thu taanv tei kahouh tho, kumna RINGHPOUC rui nang ta nduanghlou diu.”

¹⁷Solomon ta nkhav khang David rui Isaraelmei kapy swmei guayna khou latdanv pat the.

¹⁸Kamei rui sa the, “RINGHPOUC nangniw Racguangc rui nangniw ta nduanghlouna kabamv kathuicna khou nchu-nzaenghmei tiilou the. Mi kandic khou lungc bam khwanmei guay ta ai rui rih ngamlou the, ntaw thu kaniw guayna nang bangc khou khatni RINGHPOUC bangc khou gutlou the.

¹⁹Ntaw thu nangniw lung kapwm gutna RINGHPOUC nangniw Racguangc siamruai sw tho. RINGHPOUC tuang Latdyng Khuk khatni kata kalummei khou sinswmei bamv khang Ravkai tei kasiamh thau tho.”