Read Rongmei Naga 1 KINCHAKH 28 Bible Online

1 KINCHAKH 28 - Rongmei Naga bible

1 KINCHAKH 28

¹Isaraelmei meicdaihmei guayna Jerusalem khou guang kaduai khang guangh David rui latdanv pat the. Kumna kaikhwang guay tuang meicdaihmei guay, guanghdih khou taanv phunghmei guay, puinac tuang kapy swmei guay, guangh tuang khatni guangh nac nunc tuang lanv khatni khouringh khounah sinmei guay kalingna guanghkai tuang meicdaihmei guay, rihmei daihmei guay, khatni nthukmei meic kaguayna Jerusalem khou guang kaduai the.

²David rui meic guayna hu khou tei dingna kaniw khou sa the: “Akandihmei nuncle, ai rui samei hei nkinglou o. Aniu Racguangc RINGHPOUC tuang phaybah bamv swmei Latdyng Khuk tei loumei bamv khang ai rui kai akhat kasiamh nii e. Kata kalum khang kai akhat kasiamh khang ai chamdaanv the,

³tiki Ravguangc rui mi kai tei ata taanc riu twna sa the, ai hei suc-rih bamv khou tatna abaanc khou zei tikey geic the.

⁴Isarael Racguangc RINGHPOUC rui ata khatni akikta ta tingsaeng Isaraelmei guangc swna bam khang kadahlou the. Kamei rui Juda kaikhwang ti hei kapy swmei khang kadahlou the, kumna Juda kaikhwang khou rui apu kai kaikhunc ta kadah pat the. Mi kai kaikhunc khou tei rui ata kadah patna Isaraelmei tuang guangc tiswlou the.

⁵Kamei rui akhou nah mpouh mpeyna tiilou the, mi pang khou tei rui RINGHPOUC tuang guangcdic Isarael ti hei sin khang Solomon ta kadah the.

⁶“RINGHPOUC rui akhou sa the, ‘Nang nac mpouh Solomon hei atuang Ravkai kasiamh nimeipu kiu the. Ai rui kata anac mpouh khang kadahlou the, kumna ai rui kapu sw puni the.

⁷Ntaw kumna kamei rui atuang latdanv khatni latdyn guay hei piu chuyna piu bam e thei ai rui kaguanghdic hei tingsaengzaeng tinailou puni.’

⁸“Kumhpui zaeng rui ntaw, amei nuncle, aniu Racguangc hu khou khatni RINGHPOUC tuang mei Isaraelmei guay na hu khou ai rui nangniw khou sa e, twmei thu nangniw mi kandic gaymei ramv khou hei lungcna bam khang khatni mi hei nangniw tounac nunc tuang swna bam khang aniu Racguangc RINGHPOUC rui tiimei latdanv guay tei piu nthuihna piu o.”

⁹Kumna Solomon khou kamei rui sa the, “Anac mpouhle, nang nang pu nunc Racguangc ta thay o, kumna nang lung akhat na swna kasiamruai sw niina sw o. Aniu lungning khatni aniu rui kahawmei guay tei kamei thay e. Nang rui kadaeng khou guang ti thei kamei rui laalou puni; tiki nang rui kakhou rui tat pat ti thei kamei rui nang ta ganc pat puni the.

¹⁰RINGHPOUC rui nang ta katuang nthanmei Ravkai hei kasiamh khang kadahloumei tuang the twmei nang thay nina e. Ntaw thu mi kai tei taanc tho— nang lung dinglouna taanc tho.”

¹¹Ravkai taanc nimei thak guay ramh rykai khatni baihmei kailangv guay khatni paapc kuakloumei bamv Nthan Liangmei Bamv hei guay hei David rui Solomon khou tiilou the.

¹²Kaimav, mi khou tei nai nimei kailangv guay, Ravkai tuang na guay khatni RINGHPOUC khang kat guangloumei puat guay lou nimei puatrymei kai mi guay hei taanc nimei thak kalungning khou nai bammei guay tei dinclou the.

¹³Ravkai khou taanvtaanh khang khatni Ravkai taanvna sin khang amuh nunc khatni Levimei nunc khou nsinlou nimei thak guay tei ni David rui kakhou dinclou the.

¹⁴Daandi khatni kachaekc hei mu-lai khou azuh piu ni,

¹⁵thauhmai khou khatni katiangc akhat khou azuh piu ni,

¹⁶daandi paeng guay khou azuh piu ni, khatni Ravguangc khang katmei ntyan mbaengloumei kachaekc tuang paeng akhat khat khou tei azuh piu ni twmei guay dinclou the.

¹⁷Zanh nrwang, kaikhuang khatni muanh khou tei kachaekc nthanmei azuh gutna kasiamh ni, nkuak guay kasiamhmei khou tei daandi khatni kachaekc azuh gut ni,

¹⁸khatni agaw ravchapaeng khatni RINGHPOUC tuang Latdyng Khuk ruc khou kaswkaeng laamv ntyngna bammei kerubim ta puanc nimei taulai tei kachaekc nthanmei azuh gutna kasiamh ni twmei dinclou the.

¹⁹Guangh David rui sa the, “Kumna taanc nina e twna RINGHPOUC rui dincloumei guay hyloumei buk khou tei mi guay hei nai ngam the.”

²⁰Guangh David rui kanac mpouh Solomon khou sa the, “Nang lung ding o khatni bauc o. Taanv tei kahouh tho kumna tabui bui sw sini nthaekc dat ri tho. Ai rui kasiamruai sw bammei RINGHPOUC kamei rui nang ta nduanghlou puni twna sa e. Kamei rui nang ta ganclou lak ge, kumna Ravkai tei taanc luai mak saanv kamei rui nkhavlou puni.

²¹Ravkai khou taanvtaanc nimei amuh nunc khatni Levimei nunc ta ni kaniw thouc tiilou ngam kan the. Taanv lam kathuicna khou taanc ngammei nunc rui nang ta nkhav khang chamdaanv bam the, kumna kaniw tuang kapy swmei guay ni nang rui sa samei piu puni the.”