Read Rongmei Naga 1 KINCHAKH 29 Bible Online

1 KINCHAKH 29 - Rongmei Naga bible

1 KINCHAKH 29

¹Guangh David rui guang kaduai bammei guay khou tei kauc pat the, “Anac mpouh Solomon hei Ravguangc rui kadahloumeipu the, tiki kamei hei alauc di he, ramh thay mak he. Taanc nimei taanv hei thu daic the, kalam thu mi hei maansei tuang guangckai hamh e, RINGHPOUC Ravguangc tuang Ravkai e.

²Ngammei kamv kana guay: kachaekc, daandi, tanzinc, ntanh, thing, kunghmei ntauh guay, ntauh khatni tagiatc tauc mpeyna khuamlou kan the.

³Mi guay ruc khou rui atuang charay khou rui daandi khatni kachaekc ni tiilou kan the, kalam thu ai Ravguangc tuang Ravkai tei nzian e.

⁴Ophir kachaekc rui swmei kachaekc talent 3000, mi kai tuang ngaengsaengc tei teylou khang sw nthanloumei daandi talent 7000 e.

⁵Khatni kachaekc lou kazimei twn tei kachaekc lou, daandi lou kazimei twn tei daandi louna taanv guay hei baanh thaymei nunc rui taanc puni the. Ntaw thu thow thow pwni RINGHPOUC khang kabaanh daicna tiipatlou nimei nai tu cho?”

⁶Khoutei puinac tuang kapy nunc, kaikhwang guay tuang meicdaihmei nunc, rihpy nunc, khatni guangh tuang lanv sinmei nunc tei tii thau geic the.

⁷Ravkai taanh khang tei kachaekc matrik ton 170 mbu, daandi matrik ton 340 mbu, tanzinc matrik ton 620 dou khatni ntanh matrik ton 3,400 dou tii guanglou the.

⁸Kunghmei tauc naimei guay rui Ravkai lanvkai khou tii guanglou the, hei tei Levimei Gershon puinacmei Jehiel rui sin the.

⁹Meic nunc rui RINGHPOUC khang tii pat niina tiipat the kumna heizumei tii guangmei khou tei kaniw neihla the. Guangh David tei ni kanganv tangcna neihla the.

¹⁰Meic guayna guang kaduai bammei hu khou tei guangh David rui RINGHPOUC ta thuanc the. Kamei rui sa the, “He aniw pupouc Jakob Racguangc RINGHPOUC, nang ta tingsaeng tingsaengzaeng thuanc bam diu!

¹¹Nang hei tancbauhmei katik kahym daihmeipu e. Tingpuk kandih khou naimei katana hei nang tuang e. Nang hei kaguayna ruc khou daic liangmei guangc e.

¹²Lungcgay chingkhiuhmei guay hei nang khou rui guang tuang e; nang pumtan khatni nang ngamv rui ramh katana sin e. Nang rui thow thow ta pwni titanclou ngam e, tidaiclou ngam e.

¹³Ntaw thu, He aniw Racguangc, aniw nang ta thuancku e, khatni nang zanc hymdaihmei ta thuanc e.

¹⁴“Tiki ai khatni amei nunc rui nang khang tii khang ramhkhat na sini maek e, kalam thu ramh katana hei nang rui tiilou tuang rana de, kumna nang tuang tei aniw tii dat bammei tuang de.

¹⁵He RINGHPOUC, nang rui thay e twmei thu aniw pupouc nunc kumcna aniw ni gin kumcna lungc bam tuang de. Aniw panty hei tatruan patmei meicswng na kumh tuang de, kumna aniw theihmei khou rui duak ngam mak ge.

¹⁶He RINGHPOUC aniw Racguangc, nang zanc ta champouh khang rui Ravkai kasiamh khang aniw rui mi lanv guay hei nang khou phungc guang e, tiki mi guay hei nang rui tiguang tuang de, mi guay hei nang tuang de.

¹⁷Nang rui meic katana lung ta nchanv e kumna lungning nthanmei ta nang kahaw e twmei ai thay e. Lungning nthanna tii niina ai rui mi guay hei nang khang tiimei tuang the. Mi khou hei guang kaduai bammei nang mei nunc rui nang khang tii niina tii guangmei tei ai how the.

¹⁸He aniw pupouc Abraham, Isak khatni Jakob Racguangc RINGHPOUC, nang mei nunc rui nang khou kumna lungh gutna bam khang tiswlou o, khatni kaniw nang khou lwm nuhmei swna lungc tanh tan bam khang tiswlou o.

¹⁹Anac mpouh Solomon hei nang tuang latdanv guay kalung kapwm gutna piu bam khang khatni ai rui chamdaanvloumei Ravkai hei kasiamh ngam khang nkhavlou o.”

²⁰“RINGHPOUC nangniw Racguangc ta thuanc o!” twna David rui latdanv pat the. Meic guayna tei kaniw pupouc Racguangc RINGHPOUC ta thuanc the, kumna kaniw nkhumlaamv keyna RINGHPOUC ta khatni guangh ta kalum the.

²¹Nthuanh thauna kaniw khouringh dowluaina khaeng the, mi guay tei RINGHPOUC khou katlou the, kumna meic nunc ta titu the. Mi ruc khou tei rui guaituamchic 1000, lauziuchic 1000, lauziunac 1000 ravchapaeng khou rawna khaeng the. Kaniw drakhadui ni kat the.

²²Kumna mi nungc tei kaniw RINGHPOUC hu khou tuna zangvna neihlalou the. Kaniw rui Solomon ta guangh the twna kaneimei swna kauc patlou the. Kaniw rui kata RINGHPOUC zanc khou guangh swna thauh teylou the, kumna Zadok ta ni amuh swna thauh teylou the.

²³Kumna Solomon tei RINGHPOUC rui tiiloumei kapu David tuang guanghbamv khou kapu phaan guangh sw the. Kamei hei ngammei guangc sw the kumna Isaraelmei kapwm rui kalat piu the.

²⁴Meicdaihmei guay, rihmei guay, khatni David nac mpouh guay rui nganv Solomon ta kaniw tuang guangc swna lungc ni the twna latdyng sw the.

²⁵RINGHPOUC rui Solomon ta Isaraelmei zaat hu khou tichampouhlou the khatni Isarael khou guangh sw kanmei guay pang khou rui katik kahym tidaic lianglou the.

²⁶Heikumna Jesse nac mpouh David tei Isarael kandic kapwm khou guanghtulou khwan e.

²⁷Kamei rui Hebron khou tingkwm chanei khatni Jerusalem khou tingkwm 33, kaguayna Isarael kandic khou tingkwm 40 guanghtulou khwan e.

²⁸Kamei lungcgayna meic nunc rui chakhwang champouhna, gaanvsuh gaanvthaih lungc tangclouna theic the. Kanac mpouh Solomon rui kaphaan guanghtu lyn dat the.

²⁹Guangh David tuang pary hei kahouhmei khou rui thauna luaimei nganv muhzwng gaanvthumh: Samuel, Nathan khatni Gad tuang buk khou hylou the.

³⁰Kamei hei akumhna guangh swna sinlou cho, kamei adih ngammeipu cho twmei khatni kakhou, Isaraelmei khou khatni kainingmei guangcdic guay khou pat kanmei kaguayna tei mi khou tei hylou the.