Read Rongmei Naga 1 KINCHAKH 5 Bible Online

1 KINCHAKH 5 - Rongmei Naga bible

1 KINCHAKH 5

¹Mi hei Jakob nac mpouh gaanvthaih liangmei Reuben kikta e. (kamei rui kapu laamvnow khou tatloumei zaeng rui nah mpouh nareimei rui laa nimei dam tei kakhang tii mak khwan e; hei tei Josep khang tii kan khwan e.

²Tiki Juda kaikhwang tei tanc liangmei kaikhwang swna kaikhwang kaguayna khou kakai kaikhwangmei rui guangh sw khwan e.)

³Reuben nac mpouh gaanv padeih nai khwan e. Mi nunc kiu thu: Hanok, Pallu, Hezron, khatni Karmi hei guay hei e.

⁴Joel kikta nunc hei kabangc khou hyloumei guay hei e: Shemai, Gog, Shimei,

⁵Mika, Reaia, Baal khatni

⁶Beera, kamei hei Asiriamei guanghdaihmei Tiglak-Pileser rui ginramc thangc kangmei swna zay tat kanmeipu e. Beera hei Reuben kaikhwang tuang kapy e.

⁷Reuben kai kaikhunc tuang meicsing chanhmei buk khou puinac kapy nunc zanc mi kumcna hylou the: Jeiel, Zekaria,

⁸khatni Bela, Bela hei Azaz nac mpouh khatni Shema tou Joel puinacmei e. Mi puinacmei Aroer khou khatni mi ramv khou tei rui dihpy thangc Nebo lev Baal Meon nganv khou lungc khwan e.

⁹Gilead ramv khou kaniw tuang kiruai mpeyna nai khwan e, kum tina kaniw rui neihpat biak thangc Euphratis duithuak nganv laa tangc khwan e.

¹⁰Guangh Saul zuk khou Reuben kaikhwangmei rui Hagrimei ta adowna kaniw ta rihbamv khou dowluai ngamna Gilead tuang neihpat ramv tei kaniw rui laa khwan e.

¹¹Gad kaikhwangmei hei Reuben kaikhwang tuang dihpy thangc Bashan ramv khou neihpat biak thangc Saleka nganvna lungc khwan e.

¹²Joel hei puinac daic liangmei tuang pupouc the, kumna Shapham rui kaneimei daic liangmei puinac tuang pupouc the. Janai khatni Shaphat tei Bashan khou bammei puinac baihmei kanei tuang pupouc the.

¹³Gad riangluaicmei baihmei guay tei kabangc khou hyloumei puinac chanei tuang mei nunc the: Mikael, Meshullam, Sheba, Jorai, Jakan, Zia, khatni Eber hei guay hei the.

¹⁴Kaniw tei Huri nac mpouh Abihail kiktamei e, kaniw tuang pupouc nunc hei mi kumna suiclou e: Abihail, Huri, Jaroa, Gilead, Mikael, Jeshishai, Jahdo, Buz.

¹⁵Abdiel nac mpouh Guni tou Ahi tei mi puinacmei nunc tuang kapy the.

¹⁶Kaniw tei Bashan khatni Gilead ramv khou, mi khou tei naimei kaidai guay khou khatni Sharon khou naimei khouringh byn ramv guay khou lungc khwan e.

¹⁷(Mi Ki hei Judamei guangc Jotham khatni Isaraelmei guangc Jeroboam zuk khou rui chakloumei tuang e.)

¹⁸Reuben, Gad khatni neihpat biak thangc bammei Manase kaikhwang khou nggih, baengsaeng, khatni sauhpai sin thaymei rihmei 44,760 nai khwan e.

¹⁹Kaniw rui Hagrimei zaat Jetur, Naphis, khatni Nodab puinac nunc ruc khou rihkey khwan e.

²⁰Kaniw rui Ravguangc khou lwmlouna nkhavlou khang huayney khwan e kumna Ravguangc rui kaniw tuang huayneymei dawlouna Hagrimei khatni kaniw biak lianghmei guay ta kaniw rui rihngam khwan e.

²¹Kaniw rui zauczihmei khou rui guaikuan 50,000 lauziu 2,50,000 khatni kuanniam 2000 laaguang khwan e. Kumlana meic 1,00,000 ni nym guang khwan e.

²²Zauczihmei geihmei ta thu kaniw rui dowluai khwan e, kalam thu mi ricbamv tei Ravguangc rui chwnloumei theilayna adow tuang khwan e. Kaniw ta ginramdic thangc nym tat mak saanv kaniw mi ramv khou tei lungc bam khwan e.

²³Neihpat biak thangc bammei Manasemei nunc hei Bashan ramv khou lungcna dihpy biak thangc Baal Hermon, Senir, khatni Hermon Chyng nganv lungc tangcna meic kingckiucna lungc khwan e.

²⁴Kabangc khou hyloumei nunc hei kaniw puinac nunc tuang kapy swmei nunc e: Epher, Ishi, Eliel, Azriel, Jeremia, Hodavia, khatni Jahdiel. Kaniw hei kazanc tatmei rihmei nunc e khatni kazanc dinhmei puinac nunc tuang kapy nunc e.

²⁵Tiki meic nunc tei kaniw pupouc Ravguangc khou lwm nuh makmei swna Ravguangc rui mi kandic khou tei rui alay gancloumei zaat nunc tuang rav ta kalum tat khwan e.

²⁶Kumna Ravguangc rui Asiriamei tuang guanghdaihmei Pul (Tiglath Pileser twna ni kaw e) ta kaniw khou thouc guang khwan e. Kumna kamei rui Reubenmei, Gadmei, khatni Neihpat biak thangc bammei Manasemei ta phungc tatna Hala, Habor, khatni Hara ramv khou khatni Gozan duithuak daeng khou tilungclou khwan e.