Read Rongmei Naga 2 KINCHAKH 10 Bible Online

2 KINCHAKH 10 - Rongmei Naga bible

2 KINCHAKH 10

¹Rehoboam tei kata guangh tiswlou khang twna dihpy thangc bammei Isaraelmei tuang kapy swmei guay guang kaduai bammei Sekem kaidai khou guang the.

²Guangh Solomon ta pingna Izip khou paklouna bammei Nebat nac mpouh Jeroboam rui mi chamv tei chu lana kakai khou hanc guang dat the.

³Dihpy thangcmei Isaraelmei guay tei rui Jeroboam ta kawna kaniw meic guayna Rehoboam daeng khou guangna sa the,

⁴“Nang pu rui aniw khou puatrith mphunlou the. Nang rui mi puatrith guay tei ti-nthaanlou pw e thei aniw hei nang tuang mei nunc sw ni the.”

⁵Rehoboam rui daw the, “Mi lam khou hei kakhanh khang zaeng neih thumh tiilou o. Mi tangv kiu rui ai guang dat puni.” Kumna meic nunc tei ntamv dat the.

⁶Guangh Rehoboam rui kapu Solomon tuang latdinhpouc gaanvthaih nunc khou thanv the. “Mi nunc khou tei tabui lat daw tikhona cho?” twna kamei rui thanv the.

⁷Kaniw rui daw the, “Nang rui meic nunc ti hei nzianna kaniw rui samei tei kakhanhlouna kaniw ta tipian khang swlou ti thei kaniw nang lat piuna nang siamruai sw tanh tan bam puni.”

⁸Kamei rui gaanvthaih nunc lat tei chulou makna kamei lev daicthau nchamcmei kapammei chabwan nunc ntaw katuang latdinhpouc sw bammei nunc khou tei thanv the.

⁹“Ai rui tabui lat sa ti kho twna cho? Kaniw tuang puatrith ti-nthaanlou o twna sa bammei khou hei ai tabui lat sa tikho cho?” twna kamei rui thanv the.

¹⁰Kaniw rui daw the, “Nang rui kaniw khou kumna daw nina e: ‘Abaanc zungngiatna hei apu syan suangc daic e.

¹¹Apu rui nangniw ruc khou puatrith mphunlou the; ai rui mi ruc khou tei haaplou puni. Kamei rui nangniw ta builwang rui kathamv the, ai rui nangniw ta takuanh baimei builwang rui bai puni.’ ”

¹²Zaeng neih thumh tangv Jeroboam lev meic nunc tei guangh Rehoboam daeng khou kamei rui saloumei theilayna guang the.

¹³Guangh tei rui gaanvthaih nunc lat tei laalou makna lat tancna kaniw khou sa the.

¹⁴Chabwan nunc rui samei tei kumcna kamei rui sa the, “Apu rui nangniw ruc khou puatrith mphunlou the; ai rui mi ruc khou tei haaplou puni. Kamei rui nangniw ta builwang rui kathamv the; ai rui takuanh baimei builwang rui bai puni!”

¹⁵Hei tei Shilo khou bammei muhzwng Ahija khou rui RINGHPOUC Ravguangc rui Nebat nac mpouh Jeroboam khou saloumei tei tiguang tangh khang e. Kum tina guangh tei meic nunc lat tei chulou mak khe.

¹⁶Guangh tei rui kaniw lat tei chulou mak khe twmei meic nunc tei thay pwkhou kaniw rui kauc thau the, “David khatni kakai kaikhunc hei key kan di tho! kaniw rui aniu khang tabui swlou thena cho? Isaraelmei guayle, aniu kai tat dat kan di kho! Rehoboam kiu kakai khang na lungc bam kan di tho!” Kumna Isaraelmei guay tei kakai kakai tat dat kan the.

¹⁷Rehoboam ta tei Juda ramv tuang guangh khang na ganclou duc the.

¹⁸Mi tangv tei guangh Rehoboam rui namna taanv titaanhmei nunc ta sinmeipu Adoniram ta Isaraelmei nunc khou thouc guang the, tiki kaniw rui kata ntauh nkwam luai the. Mi khou tei, Rehoboam tei kaluak kalat katuang takuanh gari khou dungcna Jerusalem thangc pak tat kan the.

¹⁹Mi khou tei rui thauna Isarael tuang dihpy guangcdic tei David kai kaikhwangmei ta nuh mak khe.