Read Rongmei Naga 2 KINCHAKH 11 Bible Online

2 KINCHAKH 11 - Rongmei Naga bible

2 KINCHAKH 11

¹Guangh Rehoboam tei Jerusalem khou guang dat lana Benjamin lev Juda kaikhwang khou rui rihphyan gay liang liangmei 1,80,000 khuam kaduai the. Kamei rui dihpy biak kaikhwang guay Isaraelmei ruc khou rih keyna kaniw ta sin dat ni twna ning khwan e.

²Tiki mi ganv khou tei muhzwng Shemaia khou RINGHPOUC rui sa the.

³Solomon nac guangh Rehoboam khatni Benjaminmei lev Judamei guay khou sa o twna kumna sa the,

⁴“Nangniw Isaraelmei nchamc ta adow nuh mak ge. Nangniw kakai kakai hanc dat tho. Pat kanmei tei ai rui ningmei e.” kaniw rui RINGHPOUC tuang latdanv ta piuna Jeroboam ta adow khang tat mak khe.

⁵Rehoboam rui Jerusalem khou bamna kabangc khou hyloumei Juda lev Benjamin tuang kaidai guay hei raengh raeng the:

⁶Bethlehem, Etam, Tekoa,

⁷Bethzur, Soko, Addullam,

⁸Gat, Maresha, Zip,

⁹Adoraim, Lakis, Azeka,

¹⁰Zora, Aijalon, khatni Hebron.

¹¹Kamei rui mi kaidai guay hei raeng ntipna raenglouna kaidai kathuic khou rihpy akhat akhat lou the. Kaidai kathuicna khou hei taektw, Olive thauc, drakhadui,

¹²khatni nggih lev buy nzanhlou the. Heikumna kamei rui Juda lev Benjamin ta sin the.

¹³Isarael kandic khou bammei amuh nunc khatni Levimei nunc Juda kandic khou key the.

¹⁴Levimei nunc tei kaniw tuang khouringh byn khatni baihmei ramv guay ganclouna Juda khatni Jerusalem khou key the, kalam thu Isaraelmei guangc Jeroboam khatni katang khou guanghtu datmei guay rui kaniw ta RINGHPOUC tuang amuh nunc swna taanv titaanc ni tuang hamh khwan e.

¹⁵Jeroboam rui katuang rav baihmei ta kalummei bamv khatni ravsic lev guaituamchic maengc ta kalummei bamv khou thouh swmei nunc khang katuang amuc nunc lou dat the.

¹⁶Isaraelmei kaikhwang guay khou rui, Isarael Racguangc RINGHPOUC ta kalum nii changhmei guay tei Levimei nunc thei Jerusalem khou key the, kumna kaniw thu kaniw pupouc Racguangc RINGHPOUC khang khaengna kalum the.

¹⁷Mi hei rui Juda guanghdic pumtan titanclou the, kumna kaniw rui Solomon nac mpouh Rehoboam ta tingkwm kathumh machuang the, kumna kaniw guangc David khatni guangh Solomon zuk khou kumcna lungc the.

¹⁸Rehoboam rui Mahalat ta kanow khang kaw the. Mahalat pu hei David nac mpouh Jerimot re. Kapui rui Eliab nac aluhpui Jessi toupui Abihail e.

¹⁹Kaney nac mpouh gaanv thumh—Jeus, Shemaria, khatni Zaham nai khwan e.

²⁰Katang thangc kamei Absalom nac Maaka ta kaw datna mpouh gaanv padeih, Abija, Attai, Ziza, khatni Shelomit puanc khwan e.

²¹Rehoboam hei kanow kaguayna 18 khwan e, kumna laamvnow 60 nai khwan e. Kumna kanac mpouh gaanv 28 aluh 60 khwan e. Kamei kanow khatni laamvnow guay pang khou rui Maaka ta nzianliang khwan e,

²²kumna kamei rui Maaka nac Abija ta kanac guay pang khou rui nziandiangc khwan e, kumlana kamei Abija ta kaphaan lynmei khang kadahlou khwan e.

²³Rehoboam rui ningtyngna kanac mpouh guay khang taanv nzanhlou the kumna Juda lev Benjamin ramv khou raengh raengloumei kaidai guay khou thouc nzanhlou the. Kamei rui kalung daicna kaniw khang kaphianhlou the, kumna kaniw khang now ni phulou the.