Read Rongmei Naga 2 KINCHAKH 12 Bible Online

2 KINCHAKH 12 - Rongmei Naga bible

2 KINCHAKH 12

¹Rehoboam tei guangh swna ngamv phungc rap khou rui thauna kamei khatni kamei nunc tei RINGHPOUC tuang Riakdanv tei ganc the.

²Rehoboam rui guangh swmei tuang panguhmei kwm kaniw rui RINGHPOUC ta mpatloumei tuang dandi tii the. Izipmei guangc Shishak rui Jerusalem ta adow the.

³Takuanh gari 1200, takuanh ricmei 60,000 khatni kasing chak dat thay lakmei ricmei Libiamei, Sukkimei, khatni Sudanmei ricmei kazauhna nduangh guangna adow the.

⁴Kamei rui Juda tuang raengc raengloumei kaidai guay tei lay lana Jerusalem guang tangc the.

⁵Muhzwng Shemaia rui Shishak ta pingna Jerusalem khou guang kaduai bammei guangh Rehoboam khatni Judamei kapy nunc daeng khou guangna sa the, “RINGHPOUC rui nangniw khou sa e: ‘nangniw rui ata mpatlou the, kumna ai rui ni nangniw ta Shishak baanc khou tiilou the.’ ”

⁶Guangh khatni kapy nunc tei kaniw paapc taanc dyng the twmei laa the kumna sa the, “RINGHPOUC rui taanc bammei hei nchumh dyng the.”

⁷Hei tei RINGHPOUC rui how lana, Shemaia khou sa dat re, “Kaniw paapc taanc dyng the twna samei theilayna ai rui kaniw ta swmut lak khe. Tiki Shishak rui adow pwkhou, kaniw ringc kungc sihna ringc puni the. Alungpuam kapwm tei Jerusalem khou keylou lak khe,

⁸tiki Shishak rui kaniw ta laa puni the, khou kiu asiamruai swmei lev kandih kaipouc nunc siamruai swmei kiu akumh cho thay puni the.”

⁹Guangh Shishak Jerusalem khou guangna Ravkai khou khatni guanghkai khou loumei lanv guay laa kan the. Kamei rui ramh guayna, guangh Solomon rui kasiamhloumei kachaekc tuang nggih guay tei kazauhna laa kan the.

¹⁰Mi guay phaan tei Rehoboam rui tanzinc tuang nggih pang kasiamh dat lana mi guay tei guanghkai raengcmun gaekmei rihpy nunc rui gaeklou khang nsinlou kan the.

¹¹Guangh tei Ravkai thangc tatmei kathuic, rigaanv nunc tei rui nggih guay tei sin the kumna luai e thei kabamv khou rylou dat the.

¹²Kamei rui RINGHPOUC kut gutlou dat timei zaeng rui RINGHPOUC lungpuam mav khou kata swmaan mutsutlou mak khe, kumna Juda tei gayna lungc dat the.

¹³Rehoboam Jerusalem khou guangh swna lungclou khwan e, kumna kangamv daicna lungclou khwan e. Kamei katingkwm 41 khou guangh swna Isaraelmei kaidai guay pang khou rui kata kalummei bamv khang kadahloumei bamv Jerusalem khou kamei tingkwm 12 guanghtulou khwan e. Rehoboam pui tei Ammonmei Naama khwan e.

¹⁴Kamei simei taanv taanc khwan e kalam thu kamei RINGHPOUC chwn phuna lungh mak khwan e.

¹⁵Rehoboam taanv guay tei kahouhmei khou rui luaimei nganv khatni kakai kaikhunc tuang chakh guay muhzwng Shemaia tuang Dihlwan buk khatni muhzwng Iddo tuang dihlwan buk khou nai e. Rehoboam khatni Jeroboam tei rih adow nthaekc makna adowna lungc bam khwan e.

¹⁶Rehoboam tei theicna David kaidai khou guangh nunc tuang tarou khou mbeihlou the. Kumna kanac mpouh Abija rui kaphaan guanghtu lyn dat the.