Read Rongmei Naga 2 KINCHAKH 13 Bible Online

2 KINCHAKH 13 - Rongmei Naga bible

2 KINCHAKH 13

¹Isaraelmei guangc Jeroboam rui guangh swmei tuang 18mei kwm Abija Judamei guangc sw the.

²Kamei Jerusalem khou tingkwm kathumh guangh swlou khwan e. Kanow rui Gibea kaidaimei Uriel nacpui Mikaia khwan e. Abija lev Jeroboam kak khou rih thau khwan e.

³Abija rui rihmei 4,00,000 kasiamhlou khwan e. Jeroboam rui hei tei katuang ricmei 8,00,000 rui akhangv khwan e.

⁴Mi ricmei kang kanei tei Ephraim tuang chyngramv khou adow khwan e. Guangh Abija rui Zemaraim Chyngbut khou kuna Jeroboam khatni Isaraelmei nunc khou kumna kauc the: “Ai rui samei nking o!

⁵Isarael Racguangc RINGHPOUC rui David khou kalaic dat lakmei latdyng swlou the twmei nangniw thay makna cho? Kamei khatni kakikta rui Isarael khou tingsaengzaeng guangh sw bam puni twna nrianhlou the.

⁶Nebat nac mpouh Jeroboam rui kaguangc Solomon ruc khou rihthau khwan e.

⁷Katang thangc kamei rui gaeng makmei meicsimei nunc ta khuam kaduaina Solomon nac mpouh Rehoboam alaucna ramh thay makmeipu ta namna kaniw rui ningmei titaanc the.

⁸RINGHPOUC rui David kikta khou tiilou kanmei guangh ngamv ta ntaw nang adow khang swna bam e. Nang tuang ricmei kangdai nai e khatni Jeroboam rui nangniw tuang rav khang kasiamhloumei kachaekc tuang guaituamchic nai e.

⁹Nangniw rui RINGHPOUC tuang muhzwng, Aron kikta guay khatni Levimei guay ta nthau ganc the. Kaniw phaan tei nangniw rui zaatc baihmei nunc rui sw bammei tei kumcna amuh nunc lou dat the. Thow pwni guaituamchic akhat lev lauziu chanei nduangh guang guangmei ta nangniw tuang rav the twmei tuang amuh khang tei suanglou the.

¹⁰“Tiki aniw thu RINGHPOUC aniw Racguangc ta kalumna bam de, kata mpat zat mak ge. Aron kiktamei amuh nunc rui thouh sw bam de, khatni Levimei nunc rui nkhav bam de.

¹¹Lauthwan tingzyn kaniw agaw nteina khatni kapwm rawna khaeng tanh tan bam de. Nthanmei ntyan kaniw ntyanpaeng khou katlou tan bam de khatni tingzyn pum kachaekc thaucmai hyang khou naimei thaucmai guay tei daanc tan bam de. RINGHPOUC tuang latdanv theilayna aniw taanc bam de, tiki nangniw thu kata mpatlou kan the.

¹²Ravguangc kamei kahak hei aniw tuang kapy e, kumna nangniw ta adow khang meic nunc ta kabai khang amuh nunc bianggun sinna mi khou hei bam the. Isaraelmei nuncle, nangniw hei nangniw pupouc Racguangc RINGHPOUC ruc khou adow nangh e! nangniw ngam ni tuang hamh e!”

¹³Kum bam khou tei Jeroboam rui Judamei ricmei nunc thei biak thangc katuang ricmei gaanvsaekc ta tiduplou the, kumna gaanvsaekc ta hu biak thangc tiding adaclou the.

¹⁴Judamei nunc tei thei-hu zauc kari kariang pwki kaniw ta ding haengv the twmei how the. Nkhavlou khang RINGHPOUC khou kauc the, kumna amuh nunc rui bianggun amuan the.

¹⁵Judamei nunc tei kauc ranvna kauc thau the, kumna Abija rui nduanghna adow thau the. Ravguangc rui Jeroboam khatni Isaraelmei ricmei nunc ta ngamlou the.

¹⁶Isaraelmei nunc tei Judamei nunc hu khou pak kan the, kumna Ravguangc rui Judamei ta Isaraelmei ruc khou tingamlou kan the.

¹⁷Abija khatni katuang ricmei nunc rui Isaraelmei ta swpuat paruatlou kan the. Isaraelmei ricmei gay liangmei 5,00,000 ta swluai kan the.

¹⁸Kumna Judamei rui Isaraelmei ruc khou rihngam the, kalam thu kaniw rui kaniw pupouc Racguangc RINGHPOUC khou ngangvlou khwan e.

¹⁹Abija rui Jeroboam tuang ricmei nunc ta nthau tatna kaidai asaekc Bethel, Jeshana khatni Ephron khatni mi kaidai guay daeng khou naimei namv guay ta laa the.

²⁰Jeroboam tei Abija guangh sw bam saanv kapumtan nai dat ngam kan mak khe. Nkhamh khou kata RINGHPOUC rui bailuai kan the.

²¹Abija thu kangamv daic hay hay thau the. Kanow gaanv 14 e kumna kanac mpouh gaanv 20, aluh 16 nai khwan e.

²²Katuang pary baihmei guay, kamei rui saloumei khatni taancloumei guay muhzwng Iddo tuang buk khou hylou the.