Read Rongmei Naga 2 KINCHAKH 14 Bible Online

2 KINCHAKH 14 - Rongmei Naga bible

2 KINCHAKH 14

¹Guangh Abija tei theicna David kaidai khou guangh nunc tuang tarou khou mbeihlou the. Kanac mpouh Asa rui kaphaan guangh sw dat khwan e. Asa zuk khou tingkwm ruh suc-rih maekna lungc khwan e.

²Asa rui gaymei khatni nchumhmei taancna RINGHPOUC kaRacguangc ta tipianlouna lungc khwan e.

³Kamei rui zaatc baihmei tuang ravchabamv guay khatni rav baihmei ta kalummei bamv guay laa ganc khwan e. Kamei rui swangtauc guay khatni Asherapui ravmaengc guay swbau ganc khwan e.

⁴Kamei rui Judamei nunc ta kaniw pupouc Racguangc RINGHPOUC tuang ningmei taanh khang khatni katuang latdanv khatni latdyn guay piu khang latdanv tii khwan e.

⁵Kamei rui Juda tuang kaidai guay khou rui rav baihmei ta kalummei bamv guay khatni agaw ravchabamv guay swmaan ngam timei zaeng rui kamei guangh sw bammei zuk khou mi kandic khou tei nchu-nzaenghmei nai khwan e.

⁶Kazuk khou Juda tuang kaidai guay raengh raeng khwan e, kumna tingkwm mpeyna suc-rih maekna lungc khwan e. Kalam thu RINGHPOUC rui kakhou nchu-nzaenghmei tiilou khwan e.

⁷Kamei rui Judamei nunc khou sa the, “Aniu kaidai raengv raeng di kho, rihphaankai kasiamh di kho kumna raenghmun mbangh nuhmei raengcmun kasiamh di kho. Aniu rui mi kandic ti hei sin the kalam thu aniu rui RINGHPOUC aniu Racguangc rui chwnmei taancna lungc the. Kamei rui aniu ta gaeklou the kumna kabamv kathuicna khou giugamei tuang maek khe.” Kumna kaniw rui kasiamhna daic thau the.

⁸Guangh Asa tei Judamei buy khatni nggih sinmei rihmei 3,00,000 khatni Benjaminmei buy khatni sauhpai sinmei 2,80,000 nai khwan e. Kaniw guay tei tancbauhmei khatni rih khou thaymei nunc khwan e.

⁹Sudanmei kazanc Zera twmeipu kamei ching ching khatni takuanh gari 300 nduanghna Juda kandic khou rihkey the kumna Maresha nganv key tangc the.

¹⁰Asa rui kata adow khang pat the, kumna Maresha daeng khou Zephatha nzaengc khou kaney tei adow khang chamdaanvna bam the.

¹¹Asa rui RINGHPOUC kaRacguangc khou kumna huayney the, “He RINGHPOUC, tanhmei ta adow khang suanmei ta nang nkhavlou ngam e twmei ai thay e. He RINGHPOUC aniw Racguangc, ntaw hei aniw ta nkhavlou o, kalam thu aniw nang khou ngangvlou the khatni mi rihmei kangdai ti hei adow khang nang zanc khou rui patmei tuang e. He RINGHPOUC, nang hei aniw Racguangc e; meic gaanv khat na rui sini nang ta ngam ni tuang hamh e.”

¹²Asa khatni Judamei tuang ricmei nunc rui adow thau pwkhou RINGHPOUC rui Sudanmei ricmei nunc ta zaw tisilou the. Kaniw tei pak kan the,

¹³kumna Asa lev kamei guay rui kaniw ta Gerar nganv nthau key the. Sudanmei tei meic akhat na sini nsaekcloudat makna theicngam the. Kaniw tei RINGHPOUC khatni katuang ricmei nunc hu khou puat the. Judamei nunc rui kaniw tuang puat mpeyna laa tat the.

¹⁴Kumna kaniw rui Gerar daeng khou naimei kaidai guay ta swkamut kamailou the. Kalam thu mi khou tei bammei guay ta RINGHPOUC rui tipinglou the. Rihmei nunc rui mi kaidai guay tei nuamna ramh mpeyna laa the.

¹⁵Kaniw rui lauziu gaenghmei nunc tuang zypuikai ni akwamna lauziu khatni guaikuan mpeyna laa the. Kumlana kaniw Jerusalem khou hanc guang dat the.