Read Rongmei Naga 2 KINCHAKH 15 Bible Online

2 KINCHAKH 15 - Rongmei Naga bible

2 KINCHAKH 15

¹Oded nac mpouh Azaria khou Ravguangc tuang bumaengc keylouna

²kamei guangh Asa ta ariw khang tat the. Kamei rui kumna kauc the, “He guangh Asa khatni Juda khatni Benjaminmei guayna, ai rui samei hei nking o! nangniw RINGHPOUC daeng khou bam saanv kamei nangniw ta nduanghlou bam e. Nangniw rui kata phu ti thei, kamei rui ariwlou puni, tiki nangniw rui kakhou rui tat pat tithei kamei rui nangniw ta ganclou puni.

³Isaraelmei nunc hei nchumhmei Racguangc maekna, kaniw ta nchamlou nimei amuh maekna, khatni latdanv maekna kaganv tingsaengna lungc bam khwan e.

⁴Tiki ryanramei guang pwkhou kaniw RINGHPOUC Isarael Racguangc khou guang the. Kaniw rui kata phu the kumna ariw the.

⁵Mi douc tei kandih kabamv kathuicna khou suc-rih naimei zaeng rui meic gaanv khat na sini giuga makna tatpat tatgut bam ngam mak khwan e.

⁶Zaatc akhat rui zaatc akhat ta, kaidai akhat rui kaidai akhat ta sw kasicna bam khwan e, kalam thu Ravguangc rui kaniw khou ryanra katuakcmei tiguanglou bam khwan e.

⁷Tiki nangniw thu taanc nina the khatni lungh tangkhyn lak nina the. Nangniw tuang taanv tei kaswan nai puni.”

⁸Oded nac mpouh Azaria rui ravmundinhmei tei Asa rui chu pwkhou, kamei bauc thau the. Juda khatni Benjamin kandic khou naimei ravmaengc guay tei kamei rui swmaan the kumna Ephraim tuang chyngramv khou kamei rui laa gutmei kaidai guay khou tei naimei ravmaengc guay tei swmaan ngam the. Ravkai kaimav khou naimei ravchapaeng tei ni kamei rui kasiamh thau dat the.

⁹Ephraim, Manase, khatni Simeon kaikhwang khou rui meic mpeyna katuang guangcdic khou lungc the, kalam thu RINGHPOUC rui Asa ta nduanghlou e twmei kaniw rui how the. Asa rui kaniw guay khatni Judamei lev Benjaminmei ta guang kaduai khang kabai the.

¹⁰Kumna Asa rui guangh swmei tuang 15mei kwm kathumhmei bw khou kaniw Jerusalem khou guang kaduai the.

¹¹Mi nungc tei kaniw rui rihbamv khou rui laaguangmei guaituam 700 khatni lauziu 7000 RINGHPOUC khang khaeng the.

¹²Kaniw rui kaniw pupouc Racguangc RINGHPOUC ta kaniw lung kapwm gutna kalum ni twna kaniw latdyng sw the.

¹³Alauc ni gaanvthaih ni, ntumei ni nggaanvmei ni RINGHPOUC ta kalum makmei ta thu swluai ni twmei latdyng sw the.

¹⁴Kaniw rui mi latdyng tei piu ni twna kauc ranvna RINGHPOUC zanc khou latdyng sw the, kaniw kaucna bianggun amuan the.

¹⁵Judamei guay tei neihla the, kalam thu kaniw lung kapwm rui mi latdyng tei sw kan the. Kaniw RINGHPOUC ta kalummei khou tei neihla the, kumna RINGHPOUC rui kaniw ta laalouna kabamv kathuicna nchu-nzaenghmei tiilou khwan e.

¹⁶Guangh Asa rui kapeic Maaka ta liammav bamv khou rui laa pat khwan e, kalam thu kamei rui kingckiucmei ravpui Ashera maengc tei kasiamhlou bam khwan e. Asa rui mi ravmaengc tei swbau keyna, swpuat lana, mi kiak guay tei Kidron nzaengc khou mai ntei the.

¹⁷Asa rui mi kandic khou tei naimei rav baihmei ta kalummei bamv guay tei swmaanpary ngam mak sini kamei thu kapanty saanvsaengh RINGHPOUC khou lwm nuhmei swna lungc khwan e.

¹⁸Kapu Abija rui RINGHPOUC khang kat gutloumei puat guay khatni kamei rui katgutloumei daandi khatni kachaekc tuang puat guay tei kamei rui Ravkai khou lou the.

¹⁹Kamei guangh swmei tuang 35mei kwm nganvna suc-rih maekna lungc khwan e.