Read Rongmei Naga 2 KINCHAKH 16 Bible Online

2 KINCHAKH 16 - Rongmei Naga bible

2 KINCHAKH 16

¹Judamei guangc Asa rui guangh swmei tuang 36mei kwm Isaraelmei guangc Baasha rui Juda khou rihkey khwan e kumna Juda khou rui tatpat tatgut nuh mak khang Rama khou rihmei lou khwan e.

²Kumna Asa rui Ravkai khatni guanghkai tuang lanvkai khou rui daandi khatni kachaekc laana Damaskas khou Siriamei guangc Benhadad khou tii guangna sa the:

³“Anei pu nei kumcna anei ni giang sw di kho. Mi daandi khatni kachaekc hei nang khang kaipat swna tii guangmei tuang e. Ntaw Isaraelmei guangc Baasha lev giang sw bammei tei swbak tho kumna kamei atuang kandic khou rui katuang ricmei pang ta laa pat dat kan di tho.”

⁴Asa rui samei tei Benhadad rui nuh the, kumna Isaraelmei tuang kaidai guay ta adow khang katuang ricpy nunc khatni rihmei nunc ta thouclou the. Kumna Ijon, Dan, Abel Beth Maaka, khatni ramh ryloumei bamv Naphtali tuang kaidai kaguayna ta laa the.

⁵Mi chamv tei guangh Baasha rui chu pwkhou, kamei Rama kaidai raengv raeng bammei nthaekcna mi taanv tei mpatlou kan the.

⁶Mi khou tei Asa rui Juda kandic kapwm khou rui meic khuam lana Baasha rui Rama kaidai raeng bammei tuang ntauh khatni thing dangv guay tei laana Geba lev Mizpa kaidai tei raeng o twna latdanv pat kan the.

⁷Mi ganv khou tei muhzwng Hanani tei guangh Asa daeng khou guangna sa the, “Nang rui RINGHPOUC nang Racguangc khou ngangvloumei phaan Siriamei guangc khou ngangvloumei zaeng rui Isaraelmei guangc tei nang khou rui pak duak kan the.

⁸Sudanmei lev Libiamei tei rihmei kangdai lev takuanh gari khatni takuanh ricmei pang nduanghna guang tuang hamhna cho? Tiki nang rui RINGHPOUC khou ngangvlou tina kamei rui kaniw ta nang baanc khou tiilou the.

⁹Kalung kapwm tei kakhou bampui mei ta titanclou khang RINGHPOUC kandih kapwm khou miktunna zauc bam e. Nang mpangmei taanv taanc the, kumna ntaw khou rui thauna nang rih rana sw dat puni the.”

¹⁰Mi khou tei Asa tei muhzwng ta tei kalungpuamc the kumna kata kang bangclou the. Mi ganv khou tei Asa rui meic gaanvsaekc ta ni sina swthau the.

¹¹Asa rui guangh swna sinloumei tuang rwanry kahouhmei khou rui thauna luaimei nganv Judamei lev Isaraelmei guangc nunc tuang pary buk khou hylou the.

¹²Asa tei kamei guangh swmei tuang 39mei kwm, kaphay khou ravpuat simei patna kamei tat dat thay mak khwan e, kum pwkhou nganvna kamei tigaylou khang RINGHPOUC khou guang makna ravtow amuh nunc khou tat khwan e.

¹³Tingkwm kanei tangv kamei theic the, kumna

¹⁴David kaidai khou kamei rui katarou khang ntauh khou bwngloumei tarou khou mbeihlou the. Kapumc khou maruai khatni namhgaymei thauc azuh louna mbeihlou the, kumna maipui dai kasiamhna kata huay the.