Read Rongmei Naga 2 KINCHAKH 17 Bible Online

2 KINCHAKH 17 - Rongmei Naga bible

2 KINCHAKH 17

¹Jehoshaphat rui kapu Asa phaan guangh sw lyn the kumna kapumtan tei Isaraelmei ta adow khang titanc mbu khwan e.

²Juda tuang raengh raengloumei kaidai guay khou, Judamei tuang ramv guay khou, khatni Ephraim tuang ramv khou Asa rui laa gutloumei kaidai guay khou rihmei lou the.

³RINGHPOUC rui Jehoshaphat ta suaihiamlou khwan e kalam thu kamei rui kapu tuang thau reymei panty tei layluih khwan e. Kumna Baal ta kalum mak khwan e.

⁴Kamei kapu tuang Racguangc siamruai sw the, Ravguangc tuang latdanv guay piu the, kumna Isaraelmei guangc nunc rui taanhmei kumcna taanh mak ge.

⁵Ravguangc rui Jehoshaphat ta Juda guangcdic tei ntipna tisinlou the, kumna meic guayna rui kaipat phungc guang the, kumna kamei tei lungcgay the khatni meic nunc rui chakhwang champouhna lungc the.

⁶Kalungning tei RINGHPOUC khou tigutloupary khwan e; Juda kandic khou rui ravbaihmei ta kalummei bamv guay khatni Asherapui ravmaengc guay swmaan khwan e.

⁷Kamei guangh swmei tuang kathumhmei kwm Juda tuang kaidai guay khou tatna nchamlou khang katuang meicdaihmei Benhail, Obadia, Zekaria, Nethanel, khatni Mikaia ta ndiu pat khwan e.

⁸Kaniw ta tei Levimei gaanv chakiu lev amuh gaanv nei rui nduangh tat khwan e. Mi Levimei nunc kiu thu—Shemaia, Nethania, Zebadia, Asahel, Shemiramot, Jehonathan, Adonija, Tobija, khatni Tobadonija e; kumna amuh nei tei rui Elishama lev Jehoram e.

⁹Kaniw rui RINGHPOUC tuang Riakdanv buk tei sin lana Juda tuang kaidai guayna khou tatna, meic nunc khou nchamlou tat the.

¹⁰RINGHPOUC rui kainingmei guangcdic tei Jehoshaphat ta rih adow ping khang tiilou the.

¹¹Philistinmei gaanvsaekc rui Jehoshaphat khang daandi mpeyna lev baihmei kaipat ni phungc guang the. Arabmei gaanvsaekc rui lauziu 7,700, lev ziuh 7,700 tii guang the.

¹²Jehoshaphat tei kangamv mbu hay hay thau the. Juda kapwm rihgaek bamv khatni kaidai mpeyna kasiamh thau the,

¹³kumna mi kaidai guay khou tei taektw mpeyna rylou khwan e. Jerusalem khou ni kamei rui ngammei rihpy nunc ta tibamlou khwan e.

¹⁴Kaniw ta tei puinac puinac swna tibamlou khwan e. Adna hei Juda kaikhwangmei ricmei kang tuang kapy e, kumna kabangc khou rihmei 3,00,000 nai khwan e.

¹⁵Adna bangc khoumei rihpy rui Jehohanan e, kabangc khou rihmei 2,80,000 nai khwan e.

¹⁶Kathumhmei rui Zikri nac mpouh Amasia e, (Amasia kapumc kahak lev kapumtan tanhmei rihmei 2,00,000 lev RINGHPOUC siamruai khang rui tii pat khwan e.)

¹⁷Benjamin kaikhwangmei rihmei nunc tuang ricpy hei Eliada e, kamei langh langmei rihmei akhat re. Kabangc khou nggih khatni sauhpai sinmei rihmei 2,00,000 nai khwan e.

¹⁸Kabangc khou bammei rihpy rui Jehozabad re. Kabangc khou rih na nthuihmei rihmei 1,80,000 nai khwan e.

¹⁹Mi nunc hei Jerusalem khou bamna guangh siamruai swmei nunc e, baihmei ricmei guay rui Juda tuang raengv raengloumei kaidai guay khou tibam khwan e.