Read Rongmei Naga 2 KINCHAKH 18 Bible Online

2 KINCHAKH 18 - Rongmei Naga bible

2 KINCHAKH 18

¹Judamei guangc Jehoshaphat tei lungcgayna kazanc dinc thau pwkhou, kamei rui kakai kaikhuncmei gaanv khat lev Isaraelmei guangc Ahab kai kaikhuncmei gaanv khat nowkaw khang kasiamhlou the.

²Tingkwm mpeyna tangv Jehoshaphat tei Ahab ta ariw khang Samaria kaidai khou ngangh the. Ahab rui guaituam khatni lauziu mpeyna dow lana Jehoshaphat khatni kamei nunc khang tei kic the. Gilead ramv khou naimei Ramot kaidai ta adow khang kazauhlou o twna Ahab rui Jehoshaphat ta nthiam the.

³“Ai Ramot ta adow khou nang kazauhlou nuh puni cho?” twna Ahab rui sa the. Jehoshaphat rui daw the, “Nang rui adow nii nii khou ai lev amei nunc ni nuh rap di the. Aniw ni kazauh puni the.”

⁴“Tiki aniu Ravguangc khou thanv rey kho” twna kamei rui sa the.

⁵Kumna Ahab rui muhzwng nunc 400 doumei kang ta kaw kaduaina kaniw khou tei “Ai Ramot ti hei adow nuh ny adow nuh mak cho?” twna thanv the. “Adow tho, Ravguangc rui tingamlou puni the,” twna kaniw rui daw the.

⁶Tiki Jehoshaphat rui “RINGHPOUC khou thanv nuhmei muhzwng baihmei maek khena cho?” twna thanv the.

⁷Ahab rui daw the, “Imla nac mpouh Mikaia thu nai he. Tiki ai thu kata karaeng e, kalam thu kamei thu akhang gaymei lat salou zat mak ge, simei lat akhat thu salou tan de.” “Nang kumna sa lak nina de,” twna Jehoshaphat rui daw the.

⁸Kumna guangh Ahab rui katuang peikai tuang meicdaihmei gaanv khat ta kaw guangna katumcna Mikaia ta kaw guang khang thouclou the.

⁹Kumna mi guangc nei tei guanghpwan piuna Samaria tuang raengh paengc khou laudybamv khou kaney tuang guangh bamv khou dungcna bam the, kumna muhzwng guay tei kaney hu khou ravmun dincna bam the.

¹⁰Mi pang khou tei rui gaanv khat Kenaana nac mpouh Zedekia rui ntanh tuang chei kasiamh lana Ahab khou sa the, “RINGHPOUC rui sa e, mi hei rui nang Siriamei ta apwan nina e kumna kaniw ta tei nsaekc makna ngamlou puni.”

¹¹Baihmei muhzwng guay tei rui ni hei tei kumcna sa ngam the. “Ramot ta adow tho nang ngam puni the. Rih tei RINGHPOUC rui tingamlou puni,” twna kaniw rui sa the.

¹²Kum bammei ganv khou tei Mikaia ta kaw khang tat kanmeipu tei rui kakhou sa the, “Guangh rui ngam puni de twna baihmei muhzwng guay hei rui sa the, kumna nang ni hei tei kumcna samei gay pwng e.”

¹³Tiki Mikaia rui daw the, “Ringc bammei RINGHPOUC zanc saancna samei tuang e, Ravguangc rui sa o twna sa samei tei ai sa puni!”

¹⁴Kamei guangh Ahab hu khou guang pwkhou guangh rui kakhou thanv the, “Mikaiale, guangh Jehoshaphat aney rui Ramot kaidai ti hei adow kho ny adow nangh cho?” Mikaia rui daw the, “Adow tho! Nang ngam puni de. RINGHPOUC rui rih tingamlou puni.”

¹⁵Tiki Ahab rui daw the, “Nang rui RINGHPOUC zanc khou rui akhou nchumhmei lat sa o. Nchumhmei lat sa o twna ai nang khou azuh zuh sa bam nina cho?”

¹⁶Mikaia rui daw the, “Isaraelmei rihmei nunc tei gaengcloumei maekmei lauziu nunc kumcna chyngbut guay khou zinphaklou bammei ta ai how e. Khoutei RINGHPOUC rui sa e, ‘Mi nunc hei kaniw ta zayloumei maek khe, kaniw tei nchu-nzaenghna kaniw kai tat kan di tho.’ ”

¹⁷Ahab rui Jehoshaphat khou sa the, “Kamei akhou gaymei salou zat mak ge; simei akhat thu salou tan de twna ai sa kan the cho.”

¹⁸Mikaia rui sa dat re, “RINGHPOUC rui samei hei ntaw king o! RINGHPOUC tingkauh khou kaguangc bamvpaeng khou dungcna baanchara guay kadaeng khou ding huamcna bammei ta ai how e.

¹⁹RINGHPOUC rui khou tei kumna thanv the, ‘Ahab ta Ramot khou swluai kan khang thow rui kata guat ni cho.’ baanchara nunc tei kamei kamei ningmei baic baicna sa bam the.

²⁰Khoutei bumaengh akhat rui tat patna kadaeng khou guangna sa the, ‘Ai kata guat ni the.’ ‘Akumhna guat nina?’ twna RINGHPOUC rui thanv the.

²¹Bumaengh tei rui daw the, ‘Ai tatna Ahab tuang muhzwng guay ta tei tisaraamc puni the.’ RINGHPOUC rui sa the, ‘Nang tatna kata guat tho. Nang ngam puni the.’ ”

²²“Nang khou sa bammei tei mi hei the. RINGHPOUC rui mi nang tuang muhzwng guay ti hei tisaraamclou the. Tiki nang ruc khou kamut kamaimei guang pw nimei hei kamei rui kauc patlou tangmei tuang di the.”

²³Khoutei muhzwng Zedekia rui Mikaia daeng khou tat kuna kata kaphina sa the, “Tabui ganv khou rui Ravguangc tuang bumaengc akhou rui tat patna nang khou mi lat hei salou buna cho?”

²⁴“Katheimei kainung khou nkamh khang gut puinungc kiu nang hei tei thay puni the,” twna Mikaia rui daw the.

²⁵Khoutei Ahab rui katuang meicdaihmei gaanv khat khou latdanv patna sa the, “Mikaia ta nym tho kumna mi kaidai tuang guanghkhyn Amon khatni guangh nac mpouh Joas daeng thangc zay tat tho.

²⁶Ai gayna guang dat mak saanv kata kangkai khou lou o kumna kakhang ntyan lev dui na tii o twna kaney khou sa tho.”

²⁷Mikaia rui sa the, “Nang gayna guang dat re thei RINGHPOUC rui akhou salou timakna the! Ai rui sa kanmei tei meic kathuicna thaylou o!”

²⁸Mi tangv tei Isaraelmei guangc Ahab khatni Judamei guangc Jehoshaphat tei Gilead khou naimei Ramot kaidai ta adow khang tat the.

²⁹Khoutei Ahab rui Jehoshaphat khou sa the, “Rihbamv khou gut pwkhou ai thu apwan piu kalaic puni the, tiki nang thu guanghpwan piu o.” Kumna Isaraelmei guangc tei kapwan kalaicna rihbamv khou tat the.

³⁰Isaraelmei guangc ta hamhna meic baihmei ta adow nangh e twna Siriamei guangc rui katuang takuanc gari kapy nunc khou latdanv tiilou the.

³¹Kumna kaniw rui Jehoshaphat ta how pwkhou kaniw meic guayna hei tei Isaraelmei guangc khwang the twna ning the, kumna kaniw rui kata adow khang nzwan guang the. Khoutei Jehoshaphat rui kauc the, kumna RINGHPOUC Ravguangc rui kata kanduaklou the, kumna adow guangmei nunc tei kakhou rui tat dat kan the.

³²Kamei Isaraelmei guangc hamh e twmei takuanh gari kapy nunc tei rui thay la khou kata nthau nthaekc the.

³³Siriamei ricmei gaanv khat rui katuang pailu pangkaap kaap pat khou rui akhat rui guangh Ahab ta katuang ricpwan kak khou gutna tow the. “Ai zamh the! Gari hei thei karihna rihbamv khou rui pat tho.” twna kamei katuang takuanh gari thoumeipu khou tei sa the.

³⁴Rih tei adow bam khou, kamei katuang gari khou nliauna Siriamei biak karihna zauc bam the. Kumna neihkey pwkhou kamei theic the.