Read Rongmei Naga 2 KINCHAKH 19 Bible Online

2 KINCHAKH 19 - Rongmei Naga bible

2 KINCHAKH 19

¹Guangh Jehoshaphat tei kabiu kabaeng makna Jerusalem khou guanghkai khou guang tangc dat the.

²Khoutei Hannani nac mpouh muhzwng Jehu rui kata guang ariwna sa the, “Meicsimei ta nkhav tatmei khatni RINGHPOUC ta karaengpui mei biak lianghmei hei nchumh de twna nang ningna cho? Nang tuang taanv tei rui nang ruc khou RINGHPOUC tuang lungpuam phungc guang the.

³Tiki nang khou gaymei asaekc thu nai e. Meic nunc rui kalum bammei Asherapui tuang maengc guay tei nang rui laa ganc the, kumna nang Ravguangc tuang chwn khou lungh khang karamc the.”

⁴Jehoshaphat tei kamei Jerusalem khou lungc bam sini dihpy thangc Ephraim chyng ramv khou rui dihba thangc Beersheba nganv kamei rui meicpang khou nggin tanh tanna meic nunc ta tei kaniw pupouc Racguangc RINGHPOUC khou hanc guang dat khang kawna tat bam khwan e.

⁵Kamei rui Juda tuang raengh raengloumei kaidai guay khou latzanpouc akhat akhat louna

⁶kaniw khou kumna dinclou khwan e: “Nangniw latzan dan pat khou riu riuna sw lak nina e, nangniw maansei tuang ngamv khou taanc bam tuang hamh e, tiki Ravguangc tuang ngamv khou taanc bam tuang e, kumna nangniw latzan dan pwkhou kamei kazauh bam e.

⁷RINGHPOUC ta ping o kumna ramhthayna taanc o, kalam thu RINGHPOUC aniu Racguangc hei nchumh makmei, gahsw guhswmei, lanvbiwmei twmei hei guay ta karaeng e.”

⁸Jerusalem khou RINGHPOUC tuang latdanv twan lyammei hamh e thei latlu patmei tuang nai e thei latzan sw khang Jehoshaphat rui Levimei nunc, amuh nunc, khatni Isaraelmei kaikhunc tuang kapy gaanvsaekc ta latzanpouc nunc khang lou khwan e.

⁹Kamei rui meic nunc khou tei kumna dinclou khwan e: “Nangniw rui nangniw thouc tei RINGHPOUC ta pingna, nangniw rui taanhmei guay khou kalat piuna taanc nina e.

¹⁰Tabui bui kaidai khou rui pwni kaikhunh tuang lat pwni, latdanv hamh e thei kariak twan lyammei tuang lat pwni lat patna nangniw khou phungc guang e thei, kaniw RINGHPOUC ruc khou paapc taanh mak khang latzan swmei ganv khou tei ramhthayna sw o twna kaniw khou dinclou nina e. Kumna nangniw sw mak ge thei nangniw khatni nangniw chana punav Isaraelmei ruc khou Ravguangc tuang lungpuam keylou puni. Tiki nangniw rui nangniw thouc tei taanc e thei khuay tei nangniw ruc khou keylou lak ge.

¹¹Ravchap tuang latzan khou Tingkuh Amaria rui dan patmei lat tei luaimei the khatni kandih tuang lat khou Ismael nac mpouh Juda kandic sinmeipu Zebadia rui dan patmei lat tei rui luaimei the. Peikai tuang lat tei tatkey ny tatkey mak ny twmei zauhmei hei Levimei nunc thouc e. Bauc o kumna mi dincloumei guay hei taanc o, kumna RINGHPOUC rui nchumhmei biak liangclou diu!”