Read Rongmei Naga 2 KINCHAKH 2 Bible Online

2 KINCHAKH 2 - Rongmei Naga bible

2 KINCHAKH 2

¹Guangh Solomon tei RINGHPOUC ta kalummei tuang Ravkai khang khatni kakhang guanghkai kasiamh ni twna kalung ding the.

²Kai thing ntauh hwanmei khang meic 70,000, khatni ntauh taanv taanhmei khang meic 80,000 lou the. Taanv zauhmei khang meic 3600 lou the.

³Solomon rui Turmei guangc Hiram khou kumna lat titat the: “Nang rui apu David khang katuang guangckai kasiamh khang sidar thing tiimei tei kumcna anei ni khat khat puat baanlaan kary kho.

⁴Ravguangc RINGHPOUC ta kalummei bamv khang ai Ravkai kasiamh bam e. Hei tei ai khatni amei nunc rui agaw nteina kalummei bamv khang e. Hei tei aniw rui nthanmei ntyan kat bammei bamv khang, khatni tingmik pum lauthwan tingzyn, Sabbath nungc lev bw thanh Ngai khou khatni baihmei nthanmei tingmik guay khou rawna khaengna RINGHPOUC aniw Racguangc ta kalum bammei bamv khang e. Mi hei tingsaengzaeng sw bam o twna Isaraelmei khou RINGHPOUC rui latdanv tiimei tuang the.

⁵Ai Ravkai daihmei sw puni, kalam thu aniw tuang Racguangc hei rav baihmei guay suangc daic e.

⁶Ngguay, Ravguangc khang biuhmei Ravkai kasiamh ngam mak ge, kalam thu tingpuk khou naimei guay hei nganvna kakhang chan mak ge. Kum e thei Ravguangc khang agaw nteimei kai khang na hamhna baihmei kai ai kasiamh ngam mak ge.

⁷Kumna thingtauh khou hianna hy thaymei; kachaekc, daandi, tanzinc khatni ntanh taanv taanc thaymei; khatni phey nrymmei, haengcnrymmei khatni haenghmei taanc thaymei meic gaanv khat akhang thouc guang o. Kamei tei apu David rui kadahloumei Jerusalemmei khatni Judamei baanhthaymei guay lev taanc nchamc khang e.

⁸Nang tuang thing taanhmei nunc tei adih heih cho twmei ai thay e, kumna Lebanon chyng khou rui sidar, saipres khatni juniper thing dwm pang ni tiguang o. Nang tuang mei nunc ta nkhav khang amei nunc ta ni thouclou puni de.

⁹Thingdwm mpeyna kasiamh nimei khou tei nkhav puni de, kalam thu ai rui sw nimei kai hei kai daihmei bingh bingmei kai sw nina the.

¹⁰Nang tuang mei nunc tu zangv khang thu ai rui gehu metrik ton 2000, sipian metrik ton 2000, drakhadui liter 4,00,000, khatni Olive thauc liter 4,00,000 tii puni.”

¹¹Guangh Hiram rui guangh Solomon khou tatdyn swna daw guang dat the. Kamei rui kumna hy guang the, “RINGHPOUC rui kamei nunc ta nzian la mei zaeng rui, kamei rui nang ta kaniw tuang guangc tiswlou the.

¹²Isarael Racguangc RINGHPOUC, tingpuk kandih damhmeipu ta thuanc o! kamei rui guangh David khang ningtyngmei nac mpouh, ningting takh padikmeipu, RINGHPOUC khang Ravkai khatni kakhang guanghkai sw khang sw bammei nac mpouh hei tiilou the.

¹³Ningtyngmei baanhthaymeipu kazanc Huram twmeipu ta thouc guang puni the.

¹⁴Kapui hei Dan kaikhwangmei e, kapu thu Tur dilungmei e. Kamei kachaekc, daandi, tanzinc, ntanh, ntauh, khatni thing taanv khou thaymeipu the. Kamei nrymmei, haengcnrymmei, khatni haenghmei phey, khatni linen phey taanc thaymeipu the. Kamei hei ramhmaengc hiakmei khou ni thaymeipu the, heikumna taanc o twna samei guay taanc pat ngammeipu e. Kamei ta kiuc nang tuang baanthaymei nunc, khatni nang pu guangh David tuang baanhthaymei nunc rui taanc nduangh kan di tho.

¹⁵Kumna nang rui tii ni twna nrianhloumei gehu, sipian, drakhadui, khatni Olive thauc tei tii guang tho.

¹⁶Lebanon Chyng khou rui nang khang kage naimei sidar thing guay tei dow lana, hei tei palyam swna banglouna duipui khou rui Joppa nganv nzuan keylou tangc puni the. Mi khou tei rui nang rui Jerusalem thangc phungc tat dat nina the.”

¹⁷Kapu David rui sw kanmei kumcna guangh Solomon rui Isarael kandic khou lungc bammei gin guay sing phuc the. Kumna zaatc baihmei 1,53,600 lungc bammei ariw the.

¹⁸Mi nunc ta tei meic 70,000 ta kathing katauc hwan khang, meic 80,000 ta chyng thangc kuna ntauh kaphangv khang khatni meic 3600 ta sigay zauhmei khang langlou the.