Read Rongmei Naga 2 KINCHAKH 21 Bible Online

2 KINCHAKH 21 - Rongmei Naga bible

2 KINCHAKH 21

¹Jehoshaphat tei theicna David kaidai khou guangh nunc tuang tarou khou mbeihlou the, kumna kanac mpouh Jehoram rui kaphaan guangh sw the.

²Judamei guangc Jehoshaphat nac mpouh Jehoram tei kachana gaanv charuk: Azaria, Jehiel, Zekaria, Azariahu, Mikael, khatni Shephatia nai khwan e.

³Kaniw pu rui kachaekc, daandi khatni kunghmei puat mpeyna kaniw khang tiilou khwan e, kumna kaniw meic kathuicna khou tei Judamei tuang raengv raengloumei kaidai akhat akhat sin khang tiilou khwan e. Jehoram tei nah mpouh gaanvthaihmei timei zaeng rui Jehoshaphat rui kaphaan lynmei khang tiswlou khwan e.

⁴Jehoram rui guanghdic tei sin ntipna sinlou tang pwkhou, kachana guay ta swluai the. Mi nac tei hamhna Isaraelmei meicdaihmei gaanvsaekc ta ni swluai the.

⁵Jehoram tei katingkwm 32 tangc pwkhou Jerusalem khou tingkwm tachat guangh swlou khwan e.

⁶Kamei guangh Ahab khatni baihmei Isaraelmei guangc nunc tuang simei thak layluaihna lungc khwan e, kalam thu kamei Ahab nacpui ta kanow khang kaw khwan e. Kamei RINGHPOUC ruc khou paapc taanc khwan e,

⁷tiki RINGHPOUC rui David kaikhwangmei ta swmaan nii mak khwan e, kalam thu David tuang kikta rui guangh sw tanh tan bam puni twna David khou latdyng swlou khwan e.

⁸Jehoram rui guangh sw bammei ganv khou Edommei tei Judamei bangc khou bam lak khe twna rihthauna kaniw tei nyngswmei guanghdic akhat sw kan the.

⁹Kum tina Jehoram lev katuang meicdaihmei nunc rui katuang takuanc gari pang phungcna Edom ruc khou rihkey the. Khoutei Edommei ricmei nunc rui kaniw ta dingbin the, tiki zingbangc rui kaniw pak duak pat the.

¹⁰Mi khou tei rui thauna Edom tei Juda khou rui nyngsw kan the. Mi ganv kahak khou tei, Libna kaidaimei ni Juda bangc khou bam lak khe twna rihthau the. Mi hei Jehoram rui kapu kapouc nunc tuang Racguangc RINGHPOUC ta mpatloumei zaeng rui e.

¹¹Kamei rui Judamei tuang kauhmei bamv guay khou rav baihmei ta kalummei bamv kasiamhlouna Judamei lev Jerusalemmei ta RINGHPOUC ruc khou paapc titaanc khwan e.

¹²Mi khou tei muhzwng Elija rui Jehoram khou tatdyn akhat tii guang khwan e. Kamei rui kumna hylou khwan e: “Nang pu nangpouc David Racguangc RINGHPOUC rui nang ta ganc pat the, kalam thu nang hei nang pu guangh Jehoshaphat, hamh e thei nang pouc guangh Asa tuang gaymei thei tei layluaih mak khe.

¹³Mi phaan tei, nang rui Isaraelmei guangc nunc thei layluaihna Ahab khatni katangv khou lungcloumei guangc nunc rui Isaraelmei ta lwm nuh makmei tiswloumei kumcna nang rui Judamei khatni Jerusalemmei ta Ravguangc khou lwm nuh makmei nunc tiswlou the. Nang rui nang khang suangc gaymei nang chana nunc ta nganvna swluai the.

¹⁴Hei zaeng rui RINGHPOUC rui nang mei nunc ta, nang nac nunc ta, khatni nang now nunc ta tanhmei dandi tii puni the, kumna nang tuang lanv guay swmaan puni the.

¹⁵Nangrei nangruc khou suc sihmei ravpuat nai puni the kumna mi ravpuat tei tingmik tingmik khou si khith khit gutna nang bung phou puni the.”

¹⁶Duipuitin khou lungc bammei Sudanmei nunc daeng khou Philistinmei lev Arabmei gaanvsaekc ni lungc bam khwan e. Jehoram ruc khou rihkey khang mi nunc ta tei RINGHPOUC rui katiulou the.

¹⁷Mi nunc tei rui Juda khou rih keyna guanghkai tei kwam laa the, kumna guangh now nunc lev kanac mpouh nunc ta tei nym tat ngam kan the. Guangh nac mpouh alauc liangmei Ahazia ta na ganclou duc the.

¹⁸Mi guay hei tiguang tanghmei tangv, RINGHPOUC rui guangh khou tei karei suhmei ravpuat tiguang the.

¹⁹Tingkwm kanei si khith khit gutna nkhamh khou kabung phouna ryanra sihna theic the. Katuang mei nunc rui kakhang thu kapu kapouc nunc khang swloumei kumcna chakhuan maipui nggaanna huaylou kan mak khe.

²⁰Jehoram tei katingkwm 32 khou guangh swna Jerusalem khou tingkwm tachat guangh swlou khwan e. Kamei theic pwkhou meic gaanv khat na sini zaengsilou mak khe. Kaniw rui kata David kaidai khou mbeihlou sini guangh nunc tuang tarou khou thu mbeihlou mak the.