Read Rongmei Naga 2 KINCHAKH 22 Bible Online

2 KINCHAKH 22 - Rongmei Naga bible

2 KINCHAKH 22

¹Arabmei rui rihkeyna guangh Jehoram nac mpouh guayna ta swluai ngam kan the; kumna nah mpouh alauc liangmei Ahazia na ta ganclou duc the. Kumna Jerusalemmei nunc rui Ahazia ta guangh tiswlou dat the.

²Ahazia tei katingkwm 22 khou guangh swna kamei Jerusalem khou tingkwm akhat guangh swlou khwan e.

³Ahazia tei ni guang Ahab kai thei layluaih khwan e, kalam thu kapui guangh Ahab nacpui khatni Isaraelmei guangc Omri toupui Athalia rui nchamloumei kamei piuna simei taanv taanc the.

⁴Kamei rui RINGHPOUC ruc khou paapc taanc khwan e, kalam thu kapu theic kanmei tangv Ahab kaikhwangmei nunc rui katuang latdinhpouc nunc swna kaniw rui kata swkasiclou the.

⁵Kaniw rui samei tei piuna, Isaraelmei guangc Joram rui Siriamei guangc Hazael ta rihswmei khou kamei ni lay kazauhhlou the. Mi rihmei kang kanei tei Gilead tuang Ramot khou adow the, kumna Joram tei rihbamv khou rui kabiu the.

⁶Kamei nzamhmei tei gay dat mak saanv Jezreel kaidai khou guangna bam dat the. Mi ganv khou tei Ahazia rui kata guang zauc khwan e.

⁷Ahazia rui Joram ta guang zauhmei tei Ahazia tuang theihbamv Ravguangc rui tiswlou the. Mi khou tei Ahazia bammei ganv khou tei, Ahab kaikhwangmei ta swmaan khang Ravguangc rui kadahloumei Nimshi nac mpouh Jehu tei guang the.

⁸Ahab kaikhwang ruc khou taanc o twna Ravguangc rui tiimei latdanv tei Jehu rui taanc keyna bam khou Ahazia rui Joram ta guang zauh khou kathei lay guangmei Judamei kapy nunc lev kachana nac mpouh nunc ta tei Jehu kamei rui ariw the. Kamei rui kaniw ta swluai the.

⁹Kumna Ahazia ta phu thau the, kumna kamei Samaria kaidai khou nkamh bammei ta kaniw ariw the. Kaniw rui Ahazia ta Jehu khou nduangh guang tina Jehu rui swluai kan the. RINGHPOUC tuang siamruai kamei ngammei kasang swlou khwanmei kapouc guangh Jehoshaphat zaw zaucna kaniw rui kapumc tei mbeihlou the. Ahazia kai kaikhuncmei guangh sw nuhmei gaanv khat na sini nsaekclou mak khwan the.

¹⁰Guangh Ahazia pui Athalia tei kanac ta swluaimei chamv tei chu rappui lev Judamei guangckai kaikhuncmei guay ta swluai ngam o twna kamei rui latdanv pat the.

¹¹Ahazia tanpui Jehosheba twmeipui amuh Jehoiada now swmeipui gaanv khat nai khwan e. Ahazia nac mpouh Joas ta swluai nimei khou tei rui mipui tei rui nkamhna laana Ravkai tuang zykai khou nkamhlouna makuat the. Kumna mi nac ta tei Athalia baanc khou theic nimei khou rui kanlou the.

¹²Athalia rui liammav swna kandih sin bam saanv tei kata mi bamv khou tei tingkwm charuk nkamhlou the.