Read Rongmei Naga 2 KINCHAKH 24 Bible Online

2 KINCHAKH 24 - Rongmei Naga bible

2 KINCHAKH 24

¹Joas tei katingkwm chanei khou Judamei guangc sw the, kumna kamei Jerusalem khou tingkwm 40 guangh swlou khwan e. Kapui tei Beersheba kaidaimei Zibia e.

²Joas tei amuh Jehoiada lungc bam saanv tei RINGHPOUC rui kahawmei taancna lungc khwan e.

³Jehoiada rui kanow kanei phulou khwan e kumna mi nei tei rui kanac mpouh aluh puanclou geic khwan e.

⁴Joas guangh sw kanakmei tangv, Ravkai tei katamv dat ni the twna ning the.

⁵Judamei tuang kaidai guay khou tatna Ravkai katamv dat khang syan kakha o twna kamei rui amuh nunc lev Levimei nunc ta latdanv patna thouc the. Katumcna taanh khang kamei rui kaniw ta thouc the, tiki Levimei nunc tei nzaengna bam the,

⁶kum tina kamei rui kaniw tuang kapy swmei Jehoiada ta kaw guangna “RINGHPOUC bangc Mousi rui RINGHPOUC ta kalummei pheykai khou sinsw khang meic nunc rui tii nina e twna saloumei thaengv tei Levimei nunc rui Jerusalem khatni Juda khou tatna kakha nimei tuang tei tabui swna nang zauclou mak tu cho?” twna sa the.

⁷(Meicsimeipui Athalia thei laymei nunc rui Ravkai tei swkasiclou khwan e, kumna nthanmei puat mpeyna Baal ta kalummei khou sinswlou khwan e.)

⁸Guangh rui Levimei nunc khou tei syanthaengv tei lou khang thingkhuk kasiamhna Ravkai mun khou tei lou o twna latdanv pat the.

⁹RINGHPOUC bangc Mousi rui tazikramv khou kakha kanmei syankhav tei RINGHPOUC khou meic kathuicna phungc guang tho twna Jerusalem khatni Juda kabamv kathuicna khou dinc liklou the.

¹⁰Mi khou tei meic nunc khatni kapy swmei guay tei neihla the kumna kaniw thaengv tei phungc guangna thingkhuk tei lou padiklou the

¹¹Levimei nunc tei rui mi khuk tei tingmik pum mi khuk tei sinmei guangh tuang meicdaihmeipu khou tei phungc guang bam khwan e. Hei tei padik dik khou guangh tuang hymeipu khatni Tingkuh rui kaphaan thoucloumeipu tei rui mi syan tei laa pat lana mi khuk tei kabamv khou lou dat raph rap khwan the. Kumna kaniw rui syan tei mpeyna khuam guang the.

¹²Guangh lev Jehoiada tei rui syan tei Ravkai tei katamv khang kathouc swmei nunc khou tei tiilou the, kumna kaniw rui thing, ntauh, khatni ntanh taanhmei nunc ta tei kaw lana kai tei katamv the.

¹³Kaniw rui taanv tei taanc ranvna taancna Ravkai tei kalwnlung kumcna ntipna kasiamhlou dat the.

¹⁴Katamv nimei guay katamv luaina daandi khatni kachaekc guay tei guangh lev Jehoiada khou tiilou dat tina hei tei rui Ravkai khou sinsw khang kamkuak lev mu-lai kasiamh the. Jehoiada tei ringc bam saanv Ravkai khou tei khaengmei taanv tei tat key tanh tan bam khwan e.

¹⁵Kamei gaanvthaihna katingkwm 130 tangcna theic the.

¹⁶Kamei rui Isaraelmei guay khang, Ravguangc khang, khatni Ravkai khang taancloumei taanv guay khang tei rui kata chakhwang swna David Kaidai khou guangh nunc tuang tarou khou kata mbeihlou the.

¹⁷Tiki Jehoiada tei theih rap pwkhou Judamei kapy nunc tei rui guangh Joas ta tei kaniw lat piu dat khang nthiam the.

¹⁸Kumna meic nunc tei kaniw pupouc Racguangc RINGHPOUC tuang Ravkai khou tei kalum taanna ravmaengc khatni ravpui Ashera maengc ta kalum tat kan the. Mi tuang paap zaeng rui Juda lev Jerusalem khou RINGHPOUC tuang lungpuam phungc guang the.

¹⁹RINGHPOUC rui muhzwng nunc ta thouc guangna kakhou hanc guang dat khang sa bam khwan e, tiki meic nunc tei chulou nii mak khe.

²⁰Mi ganv khou tei Jehoiada nac mpouh Zekaria ta Ravguangc bumaengc rui sinna kamei tei meic nunc rui how nuhmei bamv khou ding lana kumna kauc the, “Nangniw rui tabui swna RINGHPOUC lat piu makna nangniw rana nangniw ruc khou ryanramei tiguang bam tu cho twna RINGHPOUC rui sa e! nangniw rui kata mpatloupui zaeng rui kamei rui ni nangniw ta mpatlou the!”

²¹Zekaria ta swluai khang swmei khou tei guangh Joas ni lay kazauh the, kumna guangh tuang latdanv theilayna meic nunc rui Zekaria ta Ravkai kaimav khou tei ntauh nkwam the.

²²Guangh tei Zekaria pu Jehoiada rui kakhang taancloumei taanv ta tei amuc dat the, kumna kamei rui Zekaria ta swluai the. Zekaria tei theic nina bammei dyng khou, “Nang rui taanc bammei hei RINGHPOUC rui howlouna nang ta dandi tii kan diu!” twna kauclou duc the.

²³Mi kwm tei chakaanv pat pwkhou, Siriamei ricmei rui Juda lev Jerusalem ta adowna kapy swmei guay ta swluaina ramh mpeyna Damaskas thangc phungc tat kan the.

²⁴Siriamei ricmei tei raw de, tiki RINGHPOUC rui kaniw suangc geihmei Judamei ricmei ta tingamlou the, kalam thu meic nunc rui kaniw pupouc Ravguangc RINGHPOUC ta mpatlou the. Heikumna Joas ta dandi tii kan the.

²⁵Rihbamv khou tei rui Joas tei zamh kasicna zamh the, kumna zauczihmei tei tat dat kan pwkhou katuang meicdaihmei gaanv nei rui kata kalaeng khou rui swluaina amuh Jehoiada nac mpouh ta swluaimei tuang khwm tei laa dat kan the. Kata tei David Kaidai khou mbeihlou the, tiki guangh nunc tuang tarou khou thu mbeihlou mak khe.

²⁶(Kata swluaimei nei kiu thu Amonmeipui Shimeat rui puanhmei Zabad lev Moabmeipui Shimrit rui puanhmei Jehozabad kaney khwan e).

²⁷Guangh nunc tuang buk lam khou hyloumei buk khou tei Joas nac mpouh nunc lam, kalam khou ravmun dincloumei, khatni kamei rui akumhna Ravkai katamv dat kan tu cho twmei lam khou hylou the. Kumna kanac mpouh Amazia rui kaphaan guangh sw dat the.