Read Rongmei Naga 2 KINCHAKH 25 Bible Online

2 KINCHAKH 25 - Rongmei Naga bible

2 KINCHAKH 25

¹Amazia tei katingkwm 25 khou kamei guangh swna kamei Jerusalem khou tingkwm 29 guangh swlou khwan e. Kapui tei Jerusalemmei Jehoaddin e.

²Kamei RINGHPOUC rui kahawmei tei taanc khwan e, tiki kamei kalung kapwm gutna thu taanh mak khwan the.

³Kamei rui ngamv tei ntipna sin rappui lev, kapu ta swluaimei meicdaihmei nei ta tei swluai dat the.

⁴“Kapu khuay zaeng rui kanac nunc ta swluai nuh mak ge, khatni kanac nunc khuay zaeng rui kapu nunc ta swluai nuh mak ge, nkhuaipui mei na ta tei swluai nina e,” twna Mousi tuang Riakdanv khou RINGHPOUC rui latdanv tiiloumei tei kamei piuna kaney nac nunc ta thu swluai mak ge.

⁵Guangh Amazia rui Judamei lev Benjaminmei rihphyan guay ta khuamna, puinac langv langv swna meic 1000 kang khatni 100 kang swna kasiamhlouna rihpy nunc ni lou the. Mi khou tei tingkwm 20 khou rui karuc kumei guay meic guayna rihphyan 3,00,000 the. Kaniw tei suc-rih khou tat ngammei, buy khatni nggih sinthaymei rihphyan rana khwan e.

⁶Kamei rui Isaraelmei khou rui ni daandi kilogram 3,400 dou tiina rihmei 1,00,000 ney guang the.

⁷Tiki muhzwng akhat rui guangh daeng khou guangna sa the, “Mi Isaraelmei ricmei nunc ti hei nang nduangh tat riu. Mi dihpy Guangcdic thangc meic nunc ti hei RINGHPOUC rui nduanghlou mak ge.

⁸Kaniw rui nang ta rihbamv khou nkhavlou puni twna nang ning bam nuh e, tiki rih tingamlou nimei hamh e thei zaw tisilou nimei hei RINGHPOUC baanc khou nai e kumna kamei rui nang tuang ricmei nunc ta zaw tisilou puni.”

⁹“Kum e thei ai rui kaniw khang tii kanmei daandi tei thu akumh nina?” twna Amazia rui muhzwng khou tei thanv the. Muhzwng tei rui daw the, “Mi khang tei suangc geicna RINGHPOUC rui tiilou dat ngam de!”

¹⁰Kumna Amazia rui kaw guangmei ricmei nunc ta tei kaniw kai kai thangc thouc hanc dat kan the. Kaniw tei Judamei ta kaniw lungpuamcna kaniw kai tat dat kan the.

¹¹Amazia tei bauc thauna rihmei nunc ta nduanghna Ntey tuang nzaengc khou key the. Kaniw tei adowna Edommei ricmei 10,000 ta dowluai the,

¹²kumna baihmei 10,000 ta nym the. Kaniw rui nymmei nunc ta tei Sela kaidai tuang khowtau khou zay patna thuikey tina kaniw tei khowbangc thangc diangc luai tat ngam kan the.

¹³Kum bammei ganv khou tei thouc hanc dat kanmei Isarael ricmei nunc tei rui Samaria lev Beth Horon kak khou naimei Judamei tuang kaidai guay ta adowna meic 3000 ta dowluai the kumna ramh mpeyna laa kan the.

¹⁴Amazia tei Edommei ta rih ngamna guang dat khou tei kaniw tuang ravmaengc mpeyna phungc guang khwan e, kumna mi guay tei louna agaw nteina kalum bam khwan e.

¹⁵Mi khou tei RINGHPOUC kalungpuamcna Amazia khou muhzwng gaanv khat thouc guang the. Mi muczwng tei rui sa the, “Kata kalummei nunc ta nang baanc khou rui kanlou ngam makmei rav nunc ta tei nang tabui swna kalum bam tu cho?”

¹⁶Khoutei Amazia rui kalat asutna sa the, “Tabui nungc rui nang ta guangh tuang latdinhmei khang kadahlou thena cho? Sa nthaekc tho, nthaekc mak ge thei nang ta swluai puni.” “Nang rui mi hei tancna ai rui samei laalou makmei zaeng rui RINGHPOUC rui nang ta swmaan puni the,” twna salou ducna muhzwng tei sa nthaekc kan the.

¹⁷Guangh Amazia lev katuang latdinhmei nunc tei Isaraelmei ta adow khang ding the. Kamei Jehu tou, Jehoahaz nac mpouh Isaraelmei guangc Jehoas ta rih khaengc the.

¹⁸Jehoas rui kumna daw guang the: “Kaganv akhat khou Lebanon Chyng tuang sauh raengh bang rui Sidar bang khou ‘Nang nac aluhpui tei anac now khang tii o’ twna sa guang khwan e. Khoutei nwmbangc khouringc tat guangna sauh bang tei niipuat kan the.

¹⁹Amazia, ntaw nang rui Edommei ta ngam the twna nang gaengh sw bam e, tiki nang kai khou reina bammei gay e twna ai sa nii e. Tabui swna nang khatni nang mei nunc ryanra khang karangh bam tu cho?”

²⁰Tiki Amazia rui chulou mak khe. Amazia ta zaw tisiloumei hei Ravguangc rui ningmei khwan the, kalam thu kamei rui Edommei rav nunc ta kalum the.

²¹Kumna Isaraelmei guangc Jehoas rui Judamei guangc Amazia ruc khou rih key the. Juda tuang Beth Shemes khou kaney adow the,

²²kumna Judamei ricmei nunc tei ngam makna kakai kakai pak hanc dat ngam kan the.

²³Jehoas rui Amazia ta nymna Jerusalem khou zay guang the. Kamei rui Jerusalem raengc tei Ephraim raengcmun khou rui Kaikwn raengcmun nganv chowbuk 400 doumei dak swra the.

²⁴Ravkai khou naimei kachaekc lev daandi guay, Obed Edom kikta nunc rui gaek bammei Ravkai taanv na guay, khatni guanghkai tuang lanv guay kamei rui laa tat kan the. Kumna meic mpeyna ta ni nym tat khwan e.

²⁵Judamei guangc Amazia tei Isaraelmei guangc Jehoas suangc tingkwm 15 ringc mbu khwan e.

²⁶Amazia rui taancloumei baihmei guay ni kamei guanghtu thau rap khou rui luaimei nganv Judamei lev Isaraelmei guangc nunc tuang Chakh buk khou hylou the.

²⁷Kamei rui RINGHPOUC ta liam rap khou rui thauna kata tei swluai khang Jerusalem khou rik thau khwan the. Nkhamh khou kamei Lakis kaidai thangc paklou the, tiki kata zauczihmei nunc rui mi khou tei suic guangna kata swluai the.

²⁸Kapumc tei takuanh khou rui Jerusalem khou phungc guang datna David Kaidai khou guangh nunc tuang tarou khou mbeihlou the.