Read Rongmei Naga 2 KINCHAKH 26 Bible Online

2 KINCHAKH 26 - Rongmei Naga bible

2 KINCHAKH 26

¹Judamei nunc rui tingkwm 16mei Amazia nac mpouh Uzzia ta kapu phaan guangh sw lyn khang kadahlou the.

²(Amazia theihmei tangv Uzzia rui Elat kaidai ta laa datna mi kaidai tei kasiamh dat the.)

³Uzzia tei katingkwm 16 khou guangh swna kamei Jerusalem khou tingkwm 52 guangh swlou khwan e. Kapui tei Jerusalemmei Jekolia e.

⁴Kapu theilayna kamei RINGHPOUC rui kahawmei taancna lungc khwan e.

⁵Katuang ravchaptatmei latdinhpouc Zekaria tei ringc bam saanv, kamei Ravguangc siamruai swchuyna sw bam khwan e, kumna Ravguangc rui kata suaihiamlou khwan e.

⁶Uzzia tei Philistinmei ta adow tat khwan e. Kamei rui Gat, Jamnia, khatni Asdod kaidai guay raengc swrana Asdod daeng khou khatni Philistia kabamv baih baih khou raengh raengloumei kaidai mpeyna kasiamhlou khwan e.

⁷Ravguangc rui nkhavlouna Philistinmei ta, Gurbaal khou lungc bammei Arabmei ta khatni Meunmei ta rihngam khwan e.

⁸Ammonmei rui Uzzia khang dihkhav tii khwan e, kumna kangamv heidikamv daicna kazanc tei Izip nganvna dinc tangc khwan e.

⁹Uzzia rui Kaikwn Raengcmun khou, Nzaengc raengcmun khou, khatni raengh kalikmei bamv khou rihphaankai kasiamhlouna Jerusalem ta gaekmei taanv tei titanclou khwan e.

¹⁰Kamei rui tazikramv khou rihphaankai mpeyna kasiamhlou khwan e khatni duikhunc mpeyna kasiamhlou khwan e, kalam thu chyngphay khou lev nzaengc khou katuang khouringc mpeyna nai khwan e. Kamei lau taanhmei ta kahawmeipu la mei zaeng rui kamei rui meic nunc ta chyngramv khou drakhalau taanh khang khatni kandih gaymei ramv guay khou lau taanh khang katiulou khwan e.

¹¹Rihbamv khou tat khang chamdaanvloumei katuang ricmei mpeyna nai khwan e. Kaniw tuang lam tei hymei Jeiel lev Maaseia rui guangh tuang mei Hanania rui zayloumei bangc khou hylou bam khwan e.

¹²Rihmei guay tei rihpy 2,600 rui phungc khwan e.

¹³Kaniw bangc khou tei ramh ngammei rihmei 3,07,500 nai khwan e.

¹⁴Uzzia rui rihmei nunc khang tei nggih, buy, pyrun, rih thiula, sauhpai, pailu khatni tauziuc tauc nzanhlou khwan e.

¹⁵Jerusalem khou baanhthaymei nunc rui pailu kaapmei tuang khatni rihphaankai lev raenghkwn khou rui ntauh daih daihmei phaic keymei tuang puat kasiamhlou khwan e. Ravguangc rui nkhavloumei paan rui kazanc tei kabamv kathuicna khou zin lik khwan e, kumna kamei kangamv daihmeipu sw khwan e.

¹⁶Guangh Uzzia tei kamei tanc thau pwkhou, kamei kagaengh sw thau the kumna hei tei rui kata tina phaysuy the. Kamei rui RINGHPOUC ta thouhsw makna agaw ravchapaeng khou agaw ntei khang kamei Ravkai khou gut khwan e.

¹⁷Amuh Azaria tei tanhmei khatni bauhmei amuh gaanv 80 ta nduanghna guangh thei tei lay guangna

¹⁸kata khaam khang sw the. Kaniw rui kakhou sa the, “Uzzia! nang rui RINGHPOUC khou agaw ntei khang nang ngamv maek ge. Aron khou rui lungc keymei amuh nunc na ta hei tei taanh khang kat gutloumei tuang de. Mi nthanmei bamv khou rui tat pat tho. Nang rui RINGHPOUC Ravguangc lung tipuamclou the, kumna nang khou katuang suaihiam nai dat mak khe.”

¹⁹Mi ganv khou tei Uzzia tei Ravkai khou tei agaw nteimei kuak tei sinna agaw ravchapaeng daeng khou ding bam khwan e. Kamei rui amuh nunc ta tei kalungpuamc the, kumna mi dyng khou tei kasanpiang khou meicpingmei tuang phaanhmei ravpuat pat the.

²⁰Azaria lev baihmei amuc nunc tei rui guangh sanpiang khou tei zauc pwki mi ravpuat tei how the, kumna kata Ravkai khou tei rui namna titat pat the. Kamei ni katumcna tat pat khang sw the, kalam thu RINGHPOUC rui kata riap the.

²¹Guangh Uzzia tei mi ravpuat zaeng khou tei kapanty saanvsaengh nthan makmei sw kan the. Kamei tei Ravkai khou gut dat nuh makna kanac mpouh Jotham khou kandih sinmei taanv guay tei tiilouna kamei kakai khou rana bam kan the.

²²Guangh Uzzia rui kamei guangh sw bammei ganv khou taancloumei baihmei guay Amoz nac mpouh muhzwng Isaia rui hylou the.

²³Uzzia tei theicna kata guangh nunc tuang tarou bamv khou mbeihlou the, tiki katuang ravpuat zaeng rui guangh nunc tuang tarou khou thu mbeihlou kan mak khe. Kanac mpouh Jotham rui kaphaan guangh sw lyn dat the.