Read Rongmei Naga 2 KINCHAKH 27 Bible Online

2 KINCHAKH 27 - Rongmei Naga bible

2 KINCHAKH 27

¹Jotham tei katingkwm 25 khou guangh swna kamei Jerusalem khou tingkwm 16 guangh swlou khwan e. Kapui tei Zadok nac aluhpui Jerusha e.

²Kamei kapu kumcna RINGHPOUC rui kahawmei tei taanc khwan e; tiki kapu rui sw kanmei kumcna Ravkai khou agaw nteina thu paap taanh mak ge. Meic nunc tei thu nthaekc makna paapc taancna bam khwan e.

³Jotham rui Ravkai tuang Dihpy raengcmun tei kasiamh khwan e kumna Jerusalem raengc Ophel twna kawmei raengc tei kamei kasiamhlou khwan e.

⁴Juda tuang chyngbut guay khou kaidai khatni nwmbangc guay khou rihgaekkai lev rihphaankai mpeyna swlou khwan e.

⁵Kamei rui Ammonmei guangc ta adowna ngam khwan e. Kumna kamei rui Ammonmei ta dihkhav daandi kilogram 3,400, gehu metrik ton 1000 khatni sipian metrik ton 1000 hei tingkwm khat khat tuang swna tingkwm kathumh tii bam khang swlou khwan e.

⁶Jotham tei kamei RINGHPOUC kaRacguangc lat piu chuyna piumei zaeng rui kangamv naina lungc khwan e.

⁷Jotham rui guangh swmei douc taancloumei baih baihmei pat kanmei guay, kamei rui suc-rih swmei, khatni kamei rui taanhmei guay Isaraelmei lev Judamei guangc nunc tuang Chakh buk khou hylou the.

⁸Jotham tei katingkwm 25 khou guangh swna kamei Jerusalem khou tingkwm 16 guangh swlou khwan e.

⁹Kamei theicna David Kaidai khou mbeihlou the. Kanac mpouh Ahaz rui kaphaan guangh sw lyn dat the.