Read Rongmei Naga 2 KINCHAKH 28 Bible Online

2 KINCHAKH 28 - Rongmei Naga bible

2 KINCHAKH 28

¹Ahaz tei katingkwm 20 khou guangh swna kamei Jerusalem khou tingkwm 16 guangh swlou khwan e. Kamei tei kapu kapouc guangh David tuang gaymei thei tei layluaih makna RINGHPOUC rui kahaw makmei taanv taanc the.

²Kamei rui Isaraelmei guangc nunc thei layluaih khwan e. Kamei rui ntanh rui kasiamhmei Baal tuang ravmaengc louna,

³Hinnom nzaengc khou agaw nteina kalum the, kumna Isaraelmei nunc guang pwkhou nthau ganc kanmei zaat nunc tuang chanymei taanv tei layluaihna kamei rui kanac mpouh nunc ta nganvna mai nteina mi rav khang tei khaeng the.

⁴Chyngbut khou khatni thingbang bangc khou rav baihmei ta kalummei bamv guay khou Ahaz rui khaeng the khatni agaw ntei the.

⁵Heikum tipuizaeng rui RINGHPOUC Ravguangc rui Siriamei baanc khou tiipat the. Karuc khou rih keyna rih ngamlou the kumna Judamei meic mpeyna ta kangmei swna zay tatna Damaskas khou nduangh guang the. Isaraelmei guangc rui ni karuc khou rih keyna meic mpeyna ta swluailou khwan e.

⁶RINGHPOUC rui Isaraelmei guangc Remalia nac mpouh Peka ta guangh Ahaz khou rih tingamlouna zaeng neihkhat na khou rui Judamei tanc liangmei rihmei 1,20,000 ta dowluai the. Kalam thu Judamei nunc rui kaniw pupouc rui lwmmei RINGHPOUC Racguangc ta mpatlou the.

⁷Isaraelmei ricmei Zikri rui guangh Ahaz nac mpouh Maaseia, guanghkai sinmeipu Azrikam, khatni guanghmun sinmeipu Elkana hei nunc ta swluai the.

⁸Judamei nunc tei kaniw chana punav bam khwan sini Isaraelmei rui ntumei khatni alauc 2,00,000 ta kangmei swna Samaria thangc phungc tat kan the. Puatc mpeyna ni phungc tat kan the.

⁹RINGHPOUC tuang muczwng Oded twmeipu Samaria kaidai khou lungc bam khwan e. Isaraelmei ricmei nunc tei Judamei kangmei nunc ta zayguangna Samaria kaidai tei gut nina bam khou kamei rui ariwna sa the, “Nangniw pupouc Racguangc RINGHPOUC rui Judamei ta lungpuamcna kaniw ta nangniw baanc khou tiilou the, tiki nangniw rui kaniw ta rih ngamna dowluai ngam kanmei tei kamei chu the.

¹⁰Ntaw nangniw rui Jerusalemmei khatni Judamei ta ntumei khatni nggaanvmei ta nangniw bangc tisw khang swna bam the. Nangniw ni RINGHPOUC nangniw Racguangc ruc khou paapc taanc the twmei nangniw thay makna cho?

¹¹Ai rui samei hei nking o! Mi kangmei nunc hei nangniw chana khatni tanpui nunc e. Kaniw ta mpat dat tho, kum mak ge thei RINGHPOUC rui kalungpuamcna dandi tii puni.”

¹²Dihpy Guangcdicmei kapy swmei gaanv padeih—Jehohanan nac mpouh Azaria, Meshillemot nac mpouh Berekia, Shallum nac mpouh Jehizkia khatni Hadlai nac mpouh Amasa rui ni mi ricmei nunc tuang taanv ta tei nuh mak khe.

¹³Kaniw rui sa the, “Mi kangmei nunc ta mi khou hei phungc guang riu. Aniu rui RINGHPOUC ruc khou paapc taancna aniu ta dandi tibiuc kalung tipuamclou tang bam di the. Ntaw aniu khuay ti-mbulou dat ni hena cho?”

¹⁴Kumna rihmei nunc tei rui kangmei nunc khatni laaguangmei puat guay tei meic nunc khou khatni kapy nunc khou tiilou the,

¹⁵Kumna kangmei nunc khang tei laaguangmei phey guay tei nzanhlou khang kapy swmei gaanv padeih khou tei nsinlou the. Kaniw rui mi nunc khang tei pheybaan lev phaythuapc tiilou the, tu biuc zangv biuh khang ni tiilou the, khatni kaniw tuang zamvzei khou tei Olive thauc teylou the. Karana tat ngam makmei guay ta tei kuanniam khou lou the, kumna kaniw guay ta tei Judamei tuang kaidai, tadanvbang kaidai twna kawmei Jeriko khou phungc guang dat the. Mi tangv tei Isaraelmei tei Samaria khou hanc guang dat the.

¹⁶Mi ganv khou tei guangh Ahaz rui kata nkhavlou khang Asiriamei guangc Tiglath Pileser khou zaeng huay khwan e.

¹⁷Kalam thu Edommei nunc rui Juda khou rih keyna meic nunc ta kangmei swna nym tat the.

¹⁸Mi ganv khou tei Philistinmei ni neihkey chyngphay ramv khou Juda tuang dihba ramv khou naimei kaidai guay khou rihkey bam khwan e. Kaniw rui Beth Shemes, Aijalon, khatni Gederot kaidai guay laa kan the, khatni Soko, Timna khatni Gimzo kaidai guay tei kadaeng khou naimei namvdai guay lev twna laana mi khou tei lungc kan the.

¹⁹Judamei guangc Ahaz rui simei taanv ta katiu thaumei khatni RINGHPOUC ta thouhsw makna samei zaeng rui, RINGHPOUC rui Judamei ruc khou ryanramei tiguang the.

²⁰Asiriamei guanghdaihmei rui Ahaz ta nkhavloumei phaan kata adow the kumna tiryanralou the.

²¹Kumna Ahaz rui Ravkai khou rui, guanghkai khou rui, khatni meic nunc tuang kapy nunc kai khou rui kachaekc laana guanghdaihmei khang tei tii the, kum bam sini hei tei rui gaeng mak khe.

²²Ahaz tei katuang ryanramei tei mbu thau pwkhou, kamei rui RINGHPOUC ruc khou paapc taanc mbu hay hay thau the.

²³Kata ngamloumei Siriamei tuang rav khou khaeng the. Kamei rui sa the, “Siriamei tuang rav rui Siriamei guangc nunc ta nkhavlou the, kumna ai rui kakhang khaeng ti thei ata ni nkhavlou pwng the.” Mi hei rui karuc khou khatni kamei nunc ruc khou swkamut kamaimei tiguang the.

²⁴Mi na tei hamhna kamei rui Ravkai tuang taanv na guay laana hei tei swpuat paruat ruatlou the. Kamei rui Ravkai tei mbangh the kumna Jerusalem kabamv kathuicna khou ravchabamv kasiamh thau the.

²⁵Juda tuang kaidai khatni namvdaih kathuicna khou, kamei rui ravmaengc kalummei bamv kasiamh thau the, kumna mi bamv guay khou tei rav baihmei khang agaw nteina kalum the. Heikumna karana karuc khou RINGHPOUC, kapu kapouc Racguangc lungpuam phungc guang the.

²⁶Kamei rui guangh sw khou pat kanmei baihmei guay, kahouh khou rui thauna luaimei nganv Judamei lev Isaraelmei guangc nunc tuang Chakh buk khou hylou the.

²⁷Guangh Ahaz tei theicna Jerusalem khou mbeihlou the, tiki guangh nunc tarou khou thu mbeihlou mak khe. Kanac mpouh Hezekia rui kaphaan guanghtu lyn dat the.