Read Rongmei Naga 2 KINCHAKH 29 Bible Online

2 KINCHAKH 29 - Rongmei Naga bible

2 KINCHAKH 29

¹Hezekia tei katingkwm 25 khou kamei Judamei guangc sw the kumna kamei Jerusalem khou tingkwm 29 guangh swlou khwan e. Kapui hei Zekaria nacpui Abija e.

²Kamei kapu kapouc David thei lay luaihna RINGHPOUC rui kahawmei taancna lungc khwan e.

³Hezekia kamei guanghtumei kwm reymei bw khou kamei rui Ravkai raengcmun guay tei laanc datna Ravkai tei katamv dat the.

⁴Kamei rui amuh nunc lev Levimei kang akhat ta Ravkai tuang neihpat biak kaimav khou tei kaw kaduaina

⁵kaniw khou sa the. Kamei rui sa the, “Levimei nangniw pumc nthan lana nangniw pupouc Racguangc RINGHPOUC tuang Ravkai hei sw nthan nina e. Ravkai ta swtanacmei puat guay tei laa ganc o.

⁶Aniu pupouc nunc tei RINGHPOUC aniu Racguangc khou lwm nuh makmei swna kamei rui kahawmei taanh makna lungc the. Kaniw rui kata mpatlouna kamei bammei bamv khou kaniw thei karihlou the.

⁷Kaniw rui Ravkai tuang kaikhamv guay tei mbanghlou the, thauhmai guay sw amit the, kumna Isarael Ravguangc tuang Ravkai khou agaw ntei taan the, khatni rawna khaeng taan the.

⁸Mi zaeng rui RINGHPOUC rui Juda khatni Jerusalem ta lungpuamcna kamei rui taancloumei taanv tei rui meic kathuicna ta tikaluanglou khwan e khatni tipinglou khwan e. Nangniw rui hei tei nthanna thay e.

⁹Aniu pu nunc ta tei rih bamv khou swluai kan the, kumna aniu nownac nunc ta tei kangmei swna zay tat kan the.

¹⁰“Kumhpui zaeng rui, Isaraelmei Racguangc RINGHPOUC lev latdyng sw ni the twna ai ding the, kum e thei kamei rui aniu ta lunghpuamcna bam dat mak khang e.

¹¹Anac nuncle, kaganv swmaan dat ri tho. Nangniw hei RINGHPOUC rui kakhang agaw ntei khang khatni meic nunc ta kalummei khou zaylou khang kadahloumei nunc the.”

¹²Kabangc khoumei Levimei guay hei mi khou tei kazauh the: Kohat puinacmei khou rui Amasai nac mpouh Mahat lev Azaria nac mpouh Joel Merari puinacmei khou rui Abdi nac mpouh Kis lev Jehallelel nac mpouh Azaria Gershon puinacmei khou rui Zimma nac mpouh Joa lev Joa nac mpouh Eden

¹³Elizaphaan puinacmei khou rui Shimri lev Jeuel Asap puinacmei khou rui Zekaria lev Mattania

¹⁴Heman puinacmei khou rui Jehuel lev Shimei Jeduthun puinacmei khou rui Shemaia lev Uzziel

¹⁵Mi nunc hei rui baihmei Levimei guay ta ni kaw kaduaina kaniw pumc sw nthan the. Mi tangv tei guangh tuang latdanv theilayna RINGHPOUC tuang latdanv suicna Ravkai tei sw nthan the.

¹⁶Amuh nunc tei Ravkai tei sw nthan khang kalungc khou gut the, kumna tanacmei puat guay tei kaimav khou puanc pat the. Levimei nunc tei rui mi khou tei rui kaidai paengc thangc Kidron nzaengc thangc laakey the.

¹⁷Reymei bw tuang reymei tingmik nungc kaniw rui mi taanv tei kahouhna zaeng tachatmei nungc kaniw rui mi taanv guay tei luai the, Ravkai tuang kaisaeng tei kazauhna luai the. Mi tangv tei zaeng tachat taanc datna mi bw tuang zaeng 16mei nungc nganvna taancna Ravkai tei kalummei bamv khang kasiamhlou dat the.

¹⁸Levimei nunc tei rui guangh Hezekia khou guangna kumna poulou the: “Aniu rui Ravkai tei rawna khaeng nimei tuang ravchapaeng, nthanmei ntyanpaeng, khatni taanv na guay tei sw nthanlou kan the.

¹⁹Guangh Ahaz rui kamei Ravguangc khou rui tat patmei ganv khou Ravkai khou rui laa pat kanmei taanv na guay tei ni laaguang datna katgutlou dat kan the. Hei tei RINGHPOUC tuang ravchapaeng hu khou lou kan the.”

²⁰Katumcna guang Hezekia rui kaidai tuang meicdaihmei nunc ta khuam kaduaina kaniw guayna Ravkai thangc tat the.

²¹Guanghkai tuang khatni Judamei guay tuang paap kuaklou khang khatni Ravkai sw nthan khang khatni khaeng khang kaniw rui guaituamchic chanei, lauziu chanei, lauziunac chanei, khatni ziuh chanei laa the. Mi guay tei ravchapaeng khou khaeng tho twna guangh rui Aron kiktamei amuh nunc khou tei sa the.

²²Amuh nunc tei rui guaituamchic guay tei dowluai rey the, mi tangv tei lauziu lev lauziunac guay tei dowluai the, kumna mi guay tuang zei tei ravchapaeng khou kazinhlou the.

²³Nkhamhliang khou kaniw rui ziuh guay tei guangh lev meic nunc daeng khou laaguangna kaniw baanc tei mi guay ruc khou tei mbaenglou the.

²⁴Kumlana amuh nunc tei rui meic nunc tuang paap guay kuaklou khang ziuh guay tei downa mi guay zei tei ravchapaeng khou bunlou the, kalam thu rawna khaengmei khatni paapc khang khaengmei taanv tei Isaraelmei guay khang taanc o twna guangh rui latdanv pat khwan e.

²⁵RINGHPOUC rui guangh David khou guangh tuang muhzwng Gad khou rui khatni muhzwng Nathan khou rui dincloumei theilayna Levimei nunc ta tei nrah, syamtuaic, guangh David rui sinswmei luna guay tei tisinna Ravkai khou tibamlou the.

²⁶Levimei nunc tei David tuang ludowmei nrah kumhmei sin lana khatni amuh nunc tei rui bianggun sinna Ravkai khou chamdaanvna bam the.

²⁷Rawna khaeng khang Hezekia rui latdanv pat the; kumna hei tei khaeng thau pwkhou meic nunc tei Ravguangc ta thuancna suan the, khatni ludowmei nunc rui bianggun khatni baihmei lu na guay palup thau the.

²⁸Khoutei bammei meic katana kalummei khou tei lay kazauh the, kumna khaengpuat guay tei raw ngam mak saanv lu suanmei khatni lu dowmei tei nthaekc makna tat key the.

²⁹Mi tangv tei guangh Hezekia khatni meic guayna tei tangkhungh keyna Ravguangc ta kalum the.

³⁰Guangh khatni kapy nunc tei rui Levimei nunc ta David rui khatni muhzwng Asap rui hyloumei thuanhlu tei RINGHPOUC khou suanlou o twna sa the. Kumna tangkhunghna meic kathuicna neihlana Ravguangc ta kalumna suan the.

³¹Hezekia rui meic nunc khou tei sa the, “Ntaw thu nangniw nthan the, kumna RINGHPOUC ta thuanckumei tuang kat nimei guay kat tho.” Kaniw tei hei tei taanc the, kumna gaanvsaekc rui rawna khaeng khang ni khouringh laaguang the.

³²Kumna RINGHPOUC khang rawna khaeng khang kaniw rui guaituamchic 70, lauziu 100, khatni lauziunac 200 laaguang the;

³³Meic nunc tu khang khatni khaeng khang ni kaniw rui guaituamchic 600 lev lauziu 3000 tii guang the.

³⁴Mi heizumei khouringc tei dowluai khang amuh nunc tei meic rau the, kum tina khaengmei taanv guay tei luai mak saanv Levimei rui nkhav the. Mi dyng khou tei amuh mpeyna ni pumh nthan dat kan the. (Pumh nthanmei khou hei amuh nunc suangc Levimei nunc rui ngaek chuy mbu khwan e.)

³⁵Kapwm rawna khaengmei ruc khou tei rui amuh nunc rui khaeng nimei kiu meic nunc rui tu nimei tuang khaengmei khouringc thav katmei, khatni rawna khaengmei khou kazauhmei drakhadui katmei hei guay hei e. Heikumna Ravkai khou kalummei taanv tei taanc thau dat kan the.

³⁶Guangh Hezekia khatni meic nunc tei neihla the, kalam thu mi guay tei katumcna taancluailou khang Ravguangc rui nkhavlou the.