Read Rongmei Naga 2 KINCHAKH 30 Bible Online

2 KINCHAKH 30 - Rongmei Naga bible

2 KINCHAKH 30

¹Isarael Racguangc RINGHPOUC ta kalumna Kaanpatpui ngai ngay khang Jerusalem tuang Ravkai khou guang o twna guangh Hezekia rui Ephraimmei lev Manasemei khou ni tatdyn tiina kaw the.

²Kalam thu guangh Hezekia khatni katuang meicdaihmei nunc khatni Jerusalemmei nunc tei kaphianh lana kaneimei bw khou ngay di kho twna nuhlou the.

³Tabuicho tiki nthanmei amuh biucna nai makmei zaeng rui khatni Jerusalem khou meic kabiuc guang kaduai ngam makmei zaeng rui kaanpatmei ngai tei kaganv chana ngay ngam mak khwan e.

⁴Guangh khatni meic nunc tei kaniw rui raengcloumei raeng khou tei neihla the,

⁵kumna mi latdanv theilayna Kaanpatpui Ngai tei kahu nungc suangc sini daicna ngay khang Jerusalem khou guang kaduai o twna dihpy thangc Dan khou rui dihba thangc Beersheba nganvmei khou bammei Isaraelmei guay ta kabai the.

⁶Guangh lev katuang meicdaihmei nunc rui latdiumei nunc Juda lev Isarael kabamv kathuicna khou thouclouna kumna sa the: “Isaraelmei nuncle, Asiriamei rui mi kandic khou rihkeymei khou tei rui nangniw duak pat the. Ntaw thu Abraham, Isak, khatni Jakob Racguangc RINGHPOUC khou hanc guang dat tho, kum e thei kamei rui nangniw khou guang dat puni.

⁷Nangniw thu RINGHPOUC kaniw Racguangc khou lwm nuh makmei nangniw pupouc nunc khatni nangniw chana punav Isaraelmei nunc tei kumh riu. Kaniw ruc khou si sihmei dandi tii kanmei tei nangniw how the.

⁸Kaniw kumcna lungning tanh riu, RINGHPOUC lat piu o. RINGHPOUC nangniw Racguangc rui tingsaeng khang sw nthanloumei Jerusalem Ravkai khou guangna kalung puamhmei nthaekc khang kata kalum o.

⁹Nangniw RINGHPOUC khou guang dat ti thei, nangniw riangluaic guay ta kangmei swna nym tat kanmei nunc tei rui kaniw ta zauc nzianlouna kai khou thouc guang dat nuh e. RINGHPOUC nangniw Racguangc hei thu zauzian thaymeipu e, nangniw kakhou guang dat ti thei, kamei rui nangniw ta laalou dat puni.”

¹⁰Latdiumei nunc tei Ephraim lev Manase ramv khou naimei kaidai kathuic khou, dihpy thangc Zebulun kaikhwang nganv tat tangcna sa the, tiki meic nunc rui kaniw ta sinnuina nuic the.

¹¹Tiki Aser, Manase, khatni Zebulun kaikhwang khou rui guang niimei gaanvsaekc thu nai the.

¹²Ravguangc rui Juda khou ni taanvtaanclouna guangh khatni katuang meicdaihmei nunc tuang latdanv tei piuna RINGHPOUC chwn piu khang kaniw lung ding khang chwn tichamclou the.

¹³Khay lou makmei Ngai tei ngay khang kaneimei bw khou meic mpeyna Jerusalem khou guang kaduai the.

¹⁴Jerusalem khou naimei khaengmei tuang khatni agaw nteimei tuang ravchapaeng guay tei laana Kidron nzaengc khou phaic key kan the.

¹⁵Kumna mi bw tuang zaeng 14mei nungc Kaanpatpui Ngai tuang khaeng nimei lauziunac guay tei swluai the. Nthan makmei amuh nunc khatni Levimei nunc tei ni zakna kaniw ni RINGHPOUC khou katgutlou dat the, kumna ntaw thu kaniw ni Ravkai khou rawna khaeng dat nuh the.

¹⁶Ravguangc mei Mousi tuang Riakdanv khou dincloumei theilayna kaniw ni Ravkai khou tei kaniw taanvtaanc dat the. Levimei nunc tei khaengmei zei ravchapaeng khou kazinhlou nimei amuh nunc khou tei khaengmei zei tei tikalaanv the

¹⁷kalam thu meic mpeyna tei nthan mak khe, kumhpui zaeng rui kaniw rui kaanpatmei lauziunac tei dowluai nuh mak khe, kum tina Levimei rui kaniw phaan lauziunac guay tei dowluaina RINGHPOUC khang katlou the.

¹⁸Mi na tei hamhna Ephraim, Manase, Isakar, khatni Zebulun kaikhwang guay khou rui guangmei meic geihmei pumc nthanmei taanv taanh makna kaniw tei Kaanpatpui Ngai tei nthuih makna ngay the. Guangh Hezekia rui kaniw khang kumna huayneylou the:

¹⁹“He RINGHPOUC, aniw pupouc Racguangc, kariak theilayna nthan mak sini kaniw lung kapwm gutna kalum bammei nunc ta nang zauzian paan rui kuaklou o.”

²⁰Hezekia rui huayneymei tei RINGHPOUC rui dawlouna, kamei rui meic nunc ta tei kuaklouna simei tipatlou mak khe.

²¹Jerusalem khou guang kaduaimei guay tei zaeng chanei neihlana Khay lou makmei Ntyan Ngai tei ngay the, kumna tingmik tingmik khou Levimei lev amuh nunc tei kaniw pumtan kapwm rui Ravguangc ta thuanc the.

²²Hezekia rui Levimei nunc ta tei RINGHPOUC ta kalummei khou zay chuyna zayloumei khang tei rui thuanclou the. RINGHPOUC kaniw pupouc nunc Racguangc ta thuanckumei tuang puatkat khaengna zaeng chanei ngay tangmei tangv,

²³zaeng chanei ngay dat khang kaniw rui dinglou dat the. Kumna kaniw neihlana ngay the.

²⁴Meic nunc tei dowtuna ngay khang guangh Hezekia rui guaituamchic 1000 khatni lauziu 2000 tiipat the, kumna meicdaihmei guay rui guaituamchic 1000 khatni lauziu 10,000 tiipat the. Amuh mpeyna pumh nthanmei taanv taanc the.

²⁵Kumna meic kathuicna—Judamei nunc, amuh nunc, Levimei nunc, dihpy thangc rui keymei nunc, khatni Isarael lev Juda khou lungc bammei zaatc baihmei nunc ni neihla the.

²⁶Jerusalem kaidai tei neihlamei rui padik the, kalam thu guangh Solomon ganv khou rui thau rapna mi kumhmei tei pat zat kan mak he.

²⁷Levimei lev amuh nunc rui meic nunc khang tei RINGHPOUC tuang suaihiam neylou the. RINGHPOUC rui tingkauh kakai thangc rui kaniw rui huayneymei chulouna dawlou the.