Read Rongmei Naga 2 KINCHAKH 31 Bible Online

2 KINCHAKH 31 - Rongmei Naga bible

2 KINCHAKH 31

¹Mi ngai tei luai pwkhou, Isaraelmei guay tei Juda tuang kaidai kathuicna khou tatna swangtauc tiangc guay swbau the, Asherapui tuang ravmaengc guay dowbau the, rav baihmei tuang ravchabamv guay khatni kalummei bamv guay swmaan the. Hei tei kumcna Juda tuang kaidai baih baihmei bamv guay khou, Benjamin, Ephraim, khatni Manase tuang ramv guay khou taanc the, kumna kaniw kakai kakai hanc guang dat the.

²Guangh Hezekia rui amuh nunc lev Levimei nunc ta tei kaniw thouc taanc nimei thak tei kasiamhlou dat the. Mi khou tei rawna khaengmei khatni alamvpuatkat khaengmei, Ravkai khou kalummei taanv khou kadam laamei khatni Ravkai khou thuanckumei khatni thuanhmei hei guay hei kazauh the.

³Lauthwan tingzyn kapumc rawna khaeng khang, khatni Sabbathneic, bw thanh Ngai, khatni RINGHPOUC tuang Riakdanv khou dincloumei ngai guay khou khaeng khang kamei rui katuang khouringc pang khou rui tii the.

⁴Mi guay ruc khou rui, amuh nunc khatni Levimei nunc tei kaniw tuang ganv guay RINGHPOUC tuang Riakdanv rui taanc o twna dincloumei khou sinsw kan diu khang kaniw khang tii guang nimei tuang puatkat tei ni tii o twna guangh rui Jerusalemmei nunc khou sa the.

⁵Mi latdanv tei patpui lev, Isaraelmei nunc rui gay liangmei nap, drakhadui, Olive thauc, nkhuaihdui khatni baihmei kaniw tuang laupuk khou rui nthai patmei guay kat guang the. Kaniw tuang naimei guay tuang kadam ruh tuang ni tii guang the.

⁶Juda kaidai guay khou lungc bammei nunc rui kaniw tuang guaih khatni lauziu tuang kadam ruh tuang tii guang the, kumna kaniw Racguangc RINGHPOUC khou kaniw rui katgutloumei kaipat mpeyna ni kaniw rui phungc guang the.

⁷Kaipat tei kathumhmei bw khou rui tii guang kahouhna chaneimei bw khou luailou the kumna tu biuc, khuan padiklou the.

⁸Azuh geicna tii guanglou bam the cho twmei guangh Hezekia khatni katuang meicdaihmei guay rui how pwkhou, kaniw RINGHPOUC ta thuanc the, Isaraelmei guay ta ni thuancku the.

⁹Guangh rui amuh nunc lev Levimei nunc khou kaipat lam khou tei thanv pwkhou,

¹⁰Zadok kiktamei Tingkuh Azaria rui kakhou daw the, “Meic nunc rui kaipat tei Ravkai khou phungc guang khou rui thauna tu liamh zangv liamhna bam the. RINGHPOUC rui kamei nunc ta suaihiamlouna mpeyna liamh patna bam the.”

¹¹Guangh tuang latdanv theilayna kaipat guay tei ryloumei bamv khang Ravkai daeng khou kabamv kasiamhlou the,

¹²kumna kaipat khatni puatkat guay tei mi khou tei lou the. Kaniw rui mi guay tei zauclou khang Levimei Konania twmeipu khou nsinlou the, kumna kata nkhavloumei khang kachana Shimei ta lou the.

¹³Kaney bangc khou taanv sw khang Levimei gaanv ruh: Jehiel, Azaria, Nahat, Asahel, Jerimot, Jozabad, Eliel, Ismakia, Mahat, khatni Benaia hei nunc ti hei lou the. Mi guay hei guangh Hezekia khatni Tingkuh Azaria rui loumei tuang e.

¹⁴Imna nac mpouh, Ravkai tuang neihpat raengcmun rigaanvmei kapy Levimeipu Kore rui RINGHPOUC khang tiiloumei kaipat guay tei laalouna mi guay tei nzanhmei hei kathouc khwan e.

¹⁵Amuh nunc lunghmei baih baihmei kaidai guay khou ni kata Eden, Miniamin, Jeshua, Shemaia, Amaria, khatni Shekania hei nunc hei rui nkhavlou the. Kaniw rui kaniw chana punav Levimei guay khang tei kaniw tuang thouc theilayna taektw nzanh the,

¹⁶hei tei kaikhwang swna nzanh mak ge. Tingkwm 30 khou rui karucmei Ravkai khou thouh phunghmei nggaanvmei guay dam nzanhlou the.

¹⁷Amuh nunc khang tei kaikhwang theilayna kaniw thouc nzanhlou the, khatni Levimei tingkwm 20 khou rui karucmei guay khang kaniw thouc kakang kakang swna tiilou the.

¹⁸Kaniw guayna tei kaniw now, nac nunc, khatni kaniw rui makuat bammei guay lev kazauhna zanh chanc the, kalam thu kaniw tuang nthanmei taanv tei kage nai nai khou taanc rap khang chamdaanv bam khang kage nai khwan e.

¹⁹Aron kikta nunc khang tiiloumei kaidai guay khou khatni mi kaidai guay tuang khouringh byn ramv khou lungc bammei amuh pang khou, amuh kaikhuncmei nggaanvmei guay khang khatni Levimei puinacmei khou zanh naimei guay khang taektw nzanh nimei nunc nai khwan e.

²⁰Juda kabamv kathuicna khou, guangh Hezekia rui nchumhmei khatni RINGHPOUC kaRacguangc rui kahawmei taanc khwan e.

²¹Kamei rui taanhmei guay tei ngam khwan e, kalam thu kamei rui Ravkai khang taanhmei kathuic hamh e thei Riakdanv tei piuna taanhmei taanv guay khou Ravguangc khou gutloupary rina taanc khwan e.