Read Rongmei Naga 2 KINCHAKH 32 Bible Online

2 KINCHAKH 32 - Rongmei Naga bible

2 KINCHAKH 32

¹Guangh Hezekia rui lwm nuhmei swna RINGHPOUC siamruai swna mi guay hei taancloumei tangv, Asiriamei guangcdaihmei Sennakerib rui Juda khou rihkey the. Raengh raengloumei kaidai guay kamei rui dingbinna katuang ricmei nunc ta raengh guay tei swrana gut khang latdanv pat the.

²Sennakerib rui Jerusalem ta ni adow puni the twmei Hezekia rui how lana

³Guangh rui katuang meicdaihmei nunc khatni kangamv naimei nunc lev twna raengh paengc thangc dui tipat mak khang chamvraeng sw the mi khou tei meicpeyna rui nkhavlou the.

⁴Meicpeyna rui guang kaduaina duipuakkai guay tei swdiatlou the. “Tabui zaeng rui Asiriamei guangc rui dui laatow bamthouc naina cho” twna kaniw rui sa the.

⁵Guangh rui raengh tei katamv dat the, mi khou tei rihphaankai swlou geic the kumna raengh kapaengcmei sap ni kasiamhlou the. Jerusalem kaguangc khou neihpat biak thwanna kasiamhloumei rihgaek bamv guay tei ni katamvlou dat the. Kamei rui buy lev nggih ni mpeyna tikasiamh the.

⁶Kaidai khou naimei nggaanvmei guay ta tei rihpy nunc bangc khou louna kaidai raengckat khou naimei sanghbamv khou guang kaduai khang latdanv pat the. Kamei rui kaniw khou sa the,

⁷“Nangniw lung ding ntip o, lwm o kumna Asiriamei guangc khatni katuang ricmei nunc ta ping riu. Kakhou naimei pumtan khang suangc aniu khou pumtan mbuna nai e.

⁸Kakhou thu maansei tuang pumtan na nai e, aniu khang thu aniu ta nkhavlou khang khatni rihbamv khou adow khang aniu Racguangc RINGHPOUC nai e.” Guangh tuang lat tei rui meic nunc ta tibauclou the.

⁹Kanakmei tangv, Sennakerib tei katuang ricmei nunc lev twna Lakis khou bammei ganv khou kamei rui Hezekia khatni Jerusalem khou bammei Judamei nunc khou kumna lat tii guang the:

¹⁰“Jerusalem ta tei dingbin pwkhou nang khatni nang mei nunc rui dudaicna kaidai lungc khou tei bam nuhmei tuang lam akumhmei naina cho twna Asiriamei guangc daihmei Sennakerib ai rui thanv e.

¹¹RINGHPOUC nangniw Racguangc rui kanlou puni de twna Hezekia rui sa bammei tei kamei rui nangniw ta guatna ndaapc tarina titheih khang sw bam tw e.

¹²Kamei hei RINGHPOUC tuang Ravkai guay khatni ravchapaeng guay sw kasic ngam lana Judamei lev Jerusalemmei ta ravchabamv akhat na khou agaw nteina kalum o twna sameipu e.

¹³Apu apouc nunc khatni ai rui zaatc baih baihmei khou taanclou kanmei tei nangniw thay makna cho? Kaniw tuang rav nunc tei rui kaniw ta tei Asiriamei guanghdaihmei baanc khou rui kanlou kan bu cho?

¹⁴Mi kandic guay tuang rav guay tei rui kaniw kandic ta kanlou kan bu cho? Kum e thei nangniw tuang Racguangc rui nangniw ta kanlou puni twna akumhna ningna cho?

¹⁵Kumna hei tei kumcna Hezekia rui nangniw ta tiguat la riu. Kata lwm riu! Zaatc akhat na tuang rav akhat na rui sini kaniw kandic ta Asiriamei guanghdaihmei baanc khou rui kanlou kanmei guangc maek ge. Kumna nangniw tuang rav rui ni nangniw ta kanlou ngam ni tuang hamh e!”

¹⁶Asiriamei meicdaihmei nunc rui RINGHPOUC ta khatni RINGHPOUC bangc Hezekia ta mi khang suangc sini sa kasicna sa khwan e.

¹⁷Asiriamei guanghdaihmei tuang tatdyn tei rui Isaraelmei Racguangc RINGHPOUC ta thouhsw makna sa the. Mi khou tei “Zaatc guay tuang rav guay tei rui kaniw tuang meic nunc ta abaanc khou rui kanlou ngam kan mak ge, hei tei kumcna Hezekia tuang Racguangc rui ni kamei nunc ta abaanc khou rui kanlou ngam ni tuang hamh e,” twna sa the.

¹⁸Jerusalemmei nunc ta tei tipinglouna kaidai tei chiwna laa nuh khang twna meicdaihmei nunc tei rui mi lat hei raengh khou bammei Jerusalemmei nunc khou tei Ibria lat rui kauc the.

¹⁹Zaatc baih baihmei tuang maansei baanc rui kasiamhmei ravmaengc guay ta samei kumcna kaniw rui RINGHPOUC ta sa the.

²⁰Khoutei guangh Hezekia lev Amoz nac mpouh muhzwng Isaia rui Ravguangc khou nkhavlou khang ney the.

²¹RINGHPOUC rui baanchara gaanv khat ta thouc keyna Asiriamei tuang ricmei kang khatni rihpy guay ta swluai the. Kumna guangdaihmei tei zakna Asiria thangc hanc dat kan the. Zaeng neih khat kamei katuang ravkai khou bam khou kanac mpouh gaanvsaekc rui baengsaeng rui kata dowluai kan the.

²²Mi kumcna RINGHPOUC rui guangh Hezekia khatni Jerusalemmei nunc ta Asiriamei guanghdaihmei Sennakerib khatni baih baihmei zauczihmei guay khou rui kanlou kan the. Kamei rui meic nunc ta tei kainingmei kandic guay lev nchu-nzaenghna tilungclou the.

²³Meic mpeyna RINGHPOUC khang puatkat Jerusalem khou phungc guang khwan e, kumna Hezekia khang ni kaipat mpeyna phungc guangna kandih kaguay rui Hezekia ta chakhwang sw bam khwan e.

²⁴Mi ganv zaengc khou tei guangh Hezekia tei nnauna theic ni kumc bam khwan the. Kamei rui huayney pwkhou kamei gay dat puni the twmei tuang madanhmei tuang RINGHPOUC rui tiilou the.

²⁵Tiki kamei daihlung phungcna RINGHPOUC rui tigaylou dat dyng the twmei ndauh nii mak khwan the, kumna mi zaeng khou tei rui Juda lev Jerusalem tei ryanramei ariw kan e.

²⁶Nkhamh khou thu, Hezekia khatni Jerusalemmei tei niamh key datna Hezekia theih mak saanv RINGHPOUC rui meic nunc ta tei dandi tii mak khwan e.

²⁷Guangh Hezekia tei lungcgay khwan e kumna meic kathuicna rui kata chakhwang swna bam khwan e. Kamei rui kachaekc, daandi, kunghmei tauc, maruai, nggih khatni baihmei kunghmei puat guay ryloumei kai kasiamh khwan e.

²⁸Nap, drakhadui, khatni Olive thauc ryloumei kai, khouringh kai, khatni lauziu bamv mpeyna kasiamhlou khwan e.

²⁹Mi guay ruc khou rui, RINGHPOUC rui lauziu, guaih khatni baihmei lanv heidikamv geicna tiilou tina kamei rui kaidai mpeyna ni kasiamhlou khwan e.

³⁰Gihon duipuakkai tei kapaengc pat mak khang thingc lana Jerusalem raengc lungc khou duichaeng riatna tiluangcloumei tei guangh Hezekia rui e. Hezekia tei kamei rui taanc ni twmei guay taanc ngam khwan e,

³¹kumna kadath datmei tuang akhat mi kandic khou tei pat kanmei lam khou thanv khang Babilonmei tuang dihkhyn nunc thouc guang pwkhou, Ravguangc rui kalung tei nchanv khang Hezekia ta kamei rui ningmei khou tat khang mpatlou khwan e.

³²Guangh Hezekia rui taancloumei baih baihmei guay khatni kamei rui RINGHPOUC ta nzianmei lam guay Amoz nac mpouh Isaia tuang ndawman buk khatni Juda lev Isaraelmei guangc nunc tuang Chakh buk khou hylou the.

³³Hezekia theicna David nac nunc tuang tarou karucmei langv khou tei mbeihlou the. Kamei theih khou Judamei khatni Jerusalemmei guayna rui chakhwang daicna swlou the. Kanac mpouh Manase rui kaphaan guangh sw lyn dat the.