Read Rongmei Naga 2 KINCHAKH 33 Bible Online

2 KINCHAKH 33 - Rongmei Naga bible

2 KINCHAKH 33

¹Manase tei katingkwm 12 khou Judamei guangc swna kamei Jerusalem khou tingkwm 55 guangh swlou khwan e.

²Isaraelmei guay guang pwkhou RINGHPOUC rui alay ganc kanmei zaatc nunc tuang chanymei taanv tei lay luaihna Manase rui RINGHPOUC ruc khou paapc taanc khwan e.

³Kapu Hezekia rui swmaan kanmei rav baihmei ta kalummei bamv guay tei kamei rui kasiamh thau dat the. Kamei rui Baal ta kalummei tuang ravchabamv guay kasiamh thau dat the, Asherapui ravmaengc kasiamhlou dat geic the, khatni gaanchuangcna ta kalum dat the.

⁴RINGHPOUC rui kata tingsaeng kalummei bamv khang e twna saloumei bamv Ravkai khou tei rav baihmei tuang ravchabamv kasiamhlou geic the.

⁵Ravkai tuang kaimav kanei khou tei gaanchuangcna ta kalummei tuang ravchabamv kamei rui kasiamh thaulou the.

⁶Kamei rui kanac mpouh nunc ta Hinnom nzaengc khou rawna khaeng the. Kamei mangmuh kachuc the, duaih sw the, ravtow amuc kachuc the. Kamei rui RINGHPOUC ruc khou paapc taancdai taancna kalungpuam tithau the.

⁷Kamei rui Ravkai khou tei ravmaengc lou the, mi Ravkai lam khou tei Ravguangc rui David khatni kanac mpouh Solomon khou kumna salou khwan e: “Mi Jerusalem khou hei, mi Ravkai khou hei ata kalummei bamv khang e twna Isaraelmei tuang kaikhwang 12 tuang ramv lungc khou rui kadahloumei tuang the.

⁸Isaraelmei rui atuang Riakdanv guay piu pw e thei khatni abangc Mousi rui tiiloumei latdanv kapwm tei piu pw e thei, ai rui kaniw ta kaniw pupouc khou tiilou kanmei kandic khou hei rui alay ganc lak ge.”

⁹Tiki Manase rui Judamei nunc ta RINGHPOUC rui kamei nunc guang pwkhou nthau ganclou kanmei zaat nunc rui taanhmei paap guay suangc sini simei paap taanh khang zaylou the.

¹⁰RINGHPOUC rui Manase khatni kamei nunc khou sa tisini kaniw nkinglou mak khe.

¹¹Kum tina RINGHPOUC rui Asiriamei ricpy nunc ta Jerusalem khou rih tikey the. Kaniw rui Manase ta nym lana, ntanh khuaic goulouna, kangriang ntana kata Babilon thangc zay tat the.

¹²Kamei ryanra key pwkhou niamh keyna RINGHPOUC kaRacguangc khou hanc guang the, kumna nkhavlou khang ney the.

¹³Ravguangc rui Manase rui huayneymei tei laalouna kata Jerusalem khou tiguang datna guangh tiswlou dat khwan e. Mi khou tei RINGHPOUC hei Ravguangc the twmei kamei lwm kan the.

¹⁴Mi tangv tei Manase rui David Kaidai tuang neihpat biak kapaengcmei raengh tei Gihon duipuakkai daeng khou naimei nzaengc tuang kabamv akhat khou rui Khav raengcmun twna kawmei bamv nganv kasiamhlou khwan e khatni Ophel twna kawmei bamv khou tei thwan kauhlou khwan e. Kamei rui Juda tuang raengh raengloumei kaidai guay khou ni rihpy nunc lou khwan e.

¹⁵Kamei rui Ravkai khou rui rav baihmei guay khatni ravmaengc guay laa ganc khwan e. Ravkai swloumei chyngbut khou khatni Jerusalem kabamv baih baih khou rav baihmei tuang ravchabamv naimei guay laa ganc khwan e. Kamei rui mi guay tei kaidai paengc thangc laa patna kaliang ganc the.

¹⁶RINGHPOUC ta kalummei tuang ravchapaeng tei kamei rui katamv dat the, kumna mi khou tei alamvpuatkat khatni thuanckumei puatkat khaeng dat the. Kamei rui Judamei guayna ta Isaraelmei Ravguangc RINGHPOUC ta kalum khang latdanv pat the.

¹⁷Meic nunc rui kabamv baih baih khou khaengna bam sini, kaniw rui khaeng bammei tei RINGHPOUC khou na khwan e.

¹⁸Manase rui taancloumei baihmei guay, kamei rui kaRacguangc khou huayneymei guay, khatni Isarael Racguangc RINGHPOUC tuang Chakh buk khou hylou the.

¹⁹Guangh rui huayneymei khatni Ravguangc rui dawloumei, khatni kamei lunghlaih makmei douc taanclou kanmei paap guay, twmei thu kamei rui simei taanv taanc kanmei, rav baihmei ta kalummei bamv khatni kamei rui kasiamhloumei Asherapui maengc guay lam khou Muhzwng nunc Tuang Chakh buk khou hylou the.

²⁰Manase tei theicna guanghkai khou mbeihlou the kumna kanac mpouh Amon rui kaphaan guang sw dat the.

²¹Amon tei katingkwm 22 khou Judamei guangc swna kamei Jerusalem khou tingkwm kanei guangh swlou khwan e.

²²Kapu Manase kumcna kamei RINGHPOUC ruc khou paapc taanc khwan e, kumna kapu rui kalum kanmei racmaengc guay tei kamei ni kalum khwan e.

²³Tiki kamei thu kapu kumcna niamh keyna RINGHPOUC khou hanc guang dat kan mak khe; kamei tei kapu suangc paapc taanc geic khwan the.

²⁴Amon ta katuang meicdaihmei nunc rui rikna guanghkai khou swluai the.

²⁵Amon ta swluaimei nunc ta Judamei nunc rui swluai datna kanac mpouh Josia ta guangh tisw dat the.