Read Rongmei Naga 2 KINCHAKH 34 Bible Online

2 KINCHAKH 34 - Rongmei Naga bible

2 KINCHAKH 34

¹Josia tei katingkwm tachat khou Judamei guangc swna kamei Jerusalem khou tingkwm 31 guangh swlou khwan e.

²Kamei RINGHPOUC rui kahawmei taancna lungc khwan e, kamei kapu kapouc David theilayna Ravguangc tuang latdanv guay ntipna piu khwan e.

³Josia kamei guanghtumei tuang tachatmei kwm, kamei alauc sihna kamei kapu kapouc David Racguangc ta kalum thau the. Tingkwm padeih tangv kamei rui rav baihmei ta kalummei bamv guay, Asherapui maengc guay, khatni ravmaengc baih baihmei guay swmaan thau the.

⁴Katuang latdyn theilayna kamei nunc rui Baal ta kalummei ravchabamv guay sw kasic the khatni mi daeng khou naimei agaw ravchabamv guay swra the. Ashera tuang maengc guay khatni baihmei ravmaengc guay kabuay sowpatna mi buay guay tei mi ravcha guay khou khaengmei nunc tuang tarou py khou zinlou kan the.

⁵Kamei rui rav baihmei ta kalummei amuh nunc tuang rou tei kaniw rui kalummei ravchabamv khou tei ntei kan the. Mi guay hei taancna kamei rui Juda khatni Jerusalem ta sw nthanlou dat kan the.

⁶Kamei rui mi hei kumcna Manase, Ephraim, Simeon, khatni dihpy thangc Naphtali nganv tuang kaidai guay khou khatni sw kasic karoucloumei ramv guay khou taanclou kan the.

⁷Dihpy Guanghdic kabamv kathuic khou kamei rui ravchabamv guay Ashera maengc guay sw kasic khwan e, ravmaengc guay kabuay sow patlou khwan e, khatni agaw ravcha guay kakiak kiak swpuatlou khwan e. Kumna kamei Jerusalem khou hanc guang dat khwan e.

⁸Kamei guangh swmei tuang 18mei kwm, rav baihmei ta kalummei tuang guay tei laa gancna mi kandic khatni Ravkai tei sw nthanmei tangv, Guangh Josia rui Ravkai katamv khang meic gaanv thumh; Azalia nac mpouh Shaphan, Jerusalem sinmeipu Maaseia, Joahaz nac mpouh meicdaihmei Joa ta thouclou the.

⁹Levimei rigaanv nunc rui Ravkai khou rui kakhaloumei syan guay tei Tingkuh Hilkia khou tiilou the. (Hei tei Ephraimmei, Manasemei, dihpy Guangcdic kapwm khou rui, Judamei, Benjaminmei, khatni Jerusalem khou rui kakha guangmei syan e.)

¹⁰Mi syan guay tei Ravkai katamv khou kathouc tiswloumei gaanv thumh khou tei tiilou kan the, kumna kaniw rui

¹¹hei tei Judamei guangc nunc rui swkasicloumei guay tei katamv dat khang thing ntauh liu khang thing taanhmei khatni kaiswmei nunc khou tei tii kan the.

¹²Taanvtaanhmei nunc tei lungning nthan thiakh thiak khwan e. Kaniw taanv tei Levimei gaanv padeih: Merari puinacmei Jahat lev Obadia, khatni Kohat puinacmei Zekaria lev Meshullam hei nunc rui taanv tei zaylou the. (Mi nunc hei ludow heihmei nunc e.)

¹³Baihmei Levimei guay tei kana phungc guangmei khatni taanv baih baihmei guay tei zaucloumei khou kaniw thouc sw khwan e. Baihmei gaanvsaekc rui kachakh hyloumei khatni rigaanv dingmei khou kaniw thouc sw khwan e.

¹⁴Ramhrykai khou rui syan tei laa pat bam khou rui RINGHPOUC tuang Riakdanv buk, RINGHPOUC rui Mousi khou tiiloumei latdanv buk tei Hilkia rui ariw the.

¹⁵Kamei rui Shaphan khou sa the, “Ai rui mi Ravkai khou rui RINGHPOUC tuang Riakdanv buk tei ariw the.” Kamei rui Shaphan khou mi buk tei tii the,

¹⁶kumna Shaphan rui hei tei guangh khou laaguangna kamei rui sa the, “Nang rui tiimei latdanv guay tei aniw taanc the.

¹⁷Ravkai khou loumei syan tei laa patna hei tei taanhmei khatni taanv zauhmei nunc khou nsinlou kan the.

¹⁸Mi hei Hilkia rui tiiloumei tuang buk ge.” Kumna kamei rui guangh khou pac ranvna pac the.

¹⁹Mi buk khou tei rui pac patmei tei guangh tei rui chu pwkhou, kamei lungh kabiuna kaphey siat the.

²⁰Kumna kamei rui Hilkia khou, Shaphan nac mpouh Ahikam khou, Mikaia nac mpouh peikai tuang hymei Shaphan khou khatni guangh baancpwam Asaia khou mi latdanv hei pat the:

²¹“Nangniw tatna akhang khatni Isaraelmei lev Juda khou ringc bammei nunc khang RINGHPOUC khou kachuclou o. Mi buk khou dincloumei lam khou hei thanv o. Aniu pupouc nunc rui RINGHPOUC tuang lat piu makmei zaeng rui khatni mi buk khou hei taanc o twna saloumei guay taanh makmei zaeng rui RINGHPOUC rui aniu ta kalung puamc the.”

²²Guangh tuang latdanv theilayna, Hilkia khatni baihmei guay tei Jerusalem kathanc khou lungc bammei Hulda twmei muhzwngpui khou thanv khang tat the. (Kagaanv Shallum, Tikva nac mpouh, Harhas tou tei Ravkai thiula saenghmei guay rymeipu e.) Kaniw rui pat kanmei guay tei mipui khou tei raclou the.

²³Kamei rui kaniw khou kumna dinclou the, akhou ndiu guangmeipu khou kumna dinclou o, RINGHPOUC rui kumna Isaraelmei nunc khou sa e,

²⁴“Ai rui mi bamv ti hei khatni mi khou hei lungc bammei guay ta mi buk khou hyloumei tuang Syang, guangh khou pac kanmei guay tei rui dandi tii puni the.

²⁵Kaniw rui ata gancna rav baih baihmei khou khaengna kaniw taanv rui alungpuam tithau the. Ai Jerusalem ta lungpuamc the, kumna mi hei nchu key dat ni tuang hamh the.

²⁶Guangh lam khou Isarael Racguangc RINGHPOUC ai rui sa e: Mi buk khou tei hyloumei tei nang nkingna,

²⁷lunghlaicna ahu khou niamh key the. Ai rui Jerusalem khatni mi kaidaimei guay ta dandi tii nimei tei nang rui chu lana nang phey siatkaekna kap the. Nang rui huayneymei ai chu the,

²⁸kumna ai rui Jerusalem khou tiguang nimei dandi tei nang theih mak khou tiguang lak khe. Ai rui nang ta nchu nrina titheiclou puni the.” Kaniw rui mi chamv tei guangh Josia khou phungc guang the.

²⁹Guangh Josia rui Judamei khatni Jerusalemmei kapy swmei guay ta kaw kaduaina

³⁰amuh nunc, Levimei nunc, khatni lungcsi lungcgaymei guayna ta nduanghna kaniw guay Ravkai khou guang the. Guangh tei rui Ravkai khou rui ariwmei latdyng buk khou hyloumei guay tei meic guayna hu khou pac ranvna pac the.

³¹Kamei guangh tuang tiangdaic daeng khou dingna RINGHPOUC tuang lat piu khang, kalung kapwm rui katuang latdanv khatni latdyn guay piu khang, khatni mi buk khou tei hyloumei taanc nimei thouc guay tei taanh khang RINGHPOUC khou latdyng sw the.

³²Kamei rui Benjaminmei khatni Jerusalem khou bammei baihmei guay tei ni mi latdyng tei piu khang latdyng tisw the. Kumna Jerusalemmei nunc tei kaniw rui kaniw pupouc Racguangc khou swlou kanmei latdyng tei taanc the.

³³Isaraelmei tuang kandic khou naimei chanymei ravmaengc guay tei guangh Josia rui swmaan the, kumna kamei ringc bam saanv kamei rui kaniw pupouc Racguangc RINGHPOUC siamruai tisw the.